SUNDA 21 - Boy Lonana

Pol kal Yerusalem

¹ Ŋgoo dagan ami garak u asi garakŋi, tuɗumi u lum kawina hu Kos gaw. Vin maɗiira ni ami cukumi Rod, yowomi yow ni cukumi hu Patara.

² Hu li namma ami fami lum kawi ma tuɗ Fenisina. Ami fulumi fulni tuɗumiya.

³ Ami mbaami tok eg Sipre, ni sa ndak a wi lum kawina haa, ami tlami u daara ii dali a tuɗ Siri. Ami tuɗumi hu Tir, ni hu li ma asi a cuk tlesuu ay hu lum kawina ki kaŋgana.

⁴ Hu li namma ni ami fi suu vina, ami kak varasi buu kiɗisiya. Asi di Pol u Musuk Lonara ana nam tuɗ Yerusalembi.

⁵ Hu daɓpa vi buu ma kiɗisiya ma ami lam u asina ni, ami jak fok gak gak tuɗ koy mamira. Asi halaŋ tuɗ a tinimira, boyogina lay, gorkemba lay, gak gak tinimi ha ki doŋ kaana. Ami goɓomi kaŋga u vun givimi halaŋ doŋ lumma cenemi Lona.

⁶ Ami gami deɓ tami si si ni ami fulumi hu lum kawina, asi hoŋ voo masira may.

⁷ Ami daɓami koy mamira hu lummara ni tuɗumi Tir hin jokomi Tolemi, hu li namma ni ami gami deɓ gorsemina, ami lakami egesi buuna dew.

⁸ Vin maɗii ni ami tuɗumi Sesare. Hu li namma ni ami cukumi vi Filip ma da Boy ma Ayra, ami buurumi varamu. Nammi sa ma ay duk suu manasi ay Yerusalem kiɗisiyana.

⁹ Goryom gor tamagina fiɗi bay ɗuma, asi ni suu jok vun Lonna.

¹⁰ Hu li namma ami lami buuna hu ŋgolo, sa ma jok vun Lona ay Yude, sem ana Agabus, mba fami may.

¹¹ Nam mba egemi kalani yow gandi ma vi Polna njun sem may kom may u namu, di ana gola ni va ma Musuk Lonara damma. «Mala gandina suu Juifna hin njunum ha Yerusalemmi na. Ŋgoo dagan asi hin ɦam ki maŋ suu ka njaf suu Juifnaɗina.»

¹² Ŋgoo dagan ami u suu Sesarena hum boy namma na ni cenemi Pol ana nam tuɗ Yerusalembi.

¹³ Nam hoŋomi dira ana, «Agi tiirigi ni kay mege, agi hal a mbuɗun maŋi su? An tan mini ni kay njunda ɦawa holɗi, a miɗ kay sem Bu Suuna Yesu hu Yerusalem lay.»

¹⁴ Boy mamina ndak ka a mbuɗum hurumbi ni, ami hinim tani di ana, «Ko minda vi Bu Suuna liya.»

¹⁵ Ami li buuna hu li namma goy ca ni hin minimi tami a tuɗumi Yerusalem.

¹⁶ Suu haɗi suu ay Sesarena tuɗ tinimiya, tuɗumi vi sa ma dew sem ana Manason, nammi sa ma Siprena vi hu Boy Lonana day day.

Pol tuɗ a gol Jak

¹⁷ Ami mbaami Yerusalem mba ni gorsemina ŋgafami u furira cocoo.

¹⁸ Vin maɗiira ni Pol tuɗ u ami vi Jak, varammi suu ŋgolona tok tasi ni huwa.

¹⁹ Pol gasi deɓpa si si ni vasi u boy ma Lona li sunda ay u nam duk njaf suu Juifnaɗina ki dew dew halaŋ.

²⁰ Asi humum boy mamma hummi geleɗ Lona. Ŋgoo dagan asi di boy ma ana, «Aŋ gola wayamisina duk suu Juif suu vina ni bup bup gage? Asi halaŋŋi vi u gaɗta cocoo.

²¹ Asi hum ana aŋ ka haɗ suu Juif suu duk njaf suu daŋŋa halaŋ ana asi hin gaɗta vi Moizza kiyo, caw ɗiw goryosi oloɗi, li u dlara vi suu Juifna oloɗi lay.

²² Ni ana mege? Asi hin hum ana aŋ mba wa.

²³ Aŋ hum u va ma ami daŋŋana, suu ka tani fiɗi yi tlena ki kasiya.

