SUNDA 17 - Boy Lonana

Pol u Silas hu Tesalonik

¹ Asi mba hu Amfipolis u Apolloni asi mba hu Tesalonikŋa ni fi Zira Tokka vi suu Juifna ka huwa.

² Pol tuɗ hu Zira Tokka ko nam li jew dayra na, nam li buu ma vi Lonna u asi yam hindi, nam vi u Boy ma Ɓiiri na ki ko tasi hu li namma.

³ Nam vasi u boy namma ki takasi anaba, magaara di ni ana Sa Lona Fuurumma hin wi hawra, hin mba coli kolo hu miɗna iiriya. Nam dasi ana, «Ni Yesu ma an dagi kamma nammi Sa Lona Fuurumma.»

⁴ Suu daŋŋa dukusi ɦiw ni boy namma mbuɗusi hurusiya asi taɓ u gi Pol u Silas. Suu Grek suu vi boy ma vi Lonna mbuɗ ŋgolo, boyogi suu garaŋŋa ka hu ŋgol lay.

⁵ Suu Juifna hurusi oyra u honira egesiya. Asi tok suu co suu ɦiw suu fasi kolo hu voɗta ɦawana usiya, asi tum dlara ɦayam ɦayamba kolo viɗ suuna ki u boyna hu ɦoŋzina. Asi mba hu zina vi Jason a hal Pol u Silas a yowosi ha ki fok suuna.

⁶ Asi mba fasi ka vi Jasonɗi ni, asi vam nam Jason yowosi u gorsem suu daŋŋa, tuɗusi ha fok suu ŋgolo suu ɦoŋzinana, gijaŋ sawalla, «Suu asina ɓeŋ suuna ki kay ndaŋgara halaŋ halaŋ. Cemi asi mba hu zina tani.

⁷ Jason hin vasi varamu. Asi halaŋ dlaasira asi laɗta halaŋ ka taɓ u gaɗta vi mulnaɗi, asi di ana mul ma ŋgol maa kaa, sem ana Yesu.»

⁸ Boy namma njay huu suu ɦoŋzina ki ŋgolo, suu ŋgolo suu hu ɦoŋzina lay.

⁹ A cuk ki Jason kolora wanni asi warak suu ŋgolona ni warakiya.

Pol u Silas hu Bere

¹⁰ Njeŋgera mba mba ni gorsesina tuɗ gi Pol u Silas Bere. Pol tew ki tew ni jak tuɗ hu Zira Tokka vi suu Juifna.

¹¹ Suu asina saa masira jivi su suu Juif suu ay Tesalonikŋa. Asi vi Boy Lonana jivi coco ɦay. Hu buuna tew tew ni asi haɗ Boy ma Ɓiirina kay a wi ana boy ma Pol damma u voɗom su?

¹² Duk suu Grekŋa lay boyogi suu garaŋŋa u njufina bolowo vi hu Boy Lonana.

¹³ Suu Juif suu Tesalonikŋa hum ana Pol ka di boyna hu Bere ni, asi tuɗ may. Asi yow ay mba ɦay ii suuna koloo.

¹⁴ Gorsesina wi na ni vi yasi ka oloɗi, tin Pol hu voɗta hu lum ŋgolna zak gaw. Gi Silas u Timote hin ka hu Bere tu may.

¹⁵ Suu tuɗ a tin Polna gak gak tuɗ tinim ha hu Aten, asi a hoŋ Berera wanni Pol gaɗasi ha kay Silas u Timote asi ŋgafam zak.

Pol hu Aten

¹⁶ Hu li ma Pol ka juɓ Silas u Timote hu Aten wanni, nam wi ana ɦoŋzi namma oyra u fulina cocoo ni ɦam saara ɦay.

¹⁷ Hu Zira Tokka wanni nam ciwayra ko tam u suu Juifna u suu daŋŋa lay, suu goɓ Lona. Hu kiɗikka duk suuna lay suu nam ŋgafasina halaŋŋi nam ɓak u asiya.

¹⁸ Suu haɗ haɗta Epikurirana u suu Estuwasina ciwayra u Pol. Suu daŋŋa di ana, «Sa ma dagam dagam namma di ni ana mege?» Suu ɦiw ana, «Nam ɓakŋi boyna vi lo ma daŋŋa kalage.» Asi di na kay Pol di Boy ma Ayra ana Yesu paɗ ki kolo iiriya.

¹⁹ Asi tayam usi tay ni tuɗ u nam kay ɦinira Areopage, joɓom ana, «Boy ma wilina aŋ haɗam namma ni boy mege?

²⁰ Dlara aŋ ɓakaɗ humumi wanda ni dlara daŋga, ami min a wi u boy namma kiyo.»

²¹ Suu Atenna halaŋ u suu kaki dukusi a ŋgayrana halaŋŋi, ka di va ma daŋgi, di boy ma hurusi ma asi humum ay fun suuna wilina may.

²² Pol col kolo duk suuna kay Areopage zow ni dasiya, «Agi suu Atenna an wi ana viigira ka ŋgolo.

²³ An poy hu ɦoŋzina tani wi li ma agi tok a li cenda huna, an wi givin ma togolla ma cenda dew ɓiiri kam kolo ana, lo ma sa ka wambina. Ni jiviya ma agi cen sa ka wambi namma an dagi ni kamu.

²⁴ Lona ma li duliyara u tlesuu huruɗna halaŋŋa, nammi Bu Suuna vi tlesuu kolo huulona u suu kay ndaŋgarana halaŋ. Nam ka kak hu zi ma sa minim u kombi.

²⁵ Nam ka min ana sa ɦam va naɗi, nam ɦal tlena maŋ suuna halaŋŋi namu, ɦasi iirira, musukŋa u tlesuu daŋŋa halaŋ.

²⁶ Nam cuk suuna halaŋ col ay ni u sana dew. Nam ɦasi ndaŋgara ni masiya. Nam ŋga ii lina ha ki fok jewe, hin ɓorowosi li ma asi kak huna ki kosiya.

²⁷ Nam li dla ndaɗta na ni kay asi hin halamu, kay gege lay ni mba taɓ u namu. Ni asi hin ndak a fam kalage, a gasira ni Lona ka egegi dayɗi, kay

²⁸ Hurum nammi aygi ka iiriya, Ndak a mbuzuguygi lay, wi taygi lay. Ni ko sool magi ta ɦiw di na lay, aygi ni goryomu.

²⁹ Aygi ni goryomu, ni ka ndak di ana Lona tli tam ko lorra naɗi, ko doonora ɗowba, ɦinira naɗi lay. U va ma sa ŋgaam u saa mamba ɦawaɗi.

³⁰ Hu li ma suuna ay ka wi va tuɗina Lona ka ŋga va kayambi, cecemi nam yi suuna hu lina halaŋ, asi mba jok iiri masira ki zeɗ.

³¹ Nam mba buu ma dew a kaɓakŋa kay suuna u ɗegeera ni u sa ma dew ma nam ŋgaɓamma. Nam tuk dla ndaɗta u colla nam colom kolo hu miɗna iirira.»

³² Asi hum Pol di ana nam colom ki kolo hu miɗna iiriya ni, suu daŋŋa panam may, suu ɦiw di ana, «Ami min a humuŋ dlaaŋga ndaɗta hu falira daŋ dew tu olo.»

³³ Pol hinisi ni na gaw.

³⁴ Suu daŋ suu ɦiw taɓ umu, vi Boy Lonana, sa ma dukusi dew sem ana Denis, nam ay ni duk suu hu Areopagena, cara seɗ ana Damaris u suu daŋŋa hu lay.