SUNDA 19 - Boy Lonana

Pol hu Efes

¹ Hu buu ma Apollos ka hu Korint ni Pol tuɗ hu ndaŋgara kolora, tew hu Efes. Nam jak ay ni fi suu haɗina huwa.

² Nam joɓosi ana, «Agi vagi hu Boy Lonana na ni, fagi Musuk Lonara su?» Asi ana, «Ami bay hum boy kay Musuk Lonara tuwa.»

³ Nam Pol hin joɓosi ana, «Mbusugi ni u batem manage?» Asi hoŋom dira ana, «Mbusumi ni u batem Jaŋŋa.»

⁴ Pol dasi ana, «Jaŋ mbus batemma ni maŋ suu jok hurusi ki zeɗna, nam di suu Israelna ana tin hurusi kay sa ma ka mbay ŋgorom daganna, ni di ana Yesu.»

⁵ Asi hum boy namma na ni vi kasi ana mbususi batemma kay sem Bu Suuna Yesu.

⁶ Pol baa kom kasi na ni Musuk Lonara mba kasi gaw, asi gijaŋ ɓak boyna u vun ma daŋŋa daŋŋa, di ki kay dlara Lona ɦasira lay.

⁷ Suu asina ay halaŋi doogo yam mba'.

⁸ Pol haɗ suuna hu Zira Tokka, li tilna hindi u asi dasi boyna u ɦiŋga. Nam di boyna kay Mul Lonara, mal hu suu humum boy mamma kiyo.

⁹ Suu daŋŋa dukusi ɦiw ni min vi boy nammaɗi, duk suu tokina ni asi ŋgul voɗta vi Bu Suuna. Pol hinisi yi suu haɗina umu, haɗasi boyna hu buuna tew tew hu zira haɗta vi Tiranussa.

¹⁰ Nam li basara mba' u dla ndaɗta, kay ndaɗta suu kaki hu ndaŋgara Azira halaŋ, suu Juifna u njaf suu daŋŋa hum boyna vi Bu Suuna.

Dlara li u goryoŋ Skevena

¹¹ Lona li dlara mbuɗ mbuɗta ŋgol u Pol.

¹² Baraw ma ay cuki ta Polna u baraw mamba va zamalla asi yowosi ay mba ŋgenesi eg suu tuguɗira. Tuguɗira hinisiya asi mbuɗ ki jiviya, fulina kal ki hu suuna.

¹³ Suu Juif suu poy a gol suu tuguɗira dik fuli suu cona ki kay suu tuguɗira, a dikisi ki kay suunara ni asi ana, «An gaɗagi a kal ki hurumu ni u sem Yesu ma Pol di kamma.»

¹⁴ Suu li boy nammana ni goryoŋ mul ŋgol ma li ɓivunna, asi kiɗisiya. Sem busi ana Skeve.

¹⁵ Ful ma cona hoŋosi dira ana, «An wi Yesu, Pol an wam lay, agi ni suurage?»

¹⁶ Sa ma ful ma cora kamma ndi liŋŋa bowosi kaŋga fokom halaŋ, kay nam saɓak suusiya. Nam lasasiya, asi yow liŋŋa cuki hinim ziimma ni tasi siliya, fi mbilna egesi coco lay.

¹⁷ Suu hu ndaŋgara Efesna halaŋ suu Juifna u njaf suu daŋŋa tasi mbuɗ ndaana halaŋ. Suuna halaŋ mbuɗ ŋga ni Bu Suuna Yesu.

¹⁸ Suu vina cocoo di ki kay dlaasira asi laɗta duk suuna u vunusiya.

¹⁹ Suu kumuna kosina ay bolowo, yow magaa masira ŋgalaɗ ki fok suuna halaŋ. Asi ndum magaa masi ndaɗta. Asi faɗ gusuɗ ii gursu doonora bup bup dok vadl.

²⁰ Ni boyna vi Bu Suuna njay ki u saɓakŋa cocora ni na.

Honira hu Efessa

²¹ Ŋgoo dla ndaɗta dagan wanni Pol tin hurum a tuɗ Masedoin, jak ha Akay kay a tuɗ Yerusalem. Nam di ana, «An col a tuɗa wanni an min wi Rom ki u irin lay.»

