SUNDA 27 - Boy Lonana

Asi sun Pol hu Rom

¹ Hu li ma nam saa ana ami tuɗumi Itali u lum kawina ni, Pol u suu daŋgay suu daŋŋa asi ɦasi ko sa ma ŋgol asgaana dew sem ana Julius, nammi fok suu duuna vi suu Romma ni di ana fok suu duuna vi mul ŋgolna.

² Ami fulumi hu lum kawi ma Adramit, nam a tuɗ tok hu ndaŋgara Azira, ami hin tuɗumi ɗaŋ. Aristark ma Masedoin ta Tesalonikka ay umi hu may.

³ Vin maɗii ni ami tewemi Sidon, Julius hurum jivi eg Pol, hinim ana nam tuɗ gol banayamma, lini nam fi va ma nam minim ay kosi kalage.

⁴ Hu li namma ami fulumi fulni, tlami voɗta u daara Sipre na ɗow kay semeɗna ŋgafami irimi ay ni ŋgafi na ɗow.

⁵ Ami calaɗami lumma eg Silisi tokŋa, u ma Pamfilina ki calani cukumi ki Mira ta Lisira.

⁶ Hu li namma ni sa ŋgol asgaana fi lum kawi ma Aleksandrina a tuɗ Itali, ni nam cukumi hurum gaw.

⁷ Lami buuna bolowo lum kawina tuɗ neke tuɗumi ni na lam lam mbaarami tok eg zi ŋgolna Kinid, semeɗna ka hinimi a tuɗ day hu li namma ɗegeeɗi, ami tlami kay daara Salmoneda, kay a fi li ma jak ki kay daara Kretta na.

⁸ Ami tuɗumi loɓ cocoo mbaami i hu li ma asi yam ana Vun Li ma Jivina ma lum kawina col huna, li namma ni na tok eg ɦoŋzi ma ŋgol ma Lasena.

⁹ Lina kalami ay ki cocoo mbuɗ kami loɓ ŋgolo a lus fok u lum kawina na gak gakka. Kay buu ma li laara hu til semeɗna jak ki wa. Ni kay ndaɗta Pol dasi yasi ki ana,

¹⁰ «Gorna an wi anaba koy maygira a hin mbuɗ loɓo, lum kawina u tlesuu hurumma halaŋ hin ɓeŋ kiyo, aygi taygira lay ni hin na tok a iiri maygira bara lay.»

¹¹ Sa ma fok suu asgaa suu Romma vi u boy ma mul lum kawina u malamma su kay boy ma Pol damma.

¹² Vun li ma lum kawina col hu namma ka jivi a asi li walla huɗi. Ni kay ndaɗta ŋgola vi suuna ŋga vunusi ana hin li namma kiyo. Asi ana lini jiviya ni asi tew Feniks, li ma lum kawina col huna ii fiɗigina ii dali na. Ii u fiɗigi ii mbayaw na may, hu li namma ni asi hin li walla ni huwa.

Semeɗna hu lum ŋgolna

¹³ Semeɗ ma goona col ay siira ii mbayaw na mba famiya, asi saa ana ni asi hin tew liisina ki ɦawaa. Asi yow kolo tli kawi ma nek ma vi lum kawina kaŋgana ki kolo tli gawni, tuɗ haa ni mba ni eg Kretta tok.

¹⁴ Gola ni semeɗ ma ŋgolna col ay kolo ii dali u maɗiina na, mbay kaŋga kay daara.

¹⁵ Nam semeɗna tli lum kawina ummi na gaw, a vi lumma haa ŋgaf ii semeɗna ha na ɗowra ni loɓ cocoo, ami hin tami ha u semeɗna na nam tlamiya.

¹⁶ Ami tlami ii mbayaw na tuɗ kay daara yaɗ ana Kauda, hu li namma ami fi saɓakŋa ew, mbuɗ a suɗira ni ami kaa zamalla ŋgolo, ami mbuɗ a heɓ lum kawi ma goona a suɗ tami ki ni na.

¹⁷ Asi fuli keŋem fulni njunum zewna keŋem a njunumba. Asi li ndaana ana nam hin ndaa ndi ki kay ŋgetl ma Libi kalage, asi buɗ kawi ma nek ma vi lum kawina kaŋga na ki buɗni hin semeɗna zuɗum haa.

¹⁸ Semeɗna yam kay zuɗumi cora na gak gak, vin maɗiira wanni asi mbuɗ a cuk tlesuu hu lum kawinana ki kaŋga duk mbona.

¹⁹ Hin ha hu buu ma fokŋa wanni asi cuk tlesuu kosina kiyo, kay a hin lum kawina feɗ kay mbona.

²⁰ Buuna li ŋgolo, faɗta u ciciwra sa ka wasiɗi, semeɗna sii saɓakŋa na gak gak, saa mamira mbuɗ ni ana ami ka suɗ oloɗi.

