SUNDA 25 - Boy Lonana

Pol min ana kaam ɓak mamba ni fok mul ŋgolna

¹ Festus mba hu mbas mamba ii li namma mba ni, li buuna hindi ŋgoo dagan nam kal kolo Sesare u Yerusalem.

² Hu li namma ni muli suu li ɓivunna u suu ŋgolo suu Juifna mba sek kay Pol fokomu. Asi joɓ Festus

³ kay nam ɦasi Pol ay hu Yerusalem tani, kay asi tok vunusi kam dew min a cam ki hu voɗta.

⁴ Festus hoŋosi dira ana Pol li ay hu daŋgayna Sesare ni nam kay tamba min hoŋ hu cecem lay.

⁵ Nam di hu olo ana, «Muli magina tuɗ tinin Sesare lini sa namma li va ma co egegiya ni agi tuɗ sekem ha huwa.»

⁶ Festus li buuna kalavandi ɗowba doogo u asiya, hin hoŋ ay Sesare. Hin vin maɗiira wanni nam mba kak hu li ma kaɓakŋa ni na gaw, dasi ana asi mba Pol ay fokomu.

⁷ Pol mba mba ni suu Juif suu ay Yerusalemma ŋguy ki kamma cutl, mbaaram boy ma cona kam ɦay. Ni boy ma asi tasira lay ni ndak ka ɗoɓom irimbina.

⁸ Pol di ki kay tam ɗaŋŋi ana, «An li va ma co ka eg gaɗ mayra vi suu Juifnaɗi, li va co ka eg Ziŋ Lonaraɗi lay, ka eg Sesar naɗi lay.»

⁹ Festus a li tam jivira ii suu Juifna ni nam joɓ Pol ana, «Aŋ min tuɗ Yerusalem an kaaŋ ɓak maŋŋa ki kay boy namma su?»

¹⁰ Pol hoŋ dira ana, «An coli hu li ma kaɓakŋa fok Sesar, ni li ma ii boy manna gi ki huna. An li va ma co ka eg suu Juifnaɗi, aŋ u taŋga lay ni wi boy namma lay.

¹¹ Lini an li va ma co ndaki kay miɗna ni an ka hin di ana an ka miɗɗira ɗi. Lini sek masira boy ma gasi ka huɗi, sa hin ka ɦan ki masiɗi lay. An tuɗ ni fok Sesar.»

¹² Festus ɓak u suu mam suu ŋgolona ɓakŋi, ŋgoo dagan nam hoŋom dira anaba, «Aŋ yi Sesar ni, aŋ hin tuɗni fok Sesar.»

Pol fok Agripa u Berenis

¹³ Li buuna ŋgoo dagan ca ni mul ŋgolna Agripa u Berenis mba Sesare a gi deɓ Festus.

¹⁴ Asi li buuna eg Festus ŋgolo, ni nam dasi kay boy ma vi Polna. Nam dam anaba, «San dew Feliks hinim ka hu daŋgayna tani.

¹⁵ Falira an ay Yerusalemba, muli suu li ɓivunna u suu ŋgolo suu Juifna sek kam fokonu, asi dan ana kaam ɓakŋa kamu.

¹⁶ An hoŋosi dira ana, suu Romma ka ɦal sa ki na zak maŋ suu sek kamma na bay ɓak dlaasira fun tasiɗi, nam ndak a puruɗ tam ki ko boy ma asi mbaaramma kamma lay.

¹⁷ Asi hin mbay un tani may an mba juɓ kaɗi. Vin maɗiira ni an mba kal hu li ma kaɓakŋa gaw, an ana asi yan sa namma aya.

¹⁸ Suu sekemma mbay mba daŋŋi, u saa manda ni asi ɓak boy ma co saɓaki kam kaɗi lay.

¹⁹ Boy masina u namma ni kay ciwayra duk tasi kay viisira, ana sa ma ka yam ana Yesuna ki miɗiya, Pol di ana nam ka iiriya.

²⁰ An wi u dlara ana an di kay boy namma na kaɗi, ni kay ndaɗta an joɓ Pol ana nam min a tuɗ Yerusalem, asi kaam ii ɓak mamma ko ndaɗta na su?

²¹ Pol joɓ ana hinim hu daŋgayna na ta mul ŋgolna mba saa kay boy namma nam tuwa. An dasi ana asi hinim na ta an hin sunum ha mul ŋgolna tuwa.»

²² Agripa di Festus ana, «An min hum boyna vi sa namma u tanda.» Festus hin hoŋom dira ana, «Vini aŋ hin humumu.»

²³ Vin maɗiira ni Agripa u Berenis mba kalafi hu li ma kaɓakŋa u suuna usi ŋgolo a tinisi a muli suu ŋgolonara. Festus ɦal voɗta ana mbaa Pol aya.

²⁴ Festus di ana, «Mul ŋgolna Agripa u agi suu ka toki tani u amina halaŋ, gologi sana njeni kay boy ma suu Juifna tok ay mba sekem fokon tani, ay Yerusalem lay, tani lay, suu asina sawalla ana cam ki ciya.

²⁵ U min manda ni nam li dlara ndak ka a ci ki ci gawɗi, kay ndaɗta nam u tamba min a tuɗ fok mul ŋgolna, an may ni min a sunum ha may.

²⁶ An fi boy ma ɓiirim ha maŋ mul ŋgolna kamma kaɗi. Kay ndaɗta an mbaaram fokogi ni na, saɓaki ni fokoŋ aŋ mulna Agripa, aŋ joɓom wa ni aŋ hin fi va ma ɓiirimma.

²⁷ Irin anu, a sun sa ma daŋgayna bay ɓiirim boy ma sekem kamma ki jiviya ni ka u voɗombi.»