²² Nam sun suu njunum hu sunda ha fokom mba', Timote u Erast, nam hin ka dagan a jok hu ndaŋgara Azira tuwa.

²³ Hu fali ndaɗta ni honira ŋgola col kolo kay voɗta vi Bu Suuna.

²⁴ Sa ma yoo walakka dew sem ana Demetrius, nam yoo goo zira fi lo tamara, Artemis, u doonora. Ko nam fi begena ŋgolo u suu sunda umba lay.

²⁵ Nam tok suuna u ndarayam suu umma egemu dasi ana, «Gorna agi wi ana, aygi faygi begena u sun ndaɗta.

²⁶ Agi wi u irigi lay hum u humugi lay, dlara sa ma yam ana Polna laɗta. Nam di ana lo ma suuna lam u kosina ni ka loɗi, nam mbuɗ huu suuna a vi ki umba cocoo, ni ka hu Efes tani holɗi, kini kay yam ndaŋgara hu Azira halaŋ.

²⁷ Dlara ndaɗta ni ka ɓalakaygi ni sun maygira holɗi, a bulum kini zira ŋgola vi looygina Artemis. Ŋgolla vi looygina lay ka oloɗi, looygi ndaɗta suu hu ndaŋgara Azina u suu kay yam mbassa halaŋŋa vi uɗ halaŋ halaŋ.»

²⁸ Suu hum boy namma halaŋŋi, hurusi ɓeŋ ki ni na gaw. Gijaŋ sawalla kolo ana, «Artemis ta ŋgolla vi suu Efesna.»

²⁹ Ҥoŋzi ma ŋgol namma halaŋŋi vunna njay ha ki hu ni na bel bel. Suuna yow Gayus u Aristark taɗasi usi hu li ma tokka ma ŋgolna kay asi mba' ni suu tuɗ u Pol hu koy mamba. Suuna tok tasi ay ŋgolla na ndul ndul ki kasiya.

³⁰ Pol min a tuɗ ha duk suu molina ni asi suu vina dooromu.

³¹ Suu ŋgolo suu kay ndaŋgara Azina, suu banayamma gi sunda ha egem ana nam tuɗ duk suuna hu tokkaɗi.

³² Hu tok ndaɗta wanni suuna ki viɗi cocoo, suu ɦiw sawalla kolo kay boyna, ndarayasina hin di ni zeɗ gaw may, suu daŋŋa dukusi ni ka wi boy ma asi tok kammaɗi.

³³ Suu duk suu tokina di boy namma maŋ Aleksandre, ni suu Juifna colom fokosiya. Nam Aleksandre ko kom daŋŋa ana nam min suuna seŋŋa, nam di boyna, kay a vasi kini u dlara.

³⁴ Hu li ma suuna wi ana nammi sa ma Juifna ni tum soora halaŋ halaŋ fun tasi dew, gak gak kal lina ki na ɦayaŋ ana, «Artemis ta ŋgolla vi suu Efesna!»

³⁵ Sa ŋgol ma ɦoŋzina ma ɓiirisi dlaasirana seŋ suuna di ana, «Agi suu Efesna suuna hu ndaŋgara halaŋ wi ana ɦoŋzi ma Efesna ni li ma ŋgolna vi zira vi Artemis ta ŋgolla ni tani. Va ma tli tam ko ndaɗ nana ndi ay kaŋga col ay ni kolo huulona day.

³⁶ Sa ma tin vunum kaɗ kaɗi. Agi seŋegi vunna, lagi va ma bay saara naɗi.

³⁷ Suu agi yowosi ay ca ni ɓeŋ zira ŋgolla kaɗi, di va ma co ka kay looygiraɗi lay.

³⁸ Lini boy ma vi Demetrius u ndarayamma ka kay sa mari ni, suu ŋgolona kaa, buu ma kaɓakŋa huna ka lay, ni asi ndak a sek kay sa namma.

³⁹ Lini dlaagira daŋ ka a diya ni gi ii boy namma hu tokka u voɗoɗu.

⁴⁰ Aygi hin mbuɗ ni ko suu honira na, kay dlara li karam wanda. Boy ma a mbuɗ dlaaygira ki kay tokka wandara kaɗi, ka hin ndak a vi u boy namma ki gasagiɗi lay.»

⁴¹ Nam di boy namma na ni suuna mbee ni na gaw.