²¹ Suu ay ki kaki keŋ lummana li buuna ŋgolo bay ti va tiya. Pol col kolo fokosi zowni dasi ha ana, «Humugi haa banayanna, hinigi Kretta kiɗi ni aygi hin puruɗ ki ko dla cora a viɗigi kira.

²² Cecemi an dagiya lagi ndaaɗi, vagi hurugiya, dukugi wanni iirira vi sa a ba ki na ɗowɗi, lum kawina dew hin ba ki ni namu.

²³ Hu njeŋgera wanni sa sunda vi Lona ma an sunumma mba egenu.

²⁴ Dan ana li ndaaɗi Pol, lini nanagelay aŋ hin mba coli fok mul ŋgolna, Lona u jivi mamba hin suɗuŋ ki u suu ka uŋ hu lum kawinana bel.

²⁵ Ni kay ndaɗta gorna vagi hurugiya, an tin hurun ni kay Lona, nam hin li ni ko nam danda na.

²⁶ Aygi hin tuɗ cuki kay daara dew.»

²⁷ Hu njeŋgera a buu ma doogo yam fiɗina semeɗna zuɗumi ha gak gak tuɗumi hu lum ŋgol ma Mediteranena. Duk ŋgikka wanni sa ma li sunda hu lum kawina saa ana ami mba tok eg ndaŋgara.

²⁸ Nam njun va nekŋa fun zewna njunni ŋga u mbona, zulum kaŋga meterra dok hindi yam kiɗisiya, tuɗ fok na day ni nam ŋga zewna olo, fam meterra dok mba' yam kalavandi.

²⁹ Asi li ndaana ana lum kawina hin daɓ kay ɦini kalage. Ni kay ndaɗta asi njun kawi ma nekŋa njaw lum kawina dagan fiɗi kay a juɓ maɗiira fo ki tuwa.

³⁰ Suu li sunda hu lum kawina hal a pii hinimu, asi tli lum ma goona ki kaŋga tani cuk hurumu, ana asi tuɗ njun kawi ma nekŋa kaŋga fok lum kawina.

³¹ Pol di sa ŋgol ma fok suu asgaa suu Romma ana «Lini suu asina wanni ka laki hu lum kawina oloɗi ni sa suɗ ki kaɗi.»

³² Suu asgaana ŋgaɗ zew ma njuni u lum ma goona ki gaw hinim nam tuɗa.

³³ Maɗiira hin tok a fo kira ni Pol yi suuna halaŋ ɦasi tina, nam dasi ana, «Karami buu ma doogo yam fiɗina agi bay ti va tiya, ka laki ca.

³⁴ An yagi ni kay agi tagi tina, kay a suɗ tagi kira, dukugi wanna sa ba ki kaɗi, lini tlimiɗ yamba na dew lay ka ba kiɗi.»

³⁵ Pol di boyna di ɗaŋŋi hin tli funa komu gi deɓ Lona kam fok suuna halaŋ, nam ɓorowom ki ɓorow ni gijaŋ tira gaw.

³⁶ Suuna halaŋ ti funa, sa ma li ndaa ka oloɗi.

³⁷ Ami suu ay hu lum kawina halaŋ kis kis mba' duk dok kiɗisiya yam karkiya.

³⁸ Asi ti funa hoɓi hoɓmi cuk u wana ki duk mbo lumma kay hin lumma fete.

Lum kawina ŋga kaŋgaa

³⁹ Maɗiira fo ki foni suu li sunda hu lum kawina gol irisiya ni ka wi ndaŋgaraɗi, asi gol irisi aya ni wi hoŋ hoŋ lumma ɦagi paariya, asi ana mariyaɗ ni asi zuɗ lum kawina ha huwa.

⁴⁰ Asi buɗ ɓalaŋ ma nek ma vi lum kawina kaŋgana ki buɗni hinim ha duk mbona. Asi buɗ zew ma njaw lumma dagan ma pereɗemma ki buɗni asi njun barawna ay fok lum kawina a semeɗna zuɗum a tuɗum kay hoŋ hoŋ lumma.

⁴¹ Asi mba tew hu lum ma ŋgetlna mbuy huna ni lum kawina ka jak oloɗi col hu li namma. Vok lumma ŋga kaŋga duk ŋgetlna ndiŋ ndiŋ ka ndak a zuɗ oloɗi njawamba daganda kus ha ki ko semeɗna mbuɗ gaw may.

⁴² Suu asgaana min a ci suu daŋgayna kiyo, kay asi pii ki a lusnaɗi.

⁴³ Sa ma ŋgola fok asgaa suu Romma min a suɗ Pol kiyo, nam doorosi ana asi li naɗi hinisiya. Nam ɦasi voɗta ana suu wi lusna cuk tasi duk mbona lussa ful ha ki kolo doŋo.

⁴⁴ Suu hin ful ha kay guna usiya, suu daŋŋa tuɗ ha u lumma may. Suuna halaŋ ful kini va li sa ka dewɗi.