SUNDA 18 - Boy Lonana

Pol hu Korint

¹ Ŋgoo dagan wanni Pol tuɗ kak ki Aten hin jak kak Korint.

² Nam ŋgaf u sa ma Juifna dew sem ana Akilas nammi goo ma Pontna. Nam mbay ni Itali u tasi ha caamba, Prisiye, kay mulna Klaud ana suu Juifna yow kiyo, hin Rom kiyo. Nam Pol hin fasiya.

³ Kay asi halaŋŋi li ni sunda dewra cil ni zi barawna. Nam kak varasiya, asi li sunda ko tasiya.

⁴ Hu buu ma vi Lonna tew tew ni Pol di boyna hu Zira Tokka, nam hal ana huu suu Juifna mbuɗ kiyo u suu Grekŋa lay.

⁵ Falira gi Silas u Timote mba Masedoinda wanni, Pol ka li va daŋ kombi, di ni Boy Lonana sak sak, tak ki maŋ suu Juifna ana Yesu ni Sa ma Lona Fuurumma.

⁶ Ni asi suu Juifna min a vam boy mammaɗi, ŋgulummi ŋguli na ɗow ɗow, nam kisik gugum baraw mamma ki irisi dasi ana, «Lini agi ba ki wa coogira ni kay yagira eŋga, ndolon ka duk oloɗi. An hin cecemi tuɗ ni eg njaf suu daŋŋa.»

⁷ Nam hin li namma tani tuɗ vi sana dew sem ana Titiyus Justus nammi sa ma vi Lona. Ziimma eg Zira Tokka na tok.

⁸ Krispus mul ma hu Zira Tokkana vi boyna vi Bu Suuna u suu mamma halaŋ. Suu Korintna suu vi boy ma vi Polna bolowo, ni asi fi batemma lay.

⁹ Hu njeŋgera wanni vana tak tam ii Pol, Bu Suuna dam ana, «Li ndaaɗi, seŋ taŋgi, di ha ki na gak gak.

¹⁰ An ka njun uŋu, sa ka ndak a laŋ va egeŋgi, hu ɦoŋzina tani suu mansina ka ŋgolo.»

¹¹ Pol kak varasi basara dew u til gayam karkiya, haɗ Boy Lonana maŋ suuna.

¹² Hu basara Galiyon kaki a mulna vi suu Romma hu Akay, suu Juifna tok tasi kay Pol vam ay a mbaaram fok suu kaɓakŋa.

¹³ Di ana sana wanni min mbuɗ huu suuna ana asi vi u lo ma ka taɓ u gaɗ maygiraɗina.

¹⁴ Pol gijaŋ boyna ni hu li ma Galiyon di suu Juifna ana, «Lini kay boy ci maɗ kala, dla cora saɓaki kala, ni an hin humugi boy magina a boy ma garaŋi.

¹⁵ Ni kay ciwayra duk tagi kay boyna, kay semma, kay gaɗ magira, ni agi gagi ii boy namma ni agi kay tagiya. An min kaɓakŋa kay boy nammaɗi.»

¹⁶ Nam dikisi ki hu li ma kaɓakŋa.

¹⁷ Sosten ma mul Zira Tokka asi tok kam vam cam poŋga hu li ma kaɓakŋa. Ni Galiyon vun dikim ka ɓigim kay boy namma na ndeɗi.

Pol hoŋ hu Antiok

¹⁸ Pol li buuna hu Korint ŋgol olo, nam hin gorsemma tani, tuɗ fok u lum kawina hu Siri gi Prisiye u Akilas um may. Caw yam ki hu Seŋkre jew caw ni hin ful hu lumma ni na tuwa, kay nam suu tam ay kiyo.

¹⁹ Asi tew Efes tew ni, Pol hin gi Akilas u Prisiye ka tani tuɗ hu Zira Tokka, ciwayra ko tam u suu Juifna.

²⁰ Asi min ana nam kak egesi buu ŋgol tuwa, ni nam min kaɗi.

²¹ Nam hinisi ka tani tuɗa, dasi ka ana, «An hin hoŋ ay egegi hu buu ma daŋ tuwa lini Lona mina.» Nam tuɗ Efes ni u lum kawina.

²² Nam cuk ki kaŋga Sesare ca ni tuɗ kolo Yerusalem a gi deɓ suu vi Kristuna, ŋgoo dagan nam hin tuɗ Antiok.

²³ Ŋgoo dagan nam hin li buuna ca ni hin hoŋ ay koyra olo. Nam jak ha ki kay ndaŋgara Galatira u Frigi, so hu suu haɗina halaŋ hu viisira.

Apollos di boyna hu Efes u Korint

²⁴ Sa ma Juifna sem ana Apollos nam vuɗ ni hu Aleksandri, nam mba Efes. Nammi sa ma haɗina wi Boy ma Ɓiirina ki jivi ɦay.

²⁵ Nam haɗ voɗta vi Bu Suuna u voɗoɗu, yalna kam cocoo, haɗta nam haɗara, boy ma nam damma lay ni di ki kay sem Yesu gasi na ɗegee. Doli nam wi ni batem ma vi Jaŋŋa hol.

²⁶ Hu Zira Tokka nam col a di boyna u saɓakŋa, Prisiye u Akilas hum boy ma nam damma na ni asi tayam usi tuɗ takam voɗta vi Lonara ki ɗegee.

²⁷ Ŋgoo dagan Apollos min tuɗ Akay. Gorsesina tinim hu voɗta wanni asi ɓiirim magaara ha kom ana suu vina vam dukusi jiviya. Nam tew hu li namma tew ni mbuɗ jivi kay suu vi u oora vi Lona hu li namma.

²⁸ Nam tak suu Juifna ki duk suuna u boy ma eŋga ana asi viɗ tasi ni viɗiya. Nam vasi u Boy ma Ɓiiri ana Yesu ni Sa Lona Fuurumma.