SUNDA 20 - Boy Lonana

Pol tuɗ koyra hu Masedoin u Gres

¹ Vunna heɓ kaŋga heɓmi, Pol tok suu vina egem a soosi hurusiya, nam gasi deɓpa si ni garak u asi tuɗ Masedoin gaw.

² Nam jak ha ki fok hu li namma jakŋi tuɗ so huu suu vina dasi boyna ŋgol cocoo. Nam jak fok hu Gres olo.

³ Nam li tilna hindi hu li namma. Nam saa a ful hu lum kawina tuɗ Siri, doli hu li namma nam hum ana suu Juifna tok vunusi kam a lam honira. Nam ana jivira ni nam hoŋ Masedoin.

⁴ Sopater ma goŋ Pirhusna, nammi sa ma Berena tuɗ a tinimu, u Aristark u Sekundus asi ni suu Tesalonikŋa, Gayus ma Derbena, u Timote, Tisik u Trofim, ni suu hu ndaŋgara Azina.

⁵ Asi halaŋŋi tuɗ ha foko, ami juɓ ka Troas tu may.

⁶ Ami tamira fulumi hu lum kawina tuɗumi Filipi, ni ŋgoo luu ma fu ma bay kuffa dukumma. Ami li buuna ŋgoo dagan vadl tuɗ ŋgafasi hu Troas, hu li namma ami li buuna hu kiɗisiya.

Pol mba gol suu Troasna a fafatɗa

⁷ Vin maɗii damassa a tira ni asi a tok fiɗigi a ti funa vi Bu Suuna, Pol di boyna maŋ suuna hu tokka. Vin maɗii nam a tuɗ kira may ni, nam ɓak boyna gak gak duk ŋgikka.

⁸ Hu zira ami toki hura wanni lamba oy cocoo, ni hu zi mayra kolo kay ndaraɗta.

⁹ Goozoŋŋa dew sem ana Eutike ay kaki hu ii zira. Hu li ma Pol ɓak boyna fiyekka na ni nam buu senna. Na ni nam ka wi tam oloɗi, ndi ay ki kaŋgaa, nam ay ni hu zi mayra kolo kay ndaraɗta a hindira. Asi tlam kolo na ni nam ki miɗiya.

¹⁰ Pol ɗiŋ ay ki kaŋga, goɓ kam tlam kom na ni dasi ana, «Lagi ndaaɗi, nam iiriya.»

¹¹ Nam hoŋ ɗiŋ kolo ɗiŋŋi, ɓorowosi funa vi Bu Suuna, asi tamu. Ŋgoo dagan nam ɓak boyna coco olo, gak gak faɗta hol ki koloo, nam hin hinisi tuɗa.

¹² Asi mbay kiyo ni fi goona ki garaŋ wan, boy namma hal eŋga maŋ suuna cocoo.

Pol col ha Troas i Milet

¹³ Ami tuɗumi ha ki fok u lum kawina hu Assos, hu li nama ami hin tli Pol ha fun lumma. U saa mamba nam min a tli ni hu voɗta.

¹⁴ Nam ŋgafami hu Assos ŋgafni, ami tlam umi hu doŋ lumma tani tuɗumi hu Mitilen.

¹⁵ Hu li namma ni ami yowomi yow ni tuɗumi kay daara Siyo. Buu ma ŋgoo daganna ni ami cukumi Samos, dagan olo ni ami cukumi ki kaŋga doŋ lumma Milet.

¹⁶ Pol saa ha ana nam jak hu Efes ni ka kak kaŋga huɗi, kay nam ka a kal faɗta ki hu ndaŋgara Azira oloɗi, nam min ɓaɗ zak zak a tuɗ Yerusalem hu buu ma luu ma Pantekotna.

Pol di boyna maŋ suu ŋgolo suu hu Efesna

¹⁷ Pol hu Milet wanni gi sunda ha kay suu ŋgolo suu vi Kristuna hu Efes ana asi mbay egemu.

