SUNDA 16 - Boy Lonana

Timote tuɗ ugi Pol u Silas hu koyra

¹ Pol tew Derbe hin tuɗ Listra. Hu li namma ni sa ma vina dew sem ana Timote, nammi goŋ goora Juiffa, ndaɗ vi u Lona, bummi sa ma Grekŋa.

² Gorsesi suu vina ay hu Listra u Ikonium yam sem jivi ɦay.

³ Pol tayam umu min ana nam tuɗ koyra umu, nam cawam ɗiwim kiyo ko ndaa suu Juifna, suu ka hu li namma na, kay asi halaŋŋi wi ana Timote bummi sa ma Grekŋa.

⁴ Hu ɦoŋzi ma asi jak huna halaŋŋi asi di suu vina ana vi u gaɗta vi suu vovoɗta u suu ŋgolona hu Yerusalem daɗta.

⁵ Suu vi Kristuna halaŋ fi eŋga hu viisira, ndumusi zul ha fok hu buuna na tew tew.

Pol hu Troas wanni vana tak tam irimu

⁶ Musuk Lonara doorosi ana asi di Boy Lonana hu ndaŋgara Aziraɗi, ni asi hin tuɗ ni hu Frigi u Galati.

⁷ Asi mba tok eg Misi, hal a tuɗ kini hu Bitini, ni Musukka vi Yesura hinisi kaɗi.

⁸ Asi jak ha kay Misi jakŋi tuɗ ha fun lumma Troas.

⁹ Hu njeŋgera wanni van tak tam irimu, nam wi sa ma Masedoinna coli fokomu, ka dam ɗaŋi ana, «Tuɗ ay Masedoin mbay njun umiya.»

¹⁰ Cecemi ŋgoo va ma tak tam irimma may ni, ami cukumi tami tuɗ Masedoin ni na gaw. Ami wi ki kami ana Lona yami ay ni ana ami tuɗ di Boy ma Ayra ki maŋ suu hu li namma na.

Hu Filipi ni Lidi vi u Bu Suuna

¹¹ Ha hu Troas wanni ami cukumi ha hu lum kawina tuɗumi ha kay daara yaɗ ana Samotras, siwra ami cuk Neapolis.

¹² Ay hu li namma ami tuɗ Filipi ni ɦoŋzi ma ŋgol ma jewna hu ndaŋgara Masedoinda. Ay hu li namma ni ɦoŋzi ma goona vi suu Romma ka may. Hu ɦoŋzi namma wani ami li buuna hu ŋgolo.

¹³ Hu buu ma vi Lonna ami tuɗumi doŋ lumma a hal li ma suu Juifna cen Lona huna. Ami lakami kaŋga ca ni ɓakami boyna maŋ boyogi suu toki hu li namma na.

¹⁴ Cara duk boyogi suu asina dew seɗ ana Lidi, ndaɗ ay ni hu ɦoŋzina Tiyatir. Ndaɗ ni cara li paara u baraw ma tam ndoli tlawna, mba cen Lona. Ndaɗ kaki huma, Bu Suuna malaɗ huruɗ ki kay ndaɗ hum boy ma Pol damma.

¹⁵ Mbusuɗ ki batemma hu li namma u suu maɗna halaŋ. Ndaɗ yami ay varaɗu dami ana, «Lini agi wi ki gasagi ana an vi u Bu Suuna ni, mbaagi ay varanu.» Ndaɗ ɦeɓemi gak gak ami hin viya.

Pol u Silas hu daŋgayna Filipi

¹⁶ Hu buu maa dew ni ami tuɗ hu li ma cen Lona, goora dew u fulna kaɗu. Ndaɗ di ki kay dlara hin li ha fokka, ndaɗ fi gursura maŋ maliyaɗna ŋgol u boy namma. Hin ŋgafami vokomiya.

¹⁷ Ndaɗ gi taɗ umiya sawalla ana, «Suuna wanni suu sunda vi Lo ma kolo dayna. Asi dagi boyna ni kay voɗta tuɗugi hu suɗta.»

¹⁸ Ndaɗ li buuna ŋgol u boy namma. Ni Pol hurum ɓeŋa pereɗ irim egeɗu di ful namma ana, «An daŋ u sem Yesu Kristu kal ki huruɗu!» Cecemi hu li namma na ni fulna kal ki huruɗ gaw.