²⁴ Aŋ dlaɓ u asi dlaɓmi danagi tagi ki jivi teteɗ, aŋ warak va ma asi basamma kiyo, a asi hin wel yasi kira may. Aŋ li wa na ni suuna halaŋ hin wi ana boy ma asi humum kaŋŋa ka gasiɗi, kay aŋ taŋga lay ni ka hum u gaɗta vi Moizza.

²⁵ Lini kay njaf suu vina ka njaf suu Juifnaɗina, ami ɓiirisi magaara ha kay boy ma ami saa kamma ana kom tliw ma li ɓivunna maŋ fulina u nammaɗi, ci busunaɗi, kom tliw tlesuu muruɗina ɗi lay, doo tasi kay boy zoŋga.»

²⁶ Vin maɗiira ni Pol yow suu fiɗi asina um yowni tuɗ a dan tasi ki jivi teteɗta. Nam kal hu Ziŋ Lonara kalni dasi ana buu ma dan tara ki jivi teteɗna daɓmi saɓage, ni di ana a li ɓivunna ki kasi dew dew halaŋŋi saɓage?

Suuna vi Pol hu Ziŋ Lonara

²⁷ Buu ma kiɗisiyana a daɓa may ni suu Juif suu hu ndaŋgara Azira wi Pol hu Ziŋ Lonara, asi tum huu suuna kolo halaŋ halaŋ vammi na gaw.

²⁸ Sawalla ana, «Suu Israelna njunumiya, gola ni sa ma ka di boyna ki wet wet a ŋgul suu Israelna, ŋgul gaɗta vi Moizza, ŋgul Ziŋ Lonara lay. Cecemi nam yow suu Grekŋa ay um hu Ziŋ Lonara, mbuɗ li ma teteɗna ki njenjee.»

²⁹ Asi di boy namma na ni kay asi wi Trofim ma Efesna um hu ɦoŋzina. Asi saa ana Pol li ka tuɗum ha um hu Ziŋ Lonara.

³⁰ Vun ma ɦayam ɦayamma njay ha ki ɦoŋzina na wet wet, suuna mbay liŋŋa tani may, tani may. Asi vi Pol vini taɗam ha ki ŋgoo Ziŋ Lonara, dug vun zira kolo na gaw.

³¹ Asi hal a ci Pol kiyo. Suu hu Yerusalemma tum ay kolo bel bel. Sa ma ŋgolna vi asgaa suu Romma hu Yerusalem hum ana suu Yerusalem halaŋ tum ay koloo bel bel,

³² nam yow asgaa suu ŋgolona u suu gorina um yowni yow liŋŋa zak duk suuna. Asi wi ana sa ma ŋgol asgaana u suu mamma um mba wa ni asi hin cira ci Polla gaw.

³³ Sa ma ŋgol asgaana mba eg Pol kalani vamu, dasi ana ɗagam u galina mba', hin joɓom ana nammi gege? Nam li mege?

³⁴ Duk suuna wanni suuna di va ma daŋŋi, suu hiŋŋa di ni zeɗ may, sa ma ŋgol asgaana ka ndak a hum u boyna ki gasi duk suuna ko suuna dam dambaɗi, nam di ana asi tuɗ Pol hu zira ŋgolla suu asgaana buu hura.

³⁵ Tew ha tok fun zira a ɗuŋ ha kolora may ni, suu asgaana tlam ki kolo ko suuna li dla cora ɦayra.

³⁶ Suuna ha mokira umma zomolok ana, «Cam ki ciya! Cam ki ciya!»

Pol di boyna fok suu ŋgolona

³⁷ Asi mba Pol mba ni tuɗum hu zira ŋgolla suu asgaana buu hura, nam joɓ ŋgol asgaana ana, «Voɗta ka kay an di va nde su?» Sa ma ŋgol asgaana joɓom ana, «Aŋ hum vun Grekŋa su?

³⁸ Aŋŋi sa ma Egipte ma col honira yow suu duuna ha ŋgoo bagi bup bup fiɗi cecem wandanaɗi su?»

³⁹ Pol hoŋom dira ana, «Anni sa ma Juifna vuɗni hu Tars ta Silisira, ni hu ɦoŋzi ma ŋgolna, an joɓoŋu hinin voɗta an min ɓak suuna.»

⁴⁰ Sa ma ŋgol asgaana hinim voɗta. Ta ɗaŋŋi Pol col kolo kay vun zira mbuyra ko kom ana suuna seŋŋa. Vunna seŋ selewen ɗaŋŋi, Pol gijaŋ ɓakasi boyna u vun Arameenna.