¹⁸ Asi mba egem mba ni nam dasi ana, «Agi wan poy manda an kaa day poy u agi tew tewra halaŋ. Ay hu buu ma gijaŋŋa ay jewna an mba dukugi hu ndaŋgara Azira tanira.

¹⁹ An sun Bu Suuna ay u ɗigilla, u simina irinu, an tuɗ fok u wihawra na gak gak ko suu Juifna tok vunusi kanda.

²⁰ Agi lay wi ana vama a li kaki jiviya ma an ŋgayam ki kaɗi. An dagi boyna ki halaŋ haɗagina ki ni duk suuna lay halaŋ ki hu ziigi vo lay.

²¹ An yi suu Juifna u njaf suu daŋŋa asi jok iiri masira ki zeɗ mbuɗ irisi eg Lona tin hurusi kay Bu Suuna mayna Yesu.

²² Cecemi an tuɗ Yerusalem kay Musuk Lonara ka ɦeɓen ana an tuɗa, va ma ndaɗ hin li egenna an ka wambi.

²³ Va ma an wamma hol ni ana, ɦoŋzi ma an kal huna tew tew ni Musuk Lonara ka dan lay, takan ana daŋgayna u wihawra ka juɓunu.

²⁴ Ni iiri manda an ka ŋgaaɗ a vama kay tanɗi, ni an tuɗ fok u ayra gak gak a daɓ voɗta u vun sun manda, ta Bu Suuna Yesu ɦandara kay a di ki kay Boy ma Ayra u oora vi Lona.

²⁵ «An tuɗ tew tew dukugi a di kay Mul Lonara, cecemi dukugi ni sa ka a hin wan irin oloɗi.

²⁶ Ni kay ndaɗta an dagi ki karam wanni, lini sa ma dukugi ba tam ki wa ndolon ka oloɗi.

²⁷ An dagi dlara Lona ŋgaaɗta ki wa, ŋgay va ka huna ewɗi.

²⁸ Gologi tagi jiviya, gol timigii suu Musuk Lonara ɦagisina kogi ana agi golosina jiviya. Gologi suu vi Kristuna vi Lona jiviya, suu nam vuɗusi u miɗna vi Goromma.

²⁹ An wi ana hin ka ŋgoron dagan wanni an tuɗ ki wa suu ko bosoko ma saɓakŋa nana hin mba cuk dukugiya, asi hin ka hin suu vinaɗi.

³⁰ Dukugi tagira lay ni suu ɦiw hin yow kolo a ka boyna, hin viɗ yam suu vina ki usiya.

³¹ Humugi gagi kay basara hindi an laɗ u agira, faali lay, njeŋge lay an dagi ki kagi dew dew halaŋ u simina irinu.

³² «Cecemmi an hinigi ko Lona u boy mam ma oora. Nam ndaki kay a njunugiya, a ɦagi jivira nam ŋgaaɗ kay suu mamsina ko jona na, ni kay suu mbuɗi teteɗna halaŋ.

³³ An hal gursura doonora u lorra ay ka ko saɗi, baraw ma cuk tanɗi lay.

³⁴ Agi wi u irigi lay ana an li sunda ni u kon tanda, kay fi tlesuu njun u suu manna an tanda lay.

³⁵ An takagi ki halaŋ halaŋ ana li sunda, kay a njun u suu hawra, saaragi kay boy ma vi Bu Suuna Yesu u tamba damma, jivira ka ŋgol suwa kay sa ma ɦal vama kina, su ma fina.»

³⁶ Pol daɓ ɓak mamma daɓmi, asi halaŋ goɓ kaŋga u vun givisi cen Lona.

³⁷ Asi halaŋ mboɗ Pol hurusi u tiina kay a tinim voɗta.

³⁸ Asi yoo saɓaki ni kay nam di ana sa ka wam irim oloɗira. Asi hin tinim ha ki hu li ma lum kawina day.