SUNDA 15 - Boy Lonana

Tokka hu Yerusalem

¹ Suu ɦiw ay Yude mbay Antiok gijaŋ haɗ gorsesina anaba, «Lini agi ka caw ɗiwigi ki a li u gaɗta vi Moizɗi ni, agi ka ndak a fi suɗtaɗi.»

² Kay boy namma wanni Pol u Barnabas ciwayra ŋgolo u asiya. Asi ana Pol u Barnabas u suu Antiok suu ɦiw hin tuɗ Yerusalem a ɓak kay boy namma u suu vovoɗta u suu ŋgolona.

³ Suu vi Kristuna sunusi a asi tuɗ koy ndaɗta ni asiya. Asi kal Fenisi jak Samari dasi boy ma ana njaf suu ka suu Juifnaɗina mbuɗ eg Lona, gorsesina halaŋ halaŋ mbuɗ li furira ŋgolo kay boy namma.

⁴ Asi mba tew Yerusalem tew ni asi suu vi Kristuna u suu vovoɗta u suu ŋgolona halaŋ vasi u furira. Asi njaɗasi boy ma Lona lam ay u asina ki halaŋ.

⁵ Suu ɦiw duk suu Farisenna suu mbuɗ ki suu vina yow kolo egesi dasi ana, «Lini nanagelay ni suu vi suu ka njaf suu Juifnaɗina, asi cawasi ɗiwisi kiyo, asi mba li u gaɗta vi Moiz.»

⁶ Suu vovoɗta u suu ŋgolona tok tasi a saa kay boy namma.

⁷ Asi ciwayra coco kay boy namma. Piyer col kolo zowni di ana «Gorsenna, agi wi ana Lona manan dukugi tani day day a an di Boy ma Ayra maŋ suu ka njaf suu Juifnaɗina, kay asi hum boy mamma, vi umu.

⁸ Lona ma wi huu suuna halaŋŋa tak ki ana nam vasiya, sunusi Musuk mamba kasi ko sunuɗ ay kaygira na may.

⁹ Nam ɓorowosi irisi ka u aygi zeɗɗi, nam mbususi hurusi kiyo kay asi viya.

¹⁰ Agi min tukugi Lona ni kay mege? Nek mayra somoyoy lay, aygi taygira lay, ndak ka a laɗɗira min tiniɗ kay suu vina ni kay mege?

¹¹ Ni u oora vi Bu Suuna Yesu aygi vaygiya fi suɗta ni na, asi tasira vi ni na may.»

¹² Suu tokina halaŋ sa ka ɓak boyɗi, a hum vun gi Pol u Barnabas, a vasi u dlara takka u dlara mbuɗta ta Lona laɗ u asi duk suu ka njaf suu Juifnaɗina.

¹³ Asi daɓ boy masina daɓ mi, Jak col kolo dasi ana, «Gorsenna, humun gi vunun haa.

¹⁴ Simon dagi jew ana Lona min njaf suu ka Juifnaɗina, nam man suu dukusi ɦiw mbuɗusi ki a suu mamsina.

¹⁵ Boy na vi suu jok vun Lona taɓ ko tam u boy namma, kay magara di ana,

¹⁶ Bu Suuna di ana, Ŋgoo dla ndaɗta halaŋŋi an hin hoŋ aya. An hin mba min mbutluɓma vi David, ma to kina, koloo, an hin colom kolo balamamu.

¹⁷ Kay suu daŋŋa halaŋ mba hal Bu Suuna, u njaf suuna halaŋ suu an yasi a mansina na.

¹⁸ Bu Suuna li ki u tlegeyem su nam takasi ay ki jew day dayna.»

¹⁹ Jak di ana, «Ni kay ndaɗta an ka min aygi tinigi va ma nek kay suu ka njaf suu Juifnaɗina suu vi u Lonnaɗi.

²⁰ Ɓiirigisina magaara, asi kom tliw ma njenje ma sana li ɓivunna maŋ fulina u nammaɗi, doo tasi kay dlara zoŋga, asi kom tliw tlesuu muruɗusi muruɗina ɗi, ci busunaɗi lay.

