SUNDA 13 - Boy Lonana

Barnabas u Sol tuɗ a da boyna

¹ Duk suu vi Kristuna hu Antiok ni suu jok vun Lona u suu haɗ suuna kaa, Barnabas u Simeon (ma asi yam ana Warna) Lusiyus ma Sirenna, Manaen, ma wul ay vo vi mulna Herodna, u Sol.

² Fali taa dew asi tok tasi a cen Bu Suuna wanni, asi ci yoɗi lay ti vaɗi lay. Musuk Lonara dasi ki ana, «Man gi Barnabas u Sol ki kay sunda an yasi kaɗta.»

³ Asi cen Lona ti vaɗi lay ci yoɗi lay, baa kosi kasi cukusi ana asi tuɗa.

Barnabas u Sol tew Sipre

⁴ Barnabas u Sol, Musuk Lonara sunusiya, asi tew ki Seleusi, hu li namma asi ful ki hu lum kawina a tuɗ kay daara Siprera.

⁵ Asi tew ki Salamin tew ni gijaŋ di Boy Lonana hu Zira Tokka vi suu Juifna. Asi ay na ni Jaŋ Mark ay usi a njunusi u sunda.

⁶ Asi jaki kay daara jakŋi tew ki Pafos. Hu li namma asi ŋgaf u sa ma li komona dew sem ana Baryesu nammi sa ma Juifna li tam ana nammi sa ma jok vun Lonna.

⁷ Nam kaki ni eg mulna kay daara, Sergiyus Polus, nammi sa ma wi yalna cocona. Mulna yi Barnabas u Sol ay egem a nam min hum Boy Lonana.

⁸ Ni nam ma li gugunina, Elimas, ni sem jok ki u vun Grekŋa ni na, min hum u boy masinaɗi. Hal ni ana mulna hin vi ndaɗta kiyo.

⁹ Sol ma yam ana Polna, hurum oyra u Musuk Lonara ŋgaras irim kam ŋgaras.

¹⁰ Dam ana, «Sa ma cona, huruŋ oyra u honira, goŋ Satannana, gonokka u tlesuu jivina bel. Aŋ ka ɓalak ki wanni voɗta vi Bu Suuna ta jiviraɗi su?

¹¹ Cecemi aŋ hum haa Bu Suuna caŋ karam aŋ hin dug kiyo, iriŋ ka wi kiɗik faɗtaɗi njok tuwa.» Kak na njokŋi ii Elimas kuluɓ ndufunda na bim, nam mbuɗ gol tani ko njeŋgera na. Nam pereɗ irim tani may tani may a hal suu taɗam komma.

¹² Mulna wi dlara lira na ni vi u Boy Lonana gaw. Haɗta kay sem Bu Suunara mbuɗum ndaana ɦay.

Pol u Barnabas hu Antiok ta Pisidira

¹³ Pol u ndarayam suu umma ay hu Pafos tuɗ Perg ta Pamfilira. Ni Jaŋ Mark hinisi ha hu tani hoŋ Yerusalem.

¹⁴ Asi jak fok u koy masira, col ay Perg tew Antiok ta Pisidira. Hu buu ma vi Lonna ni asi tuɗ hu Zira Tokka kak huwa.

¹⁵ Asi ndum magaara gaɗta u boy ma vi suu jok vun Lonna ndummi, mul ma hu Zira Tokkana dasi anaba, «Gorsenna, lini boy ma agi dam maŋ suuna njun usiya ni dagiya.»

¹⁶ Pol col fokosi tli kom kolo dasi ana, «Agi gorsen suu Israelna, u agi suu li ndaa Lonna humugi boy manna haa.

¹⁷ Lona vi suu Israelna manaygi somoyoygi aya. Nam zul suu mamma ay ki hu li ma asi ay ki duk suu daŋŋa, ni hu ndaŋgara Egiptera, ŋgoo daganda nam yowosi ay ki ni u saɓakŋa cocoo.

¹⁸ Nam siɓ ay u asi gak gak basara dok fiɗi ŋgoo bagiya.

¹⁹ Nam ba njaf suu daŋŋa ki kiɗisiya kay ndaŋgara Kanaanda, tlasi ndaŋga masira ha ki maŋ suu mamma kay tasiya.

²⁰ Ii ko va ma kis kis fiɗi duk dok vadl. «Ŋgoo daganni nam ɦal suu kaɓakŋa maŋ somoyoygiya, gak gak tew basara sa jok vun Lona Samuel kara.

²¹ Ŋgoo dagan asi joɓ kay mulna, Lona ɦasi Sol goŋ Kisna a mul masina, nammi hu njafna vi Benjamin kak kasi basara dok fiɗi a mulna.

²² Ŋgoo dagan asi hin Sol ki tani, Lona hin ɦasi David a mulna. Lona hin di kam ana an fi David goŋ Jese ni sa ma irin jivina, nam hin li dlara an dam ana nam laɗura halaŋ.

²³ Duk suu hu njafna vi Davidna ni Yesu ma Lona tinim ana nammi Sa ma Suɗta vi suu Israelnana, nam di ki jew ni kam lay.

²⁴ Fok jew Yesu wanni Jaŋ di boyna maŋ suu Israelna ana jokogi hurugi ki zeɗ mbusugi batemma.

²⁵ Hu li ma Jaŋ liim hin ka ŋgol oloɗina nam di ana agi saa kan ana anni gege? Anni ka sa ma agi kaaday juɓummaɗi. Agi humugiya sa namma ka mbay ŋgoron dagani, an lay ni ka ndaki a buɗum zew tuɓuru ma semma kiɗi lay.

