SUNDA 22 - Boy Lonana

¹ «Gorsenna u somoyonu, humugi boy manna an dam ka cecemma.»

² Asi hum ana nam ka ɓakasi boyna u vun Arameenna ni seŋ vunna na selewen.

³ «Anni sa ma Juifna hu Tars ta Silisira, an wulni kaŋga hu Yerusalem tani, sa ma haɗan a wi gaɗta vi somoyoygira ki jivina ni Gamaliyel. Tan ay feɗ coco a sun Lona ma agi ka um cecem wanna.

⁴ Suu vi u voɗta vi Bu Suunara an casi ki maɗna lay, an yow suu njufina u boyogina lay cukusi daŋgayna.

⁵ Mul ŋgol ma ɓivunna u suu ŋgolona ndak a di kay boy namma ana an di ni gasira, an vi magaara ay kosi a nda yow gorseygi suu Juif suu ha hu Damas suu vina, a mbaarasi ay hu Yerusalem a cukusi daŋgayna.»

Pol di ki kay boy mamma nam mbuɗ a sa vinana

⁶ «An ka hu voɗta hin tok a tew Damassa may ni vana col ay kolo duk lona mba weleɗ kan na wilik, li na ni faɗta col duk gayra faali ŋgolla.

⁷ An ndi kaŋga hum della dan ay ana, Sol, Sol, aŋ lasan na ni kay mege?

⁸ An joɓom ana, Ni aŋ gege, Bu Suuna? Nam di ana, Ni an Yesu ma Nazaretna ma aŋ lasanna.

⁹ Suu ay unna wi va ma weleɗ kiɗikŋa u irisiya, hum del mayra danda kaɗi kama.

¹⁰ An joɓom ana, An li ni nana ɗaŋge Bu Suuna? Bu Suuna dan ana, Col kolo tuɗ hu Damas, va ma Lona min ana aŋ lamuna asi hin nda daŋŋa haa.

¹¹ An irin dug ki gaw ko weleɗ kiɗikka, ndarayan suu unna taɗan kon ha ni asiya, kay a tuɗumi Damassa.

¹² «Sa maa dew sem ana Ana nias, nammi sa ma ɗilina, vi u gaɗ maygira, suu Juifna, suu hu Damasna, halaŋ minimu.

¹³ Nam mba fanu mba col egen na tok dan ana, Wayanna Sol, iriŋ mal kiyo! Hu li namma na ni irin mal kiyo, an mbuɗ wiya.

¹⁴ Nam di ana, Lona vi somoyomi manaŋ ki fok jew a aŋ wam min mamba, a aŋ wi ma Ɗegeena, aŋ hum nam daŋ ay ni u vunum gaw.

¹⁵ A aŋ li ni a sa ma diki kam fok suuna, va ma aŋ humumma, wam u iriŋ layna.

¹⁶ Cecemi aŋ juɓmi me ologe, col kolo mbus ki batemma, a cooŋga mbus ki u yira yam semba.»

Pol di ki kay sunummi eg njaf suu ka suu Juifnaɗina

¹⁷ «An hoŋ ha Yerusalem hoŋŋi tuɗ a cen Lona hu Ziŋ Lonara ni vana tak tam irinu.

¹⁸ An wi Bu Suuna nam dan ana, Hin Yerusalem ɓaɗ zak kay suu ɦoŋzi nammana ka vi boy ma aŋ dasina kannaɗi.

¹⁹ An hoŋom dira ana Bu Suuna asi wi ana an yow suu vi uŋŋa hu Zira Tokka tew tew cukusi daŋgayna, poŋosi lay.

²⁰ Falira asi ci Etiyen sa ma diki kaŋŋa ni an ka dukusiya, an vi vun tan u suu camma golosi barawi masina ni an lay.

²¹ Bu Suuna dan ana, Tuɗa, an min sunuŋ hu li ma dayna eg suu ka njaf suu Juifnaɗina.»

Pol fok sa ma ŋgol asgaana vi suu Romma

²² Suu molina hum boy ma Pol damma hummi, hurusi ɓeŋ kay boy ma nam dam namma. Asi gijaŋ sawalla ana, «Hin sa namma dukumi tani na wanɗi, cami ciya! Nam ka a kak iiri oloɗi!»

²³ Asi tum soora ŋguk ŋguk, kisik baraw masina may, cuk ndaŋgara kolo may.

²⁴ Sa ma ŋgol asgaa ma Romma di ana asi kal Pol ha vo hu zira ŋgolla suu asgaana buu hura a cam waɗta, kay nam di u va ma suuna lam hawra, tum soora kam ŋguk ŋgukŋa kiyo.

²⁵ Asi ɗagam ɗagŋi gam jaŋŋa a waɗamba may ni, Pol di sa asgaana ana, «Agi ndak waɗ sa ma Romma bay sariya mamba ɓak ki su?»

²⁶ Sa ma asgaana hum na ni tuɗ di ma ŋgolna ana, «Aŋ hin li sa ma wanna ni ana mege? Sana wanni sa ma Romma.»

²⁷ Sa ma ŋgol asgaana mba eg Pol joɓom ana, «Aŋŋi sa ma Romma su?» Pol ana, «Haa.»

²⁸ Sa ma ŋgol asgaana di ana, «An warak gursura ŋgol coco a mbuɗ tan ki sa ma Romma.» Pol ana, «An vuɗ hu ni ta vuɗiya.»

²⁹ Suu tuɗ a waɗam ginna ɦuɗ tasi ki egem day, sa ma ŋgol asgaana u tamba lay ni mbuɗ ndaana kay njunda nam njunum ay u galina layra.

Pol fok suu ŋgolo suu kaɓakŋa

³⁰ Sa ma ŋgol asgaana min a wi u boy ma suu Juifna vi Pol kamma kiyo. Ni kay ndaɗta vin maɗiira ni nam buɗum galina ki semu, tok muli suu li ɓivunna u suu ŋgolo suu kaɓakŋa egemu. Hin yi Pol ay yi ɗaŋŋi colom fokosiya.