SUNDA 24 - Boy Lonana

Suu Juifna sek Pol fok mul ŋgolna

¹ Li buuna ŋgoo dagan vadl mul ŋgol ma ɓivunna, Ana nias mba Sesare u suu ŋgolona umu, u sa ma di ki mbak mbakŋa dew, yam ana Tertullus. Asi mba sek masira fok mul ŋgolna, Feliks, kay Pol.

² Asi yi Pol ay yi ɗaŋŋi Tertullus gijaŋ ɓakŋa ɗaŋ ana, «Sa ŋgolna ni u jivi maŋga ami ka laki u heɓpa gasira, u nera vi mul maŋga, aŋ li tlena jivi halaŋ ndaki kay suuna.

³ Kay tlesuu ami fasina halaŋ hu lina aragelay ni ami gaŋ deɓ ŋgolo.

⁴ An ka ɓeŋeŋ faɗta ki ŋgolɗi, ni an min ana aŋ humumi boy mamina na ew.

⁵ Ami wi ana sana wanni sa ŋgol ma dlam ki saɓaki co ɦayna, nam mba dlara duk suu Juifna suu hu ndaŋgara halaŋ, nam ɓeŋesi ki ni namu, nammi mulna fok suu Nazaretna.

⁶ Nam hal a ɓeŋ teteɗta vi Ziŋ Lonara ŋgola ki lay, ni ami vamu. [Ami min gin a kaam ɓak mamma u gaɗ mamira,

⁷ na may sa ma ŋgol asgaana Lisiyas ɓaɗamina ay ki komi ni u saɓakŋa.

⁸ Ŋgoo daganni nam Lisiyas ana suu sek kamma mbay fokoŋ tani.] Aŋ joɓom wa ni aŋ hin wi ana boy ma ami damma kamma ni gasira.»

⁹ Suu Juifna taɓ vunusi u namu ana dla ndaɗta ni na daŋ may.

Pol di ki kay dlaamba fok Feliks

¹⁰ Mul ŋgolna maɗ kom ana Pol di ay ɗaŋ, Pol gijaŋ boyna ɗaŋ. «Aŋ li basara ŋgolo a sa ma kaɓakŋa tani, ni an hurun vi a ɓak boy manna fokoŋu.

¹¹ Aŋ hin halam ummi aŋu, an mbay Yerusalem a cen Lona ni buuna ka bay su kay doogo yam mba' tuwa.

¹² Sa fan ay ka a ɓak boy ha sa hu Ziŋ Lonaraɗi lay, fan ka coli duk suuna kolo hu Zira Tokkaɗi lay, ɗowba hu ɦoŋzinaɗi lay.

¹³ Suu asina ndak ka a di ki kay dla mayra asi mba seken kaɗ koyniraɗi lay.

¹⁴ Ni an wi ki kan fokoŋ tani anaba, an sunni Lona vi somoyomi ma jewna u voɗta wilira, ta asi di kaɗ ana ka u voɗoɗɗira. An vi u boy ma ɓiiri hu magaara gaɗta halaŋ u suu jok vun Lonna lay.

¹⁵ An hurun tini kay Lona ko asi tasira tini kamba na may, kay colla kolo iirira vi suu ɗegeena u suu ka ɗegeeɗina.

¹⁶ Ni kay ndaɗta an so tan baba ana an hurun li jivi fok Lona jivi fok suuna lay.

¹⁷ «An li basara ŋgolo bay mbay hu Yerusalem, ni an mbay a njun u suu manna u gorsenna, a li ɓivunna maŋ Lona may.

¹⁸ Na ɗaŋŋi va ma asi fan an lam hu Ziŋ Lonara ni mege? An ay ni duk tokka a dan tara ki jivi teteɗta. Suuna ay ka un hu bolowɗi lay, ni boy ma dadam ay kaɗi lay.

¹⁹ Suu Juif suu hu ndaŋgara Azira suu ɦiw ay huwa, li ginni boy funusiya ni suu asina a li gin fokon a seken ni asiya.

²⁰ An ay fok suu ŋgolo suu kaɓakŋa ni asi suu ca wanna ni va ma asi fam ay egen ana an lam cona ni mege?

²¹ Va ma an dam ay fokosi eŋ ŋgolna ni kay an vi u paɗta kolo iirira vi suu miɗina, ni an ka hu ɓakŋa fokogi karami kay boy namma.»

²² Feliks boy namma ki irim jew jiviya, ni nam ana asi tuɗa, sa ma ŋgol asgaana Lisiyas hin mba wa ni, an hin kaagi ii ɓak magina tuwa.

²³ Nam ɦal voɗta maŋ sa ma fok suu asgaana ana nam gol Pol hu daŋgayna jiviya, hinim voɗta buɗi a nam ŋgaf u suu banayamma u suu somo mamba asi mba ŋgaf u namu.

Pol fok Feliks u Drusiye

²⁴ Li buuna ŋgoo dagan ca ni Feliks mba u caamba Drusiye, ndaɗ ni goora Juiffa. Nam gi sunda kay Pol a nam min hum u boy ma nam dam kay vira u Kristu Yesuna.

²⁵ Pol gijaŋ boyna a ɓak kay a sana kak iiri ɗegeera, kay doora doo tara, kay ɓakŋa vi Lona ma hin mbana. Feliks tam mbuɗ ndaana, nam di ana, «Aŋ tuɗ cecemi vaŋ tuwa, buu ma daŋŋa an hin yaŋ ay tu olo.»

²⁶ Nam saa ana Pol hin ɦam gursu kala, ni kay ndaɗta nam yi Pol ay egem tew tew ni na.

²⁷ Li basara mba' ŋgoo dagan Porsiyus Festus varak balam Feliks a mulna. Feliks min a li tam jivi ii suu Juifna, ni nam hin Pol hu daŋgayna.