²⁶ «Gorsenna agi suu hu njafna vi Abrahamma, agi suu ka toki tani a cen Lona wanna. Boy ma suɗta namma ay suni ni magi agiya.

²⁷ Suu Yerusalemma u muli masina wi Yesu kaɗi. Asi hum boy ma vi suu jok vun Lonna ma asi ndumum hu buu ma vi Lonna tew tewna kaɗi lay. Asi a daɓ boy namma kira wanni ci ki ni Yesu.

²⁸ Asi gol commi fi boy ma asi ci Yesu ki kamma kaɗini asi ɦam maŋ Pilat ana nam cam kiyo.

²⁹ Asi daɓ boy ma magaara di ki kam jewna egem halaŋ daɓmi, asi tlam ki kaŋga hu gu garakŋa tuɗ gam hu zulla.

³⁰ Lona hin colom ki kolo hu miɗna iiriya.

³¹ Yesu hin li buuna ŋgolo tak tam ki ii suu mamma suu li tuɗ umma col ay Galile tuɗ Yerusalem asi ni suu diki kam maŋ suu Israelna.

³² Ami mbaaragi ni Boy ma Ayra namma. Ni va Lona dam dlam ay ki maŋ somoyoygi fok jewna.

³³ Nam li dla ndaɗta ni maygi aygi goryosiya, u colla col Yesu ki kolo iirira, ko ɓiiri hu magaara Soolla mbara na. Aŋŋi goonna, karam wanni an mbuɗ ni buŋu.

³⁴ Lona di ki fok ana nam hin colom ki kolo hu miɗna iiriya, kay nam ka hin a loɗ ki oloɗi. Nam di ko ndaɗta na ana, An hin paɗ vunun ki kagi gasi ko an di ki maŋ David jewra na.

³⁵ Ko nam di hu li ma daŋŋa olo ana, aŋ hin saaŋŋa a loɗ kiɗi.

³⁶ Hu li ma David ayna ni nam sun Lona ko nam minda na, nam hin miɗa asi pammi kay us somoyomu, nam loɗ ki ko suu daŋŋa na may.

³⁷ Nam ma Lona colom ki kolo iirina wanni loɗ ka kiɗi.

^38-39 Gorsenna agi wi ki jivi ana bulumba bulum cora faɗ ni u Yesu, ni va ma di ki fok jewna. Gegelay ma vina buɗ ki hu co mamba wa, gaɗta vi Moizza ndak ka a buɗ sa kiɗi.

⁴⁰ Gologi tagi jiviya kay dla mayra suu jok vun Lona di kaɗta mba li egegiɗi.

⁴¹ Gologiya agi suu pan tara, Boyna su ki kagiya, agi njay ha kiyo, an a li sun taa dew dukugiya, ni ta bay agi vi uɗta, lini sa dagira uɗ ki lay.»

⁴² Pol u Barnabas cuk ay ki bunsu hu Zira Tokka may ni, suuna joɓosi ana asi hoŋ mba dasi boy namma olo, hu buu ma vi Lon ma fokŋa.

⁴³ Asi daɓ tokka ki daɓ, cuk ay ki bunsu ca ni, suu Juifna u suu vi u vira vi suu Juifnara ŋgolo taɓ u Pol u Barnabas. Asi njun usi gaɗasi jivi cocoo, a asi kak saɓak hu oora vi Lona.

⁴⁴ Hu buu ma vi Lona ma daŋŋa, ni suu hu ɦoŋzi ma ŋgolna ŋgolosi tok ay ki halaŋ halaŋ a hum boy ma vi Lonna.

⁴⁵ Suu Juifna wi suuna oyra na ni hurusi mbuɗ oyra u honira min hum boyna vi Pol oloɗi, ŋgulum lay.

⁴⁶ Pol u Barnabas dasi ki ɗal ɗal ana, «Lini nanagelay Boy Lonana dagina ay ki magi jewe, agi hin noy boy namma kiyo, ni agi ndak ka kay iiri mayra ka daɓ kiɗiraɗi. Cecemi ami tuɗumi eg suu ka njaf suu Juifnaɗina.

⁴⁷ Gola ni boy ma Bu Suuna damina anaba, An tiniŋ ko kiɗikka na fok njaf suuna halaŋ. Aŋ tuɗ ɦal suɗta maŋ suuna hu ndaŋgara suu ha dayna lay.»

⁴⁸ Suu ka njaf suu Juifnaɗina hum boy namma na ni asi li furira ŋgolo, gijaŋ geleɗ boyna vi Bu Suuna. Suu ki ŋgaɓi kay a fi iirira ka daɓ kiɗira halaŋ mbuɗ suu vina halaŋ.

⁴⁹ Boyna vi Bu Suuna njay ki hu li namma halaŋ halaŋ.

⁵⁰ Ni suu Juifna kal boy ma cona duk ɦoŋ boyogi suu fok suuna suu vi hu boyna vi Lonna. U suu kaɓakŋa suu ɦoŋzina lay, asi gijaŋ gi Pol u Barnabas dikisi ki hu ndaŋga masira.

⁵¹ Suu mba' asina ko gugum ma sesina ki ko ni hinisi tuɗ hu Ikonium.

⁵² Suu haɗina hu Antiok hurusi oyra u furira u Musuk Lonara.