SUNDA 28 - Boy Lonana

Pol kay daara Malt

¹ Ami suɗumi ki suɗ ɗaŋŋi, humumi ana sem daara ami kaɗta ana Malt.

² Suu ɦoŋzi nammana vami u furira ɦay, hu li namma lona gijaŋ sira, lina semeɗ cocoo, asi ŋgal kura ŋgola na ɦik ɦik, ami tok halaŋ a hol tamira.

³ Pol yow njem guna kom a cukum kay kura, magira ay duk kura cuk ay ki ca ni mba ɗuɗ del ko Pol.

⁴ Suu hu ɦoŋzina kay daa ndaɗtana wi magira ɗuɗ ko Pol na ni, asi di tasi ana, «Sa namma ni sa ma ci maɗna, suɗ ay ki mam duk mbo lumma lay ni ɗegeera vi Lonara ka hinim a nam kak iiriɗi.»

⁵ Pol kisik magira ha ki duk kura na ni, va ma lam ka dagan na ndeɗi.

⁶ Suu daŋŋa lak a juɓ ana hin balam kala, ɗowba hin ndi ga miɗ kalage. Asi juɓ dagan gak gak va ma co li ka egembi ni, asi mbuɗ saa masira ana nammi ta lona gaw.

⁷ Eg li namma na tokŋi sa ŋgolna dew ka kay daara huwa sem ana Publiyus, sa namma vami u furira ŋgolo, ami buu varam hindi.

⁸ Bu Publiyus u tuguɗira tam gi kura, sot ma bubusuna lam lay. Pol tuɗ a golomba, baa kom kamu cen Lona nam garaɗ ki gaw.

⁹ Ŋgoo dagan wanni suu tuguɗira kay daa ndaɗta mbay eg Pol. Nam garaɗasi kiyo.

¹⁰ Asi ŋgaami cocoo, ami a ful hu lumma a tuɗta wanni, asi ɦami tlesuu njun umi hu koy mamira ŋgolo.

Pol mba hu Rom

¹¹ Hu daɓpa vi til ma hindina wanni ami tuɗumi u lum kawi ma Aleksandrina, asi yam sem ana lo ma ŋgonira kay nam basa ni kay daa ndaɗta.

¹² Ami mba hu ɦoŋzi ma ŋgolna Sirakusna mba ni, li buuna hu hindi.

¹³ Ay hu li namma wanni ami tuɗumi u gun yona a tew ki Regiyo. Vin maɗiira wanni semeɗ ma mbayawna col ay siira, ami tewemi ni li buuna mba, hu ɦoŋzina Puzzol.

¹⁴ Hu ɦoŋzi ma ŋgol namma ni ami fi gorsemina huwa, asi min ana ami kak varasi li buuna goy kiɗisiya tuwa. Ni ami hin tuɗumi Rommi na.

¹⁵ Gorsemi suu ha Romma humumi dlami ha hummi, asi mba ŋgafami vokomi u Sukŋa Appiusna u mbutluɓ ma hindina. Pol wasi na ni tam diŋitl gaw, nam gi deɓ Lona.

¹⁶ Ami mbaami Rom mba ni, asi ɦal li ma Pol kak huna kay tam dew u sa ma asgaana um a golomba may.

Pol di Boy Lonana hu Rom

¹⁷ Li buuna hindi ŋgoo dagan wanni Pol yi muli suu vi suu Juifna suu Romma ay egemu. Asi tok ay tokŋi nam dasi ana, «Gorsenna an li va ma co ka eg suu maysinaɗi, li va ma co ka eg dlara vi somoyogiraɗi lay, asi van ay Yerusalem vini ɦan maŋ suu Romma.

¹⁸ Asi joɓon joɓmi, min a gan koloo kay asi fi dla mayra ndaki a can ki ka kaɗi.

¹⁹ Ni asi suu Juifna ka minɗi, kay ndaɗta an joɓ Sesar. An wi va ma co ma ana an lam eg suu manna na kaɗi.

²⁰ Agi gola an yagi ay ni agi wiya an dagi ni na, ni kay juɓpa suu Israelna ka juɓa an ka njuni kaŋga u galina ni kayami.»

²¹ Asi dam ana, «Ami fi magaa ay ka ko suu Yudena kay boy maŋŋaɗi. Wayami ma col ay tana dami boy ma co ka kaŋgi lay.

²² Ami min a hum boy ma aŋ saaramma, ami wi ana suuna ka ŋgolo, min li gonokka u vira aŋ tin huruŋ kaɗ wanda.»

²³ Asi ŋga buuna duk tasi u Pol dew, hu buu namma wanni suuna mba bolow cocoo, fi Pol hu li ma nam buu huna. Col ay maɗii day gak gak fiɗigiya, Pol dasi boyna kiyo, nam dasi boyna kay Mul Lonara, hal a mbuɗusi hurusi u Yesu, li sunda u gaɗta vi Moizza u magaara vi suu jok vun Lona.

²⁴ Su ɦiw vi u va ma nam damma, suu ɦiw ka min viɗi may.

²⁵ Asi cuk tasi ɦawa bay vunusi taɓ duk tasiya. Pol dasi ɦawa ana, «Musuk Lonara di gasini u voɗoɗu, hu li ma ndaɗ di somoyogi u vun sa ma jok vun Lona Ezayi.

²⁶ Nam dasi ana, Tuɗ eg suuna wanni dasiya, a humba agi hum jiviya ka vagi boy namma hurugiɗi, agi gologi jiviya ka wagi va ma agi golommaɗi.

²⁷ Kay suu asina hurusi mbuɗ ki giniŋi, asi ŋgel humusi kiyo, dug irisi ki lay. A irisi wiɗi, a humusi humbi lay. A hurusi humbi lay. Lona di ana asi mbuɗ irisi ay egen a an garaɗasi kiɗi lay.»

²⁸ Pol dasi hu ɗaŋ ana, «Boy ma suɗta vi Lona sunum ay ni maŋ suu ka njaf suu Juifnaɗina, asi hin hum umu.» [

²⁹ Pol di boy namma na ni suu Juifna tuɗ ni ciwayra duk tasi ɦay.]

³⁰ Pol li basara hu zira nam warak kaɗta mba', suu mba golom huna halaŋ nam vasi u furira.

³¹ Nam dasi boyna kay Mul Lonara, haɗasi boyna kay Bu Suuna Yesu Kristu, bay ndaana sa doorom kaɗi.