SUNDA 26 - Boy Lonana

Pol di boy mamma ki fok Agripa

¹ Agripa di Pol ana, «Voɗta ka kay aŋ a di boy maŋŋa.» Pol maɗ kom ki, di ki kay boy mamma ana,

² «Mul ŋgolna Agripa karam an li furira ŋgolo a di ki kay boy manna fokoŋu, u dlara suu Juifna mbaaranda kanda bel.

³ Dlara suu Juifna daɗta u ciway masira halaŋŋi aŋ waɗ bel. Ni kay ndaɗta an ceneŋ ceniya aŋ humun boy manna ha jiviya.

⁴ «An ay u goron day ni suu Juifna halaŋŋi wan poy manda. Asi wan dla mayra an laɗ duk suu manna ay Yerusalemba lay halaŋ.

⁵ Asi wan ay ni day day ndak di ki kay poy manda dukusira lay, lini asi min a diya. An ay ni duk suu coli saɓaki kay viimira eŋŋa, ni suu Farisenna.

⁶ Cecemmi an ka hu ɓakŋa kay an tin hurun kay boy ma Lona vi vunum u somoyomi kamma.

⁷ Njaf somoyomi suu doogo yam mbana tin hurusi kay a wi dla mayra nam vi vunum u asira, ni kay ndaɗta asi sun Lona faali lay njeŋge lay. Mulna ni kay vi mayra ndaɗta suu Juifna tok vunusi kanni na.

⁸ Agi suu Juifna agi min a vi ana Lona col suu miɗina ki kolo iiriyaɗi ni kay mege?

⁹ «An u tanda hal gin a bulum sem Yesu ma Nazaretna kiyo.

¹⁰ Ni dla mayra an laɗ ay Yerusalemba. Muli suu li ɓivunna ɦan saɓakŋa an yow suu vina ŋgolo cukusi daŋgayna. Asi vi kasi a casi kira ni an dlaɓ vunun u asi lay.

¹¹ An fasi hu Zira Tokka tew tew ni an yowosi njunusiya, an ɦeɓesi ana asi tin vunusi kay viisira. An min a tuɗ lasasi ki gin ni hu ɦoŋzi ma daŋŋa daŋŋa lay, duk njaf suu bay vina.»

Pol di ki kay hom mamba u Boy Lonana

¹² «Muli suu li ɓivunna ɦan saɓakŋa sunun hu Damas.

¹³ An hu voɗta a tuɗa wanni, faɗta faali ŋgola, an wi weleɗta col ay kolo duk lona weleɗ wanni su weleɗta vi faɗta, an u suu unna halaŋ lina li ki kami na kiɗik kiɗik.

¹⁴ Ami halaŋ puk kaŋga bel, an hum della dan ay u vun Arameenna ana, Sol, Sol, aŋ lasan na ni kay mege? Aŋ li cora egen ko mbutli suu zumma njaɗ maliyasina ko njewɗekkara na amege?

¹⁵ An joɓom ana, Ni aŋ gege, Bu Suuna? Bu Suuna di ana, Ni an Yesu ma aŋ lasanna.

¹⁶ Col kolo duk ɗegee an tak tan iriŋŋi a mbuɗuŋ ki sa ma sununna. Aŋ hin lini a sa ma diki kan maŋ suuna ana aŋ wanuna. Aŋ dasi kay tlesuu an hin takaŋsina ha fokŋa olo.

¹⁷ An min a buɗuŋ ki ko suu Juifna ko suu an min a sunuŋ egesina lay.

¹⁸ An sunuŋŋi kay aŋ tuɗ malasi irisi kiyo, kay aŋ yowosi ay ki duk ndufunda tuɗusi ki hu kiɗikka, a buɗusi ki ko saɓakŋa vi Satanna maŋ Lona. Kay tin mayra tin hurusi kanda ni coosira hin daɓ kiyo, asi hin yow jona ko tasi u suu vi Lonna u hurusi ma tini kanna.»

Pol ɓak dla sun mamba

¹⁹ «Mul ŋgolna Agripa va ma tak tam irin ay kolo huulona an hum umu.

²⁰ An gijaŋ boyna dira maŋ suu Damasna u suu Yerusalemma tuwa, ŋgoo dagan an di suu hu mbassa Yudera halaŋ u suu hu njaf ma daŋŋa ni na tuwa. U dira dasi ana jok hurusi ki zeɗta, mbuɗ irisi eg Lona a li sunda gasira tak ana hurusi ki joki zeɗta.

²¹ Suu Juifna vanni kay boy ma an dam namma, an ay hu Ziŋ Lonara wanni asi hal a can ki gini.

²² Lona njun ay un gak gak karam tani ni namu. An ka di boy manna ki maŋ suuna halaŋ, maŋ suu gorina u suu ŋgolona lay. Boy ma suu jok vun Lonna u Moiz dam ana hin mbana an ka jok va ma daŋ zeɗ u masinaɗi.

²³ Ana Sa Lona Fuurumma hin wihawra, nammi sa ma hin coli kolo hu miɗna iiri jewna. Nam hin di ki kay suɗta ɗal ɗal maŋ suu mamina u njaf suu daŋŋa lay.»

Pol di Agripa ana nam vi Boy Lonana

²⁴ Pol daɓ boy mamma dira daɓ ɗaŋŋi, Festus dam kolo eŋga ana, «Pol aŋ guruɗi su? Haɗ maŋga aŋ haɗa cocora guruɗuŋ ki wa.»

²⁵ Pol hoŋom dira ana, «Sa ŋgolna an ka guruɗiɗi. Boy ma an damma ni u voɗom gasi.

²⁶ Mulna Agripa ki hummi kay boy namma, ni an damma ki bay zolona may. An wi ana Mulna wi dla ndaɗta halaŋ, kay boy li ka ŋgayɗi ni ii suuna halaŋ.

²⁷ Mul ŋgolna Agripa aŋ vi boy ma suu jok vun Lona damma su? An wi ana aŋ vi boy namma.»

²⁸ Agripa di Pol ana, «Aŋ hin tok a mbuɗun hurun ki a vi Boy Lonana.»

²⁹ Pol hoŋom dira ana, «Cecemi lay, ha fokka lay an cen Lona ana huruŋ mbuɗ ni aŋ dewɗi, agi suu humun karam boy mannana halaŋ mbuɗ ni ko an na may, kay njunda an njuni u galinara ɦawaɗi.»

³⁰ Mul ŋgolna u muli suu umma, Berenis u suu toki hu li namma halaŋ yow koloo.

³¹ Asi ɦuɗ tasi ki keŋ ɦuɗ ni gijaŋ ɓak duk tasi ana sa namma li va ma co ma cam ki ci gaw ɗowba gam daŋgayɗi.

³² Agripa di Festus ana, «Sana wanni li di ana nam tuɗ fok Sesarɗi ni nam ndaki a gi ki koloo.»