¹⁹ Hu li ma malayaɗna wi ana asi ka fi va oloɗi ni, asi yow gi Pol u Silas tuɗusi ki hu li ɓakŋa fok suu ŋgolona.

²⁰ Asi tuɗusi ha fok suu ŋgolo suu Romma di ana, «Suu asina mba tin dla cora hu ɦoŋzi maygina tani ni asiya. Asi ni suu Juifna lay.

²¹ Asi haɗ dlaasira gaɗ maygira doo ki kay boy nammara, maygi aygi suu Romma, ana vi u boy namma li umu.»

²² Suu molina halaŋ hurusi ɓeŋ ki egesiya. Suu ŋgolona yow baraw ma vi gi Pol u Silas na kiyo, ɦasi voɗta ana casi poŋga u balafna.

²³ Asi tuɗ casi poŋga ta ta cukusi daŋgayna ca ni di suu golosina ana golosi jiviya.

²⁴ Sa golla hum boy namma na ni ɓalasi sesi u pagalamma, cukusi hu zira daŋgayna.

²⁵ Duk ŋgikka wanni Pol u Silas gi soolla cen Lona, geleɗ Lona, suu daŋ suu hu daŋgayna laki hum may.

²⁶ Asi gol irisiya ni ndaŋgara gijaŋ geŋeɗta na jik jik, ni zira daŋgayna lay geŋeɗ lay. Vun ziginina halaŋ halaŋ mal ki kay tasiya, gali ma sem suu daŋgayna halaŋ weɗ ki bel.

²⁷ Sa ma golosina dliɗ kolo dliɗ ni wi ana vun zina ki maliya ni, nam paɗ ŋgew mamba ki hooɗ a tuɗ ci tam kira, kay nam saa hurum ana suu daŋgayna li pii ki wa.

²⁸ Pol sawalla u delem kolo eŋga ana, «Li va ma co eg taŋgi, ami ka tani halaŋ.»

²⁹ Sa ma golosina ana ɦam kura ay na zak, nam tuɗ ha usi hu zira daŋgayna u tamba, ni tam dlak na jik jik ko ndaana. Nam gi tam kaŋga fok Pol u Silas.

³⁰ Nam cukusi ay ki buru ca ni joɓosi ana, «Gorna, an lini nana a fi suɗta ge?»

³¹ Asi hoŋom dira ana, «Vi u Bu Suuna Yesu aŋ hin fi suɗta u suu maŋŋa halaŋ.»

³² Asi dam boyna vi Bu Suuna u suu mamma halaŋ.

³³ Sa ma golla yowosi um njeŋge ndaɗta ni na gak gak tuɗ mbususi mbilisi kiyo. Asi hin mbusum batemma u suu mamma halaŋ ni hu li namma.

³⁴ Nam yow gi Pol u Silas varam yow ni i ɦasi tina. Sa namma u suu mamma halaŋ li furira ŋgolo, kay asi mbuɗ ki suu vi Lonna.

³⁵ Lina fo ki fo ni suu ŋgolo suu Romma gi sunda ha eg sa ma gol daŋgayna ana, «Cuk suu asina.»

³⁶ Sa ma golla mbaa sa vun sunda eg gi Pol dasi ana, «Cukugi kiyo. Agi ndak kay a cukugi kiyo, tuɗugi u heɓpa.»

³⁷ Pol di sa golla ana, «Asi poŋomi ki ii suuna na halaŋ bay kaami ɓak mamina, ami tamira ni su Romma lay, hin cukumi daŋgayna, cecemmi asi min cukumi ki ŋgaya, ni ka naɗi, asi mbay cukumi kini u tasira.»

³⁸ Suu sunda tuɗ di boy namma maŋ suu ŋgolo suu Romma na ɗaŋi, asi hum na ni mbuɗ ndaana kay ana Pol u Silas ni suu Romma.

³⁹ Asi mba yoo tasi fokosiya, hin cukusi ki buru ni na gaw, asi mbuɗusi cenda ana asi tuɗa hin ɦoŋzi namma.

⁴⁰ Gi Pol u Silas cuk ha ki hu zira daŋgayna ca ni, asi tuɗ vi Lidi. Asi tuɗ fi gorsesina na ni soosi hurusi u boyna ŋgolo hin hinisi tani tuɗa.