²¹ Ay jew dayra suuna di boyna kay gaɗta vi Moizza hu ɦoŋzi ma ŋgolona halaŋ, asi ndum gaɗta hu Zira Tokka hu buu ma vi Lonna tew tew.»

Magaara sunuɗ maŋ suu ka njaf suu Juifnaɗina

²² Suu vovoɗta suu ŋgolona, suu vina halaŋ vi vunusi ana asi man suu dukusi ɦiw a sunusi Antiok gi Pol ha Barnabas. Asi man Jud ma asi yam ana Barsabbas, Silas may. Asi jakŋi suu ŋgolona duk gorsesina.

²³ Asi ɦasi magaara ha kosi ko ɓiiri wanda na. «Suu vovoɗta suu ŋgolona, gorsegina halaŋ gagi deɓpa, agi gorsesi suu vina duk suu ka njaf suu Juifnaɗina, suu ka hu Antiok hu Siri suu hu Silisina.

²⁴ Ami hum ana suu col ha vo varami tani min viɗigi yagi mbuɗugi ndaana u boyna, ami ɦasi voɗta ha ka kay boy nammaɗi.

²⁵ Ami taɓami vunumi ha dew a sunugi suu daŋŋa ha ugi Barnabas u Pol.

²⁶ Asi ni suu ɦal iiri masira ki kay a sun Bu Suuna Yesu.

²⁷ Ami sunummi gi Jud u Silas ha ni asi hin dagi u boy ma ami ɓiirigi magaara ha kamma u tasira lay.

²⁸ Kay Musuk Lonara u ami tamira lay saa ka a tinigi va ma nek kagi ma su wannaɗi.

²⁹ Komogi tliw ma sana li ɓivunna maŋ fulina u nammaɗi, ci busunaɗi, kom va ma sana muruɗum muruɗi ɗi, gologi tagi jivi kay boy zoŋga. Lagi tagi jiviya, hin dlara halaŋga ndaɗta kiyo.»

³⁰ Asi cuk tasi caɗaŋi tuɗ tew Antiok. Asi tok suu vina ay egesi halaŋ, ɦasi magaa mayra ay kosi ndaɗta.

³¹ Asi ndum magaara ki duk suu tokina, suu tokina hum boy namma na ni li furira ŋgolo, kay njunda asi njun ay usi u boynara.

³² Jud u Silas jakŋi suu jok vun Lonna, ɓak boyna fiyek coco kay a njun usi ɦasi eŋga.

³³ Gi Silas u Jud li buuna egesi goy ca ni, gorsesi suu vina hin tinisi ay u furira, asi hoŋ ay eg suu sunusi hana. [

³⁴ Silas min ana nam a kak u asi tuwa.]

³⁵ Pol u Barnabas u suu daŋŋa usi hu lay, asi kak Antiok. Asi haɗ suuna dasi boyna vi Bu Suuna.

Pol u Barnabas garak kiyo

³⁶ Li buuna ŋgoo dagan ca ni Pol di Barnabas ana, «Hoŋoy goloy gorseyna hu ɦoŋzi ma ŋgolo ma ay day boyna vi Bu Suuna huna halaŋ, kay wasi ana asi ka nanage.»

³⁷ Barnabas min tay Jaŋ ma sem ma geleɗta ana Markŋa usiya.

³⁸ Pol ka min ana asi tayam usiɗi, kay nam hinisi ha ki Pamfili, Pol ka min Mark tuɗ usi a li sunda oloɗi.

³⁹ Asi ciwayra duk tasi coco hin garak kiyo. Barnabas tay Mark um tay ni ful hu lum ŋgolna tuɗ hu Sipre.

⁴⁰ Pol may ni man ummi Silas. Ŋgoo dagan gorsesina tinisi u oora vi Bu Suuna tani asi tuɗa.

⁴¹ Nam jak ha Siri hin Silisi kay a ɦal eŋga maŋ suu vi Kristuna hu viisira.