SUNDA 14 - Boy Lonana

Pol u Barnabas hu Ikonium

¹ Hu Ikonium wanni gi Pol u Barnabas cuk hu Zira Tokka vi suu Juifna, asi ɓak Boy Lonana ko ndaɗta na ni suu Juifna u suu Grekŋa vi Boy Lonana ŋgolo.

² Na may suu Juifna suu min viraɗina kal boy ma cona duk njaf suu daŋŋa, mbaarasi ay a li cora eg gorseygina.

³ Pol u Barnabas kak Ikonium cocoo, asi ɓak boyna u ɦiŋga, hurusi tini kay Bu Suuna cocoo. Bu Suuna takasi ana boy ma asi dam kay oo mamba ni gasira, nam ɦasi saɓakŋa a li dlara mbuɗta u takka daŋga.

⁴ Suu hu ɦoŋzi ma ŋgolna irisi ɓorow ki duk mba', suu ɦiw u suu Juifna may, suu ɦiw u suu vovoɗta may.

⁵ Suu Juifna u njaf suu daŋŋa u muli masisina, min tasi a las gi Pol u Barnabas ana asi gikisi casi ki u ɦinira.

⁶ Asi hum ana suuna hal a casi kini ciya, ni Pol u Barnabas pii tuɗ hu Listra u Derbe. Ni hu ɦoŋzi ma ŋgolna hu Likaonina, u ɦoŋzi ma ŋguyumma lay.

⁷ Hu li namma asi tuɗ da Boy ma Ayra maŋ suuna.

Pol u Barnabas hu Listra

⁸ Hu Listra ni sa ma hurufna ka dew, sem ka tuɗɗi. Nam dak ay ni goo day tuɗ ay kaɗi.

⁹ Nam ka hum boy ma Pol damma ni nam Pol ŋgaras irim kam ŋgaras, wam ana nam hurum vi kay mbuɗta jivira.

¹⁰ Pol dam u delem kolo eŋga ana, «Col koloo, ɗoɓ taŋ ki kay seŋ ɗegee.» Sana weɗ kolo na vikŋi gi tam tuɗta gaw.

¹¹ Suu molina wi dlara Pol laɗta na ni asi gijaŋ sawalla kolo eŋga u vun masi ma Likaoni ana, «Lookina cuk bak sana tasi ca ni mba cuki kaŋga dukuygi tani.»

¹² Asi yi Barnabas ana Zeus, Pol ana Hermes kay Pol ni sa ma dasi boyna.

¹³ Sa li ɓivunna ma lo ma yam ana Zeusna, ziimba cen lona ha ki doŋ kaana, vi mbutlna ndolom tam u tlena, njun ki ɓo tlena lay fun zira. Nam ana suuna li ɓivunna maŋ Pol u Barnabas.

¹⁴ Suu vovoɗta hum boy namma na ni haa baraw masina ki huuk huuk yow liŋŋa ha duk suuna sawalla ha kolo eŋga ana,

¹⁵ «Banayamina agi lagi na ni mege, ami ni suuna ɦawa ko agi na may, ami mba dagi Boy ma Ayra a agi hinigi fuli suu asina kiyo, mbuɗugi irigi eg Lona ma iirina na ɗow. Ma li huulona li ndaŋgara li lum ŋgolna u tlesuu hurumma halaŋ.

¹⁶ Ay fok jewra ni Lona hin suuna halaŋ tuɗ u min masira.

¹⁷ Na lay ni nam tak jivira egegi tew tew lay. Nam si yoom ay kaŋga a agi li njafna, nam ɦagi tina, oyogi hurugi u furira.»

¹⁸ Asi a lasi gin ɓivunna ni suu vovoɗta doorosi ni u saɓakŋa.

¹⁹ Suu Juifna suu mbay Antiok ta Pisidira u Ikoniumma, asi tok vun suuna ki usi halaŋ ana asi gik Pol u ɦinira cam kiyo. Asi taɗam ɦagi doŋ kaana, saa masira ana Pol miɗ ki wa.

²⁰ Suu vina tok ay kam tokŋi nam col ki kolo dukusiya kal ki vo hu ɦoŋzina. Siw ni nam tuɗ u Barnabas hu Derbe.

Asi hoŋ ay hu Antiok ta Sirira

²¹ Pol u Barnabas di Boy ma Ayra hu ɦoŋzi ma ŋgolna Derbe, hu li namma asi fi suu haɗina ŋgolo. Ŋgoo dagan ni asi hoŋ Listra tuɗ Ikonium u Antiok ta Pisidira.

²² Asi gaɗ suu vina soosi hurusi ana asi kak eŋ hu vira. Dasi olo ana, «Lini nanagelay aygi a cuk hu Mul Lonara ni u wihawra coco tuwa.»

²³ Hu Ziŋ Lonara dew dew halaŋŋi nam tin suu ŋgolona fok suuna, ŋgoo dagan asi lak u vunusiya ti vaɗi lay, ci yoɗi lay kay a cenda. A hinisi ko Bu Suuna ma asi tin hurusi kamma.

²⁴ Asi calaɗ vun ndaŋgara Pisidira ha ki calaɗ ni mba ki Pamfili.

²⁵ Asi di Boy Lonana ha Perg ŋgoo dagan tuɗ Attali.

²⁶ Ay hu li namma ni asi ful hu lum kawina a tuɗ Antiok, ɦoŋzi namma asi paɗ vunusi kasi ana oora vi Lona li u asiya, kay sunda asi laɗ dukusira.

²⁷ Asi mba Antiok tok suu vi Kristuna halaŋ egesiya, vasi u boy ma Lona li sunda ay u asina halaŋ, u mayra nam mal voɗta ki maŋ njaf suu daŋŋa asi vira lay.

²⁸ Asi lak hu li namma eg suu vina buun ŋgolo.