SUNDA 12 - Boy Lonana

Herod ci Jak kiyo, asi vi Piyer hu daŋgayna

¹ Fali ndaɗta mulna Herod gijaŋ las suu vi Kristuna su ɦiw.

² Jak ma wayaŋ Jaŋŋa nam cam ki u ŋgew ma ŋgolna.

³ Nam wi ana dla ndaɗta furi huu suu Juifna ni, nam vi Piyer daŋgayna olo. Ay ni hu buu ma luu ma asi yi fu ma bay kuffa dukumma.

⁴ Herod vi Piyer daŋgayna vini, cuk suu asgaana irisi kayra cub cub fiɗi, asi hu ni fiɗi fiɗi may a golomba, nam saa hurum a hin tuɗum ki fok suuna ni ŋgoo luu ma Pakŋa tuwa.

⁵ Piyer ay hu daŋgayna wanni suu vi Kristuna tok tasi cen Lona u hurusi toki dew.

Piyer kal ay ki hu daŋgayna

⁶ Falira Herod min a tuɗ Piyer fok suuna a kaam ɓakŋa kamba, hu njeŋge ndaɗta wanni Piyer buuri senna duk suu asgaana mba' njuni kaŋga u galina. Suu juɓum umma ka lagi fun zira daŋgayna may.

⁷ Gola, ni sa sunda huulona ki coli hu zi ma daŋgayna lina li ki usi na kiɗik kiɗik gaw. Sa sunda huulona dutl pay Piyer dutlni dam ana, «Col kolo zak.» Gali ma ay kom njunina cuk ki kaŋga na cikib gaw.

⁸ Sa sunda huulona dam olo ana, «Njun ɗik maŋŋa huruŋu, cuk tuɓuru maŋŋa seŋu.» Piyer cuk tlegeyem ca ni, sa sunda huulona damu, «Cuk baraw maŋŋa taŋ ca ni tuɗ ay unu.»

⁹ Piyer kal ay ki hu zira daŋgayna gi tam tuɗa u sa sunda huulona. Nam saa ka ana dlara sa sunda laɗta ni gasira naɗi, nam cow ni ana va tak tam irimmi takiya.

¹⁰ Asi jak hu vun ma jewna ma suuna laki hu a juɓana, jak ha ki hu ma mbana lay, mba tew hu vun ma kawina ma kay ɦoŋzi ma ŋgolna halaŋŋa. Vun namma mal ki kay tamu asi cuk ki na gaw. Asi cuk ki hu voɗta ɦoŋzinara gola ni sa sunda huulona kaɗi, hin ni Piyer dew gaw.

¹¹ Piyer mbuɗ wi tam ki na ɗaŋŋi, nam di kay dlara li ay egemba ana, «Cecemi an wi ki gasi ana Bu Suuna gi saam ma sunda huulona ay egen nam buɗun ki ko Herod wa, ko dla co mayra suu Juifna a hin landa gin egenda lay.»

¹² U dlara li ay egemba ndi ki irim si ɗaŋŋi nam tuɗ vi Mari ta su Jaŋ Markka.

¹³ Piyer daɓ vun zira a kal hara, ni goora sunusira dew seɗ ana Rod mba fun zira a malamba may.

¹⁴ Ndaɗ huma ni del Piyer, huruɗ furi cocoo, ndaɗ mal gin ni vunna ni hin malam kaɗi, ndaɗ hoŋ liŋŋa ha hu zira vo tuɗ dasi ana Piyer ka buruwa.

¹⁵ Asi daɗ ɗaŋŋi ana, «Ndak a guruɗ ki su?» Ndaɗ dasi ana, «Ni gasi ni namu.» Asi ana, «Li ka ni sa sunda huulona.»

¹⁶ Ni nam Piyer yam kay daɓ vun zira gak gak, asi mal vun zira kiyo ni namu, asi wi ana ni namu ni boy namma su ki kasi ɦay.

¹⁷ Nam dasi u kom ana asi seŋa, vasi u boy ma Bu Suuna kalam ay ki hu zira daŋgayna. Ni dasi ana «Jok boy namma ha maŋ Jak u gorsesi suu hiŋŋa.» Ni nam hin kal ki tuɗ ki hu li ma daŋŋa gaw.

¹⁸ Maɗiira fo ki foni vunna col duk suu asgaana cocoo, asi joɓ tasi ana Piyer lini nanage?

¹⁹ Herod halam hal halni, fam kaɗi. Nam joɓ vun suu golla joɓ joɓmi, ɦal voɗta ana casi ha kiyo. Ŋgoo dagan ni nam tuɗ Yude u Sesare kak ay ki hu njok tuwa.

Miɗ ma mulna Herod miɗna

²⁰ Mulna Herod hurum mbuɗ yara eg suu Tirna u suu Sidonna cocoo. Asi hin taɓ vunusi ay halaŋ mba egemu. Asi fi Blastus sa ma ŋgol ma li sunda hu zina vi Mulnana. Ŋgoo dagan asi tuɗ eg Mulna Herod kay a taɓ dukusiya. Kaymege suu masina fi tina ha ni varam tani.

²¹ Fali taa dew Herod cuk baraw mam ma mulla, kak a di bolla maŋ suuna halaŋ.

²² Suuna sawalla ay kolo ana, «Ɓak boyna wanni ka del sa warnaɗi, ni Lona u tamba.»

²³ Hu li namma gaw ni sa sunda vi Bu Suuna mba ci Herod piŋ kay nam ka ɦal ŋgolla maŋ Lonaɗi, ɦaɗ ni maŋ tamba. Nam vi tuguɗira cuk ki njufulna ni na gaw hin miɗ kiyo.

²⁴ Boy Lonana njay ha ki hu li ma daŋŋa cocoo.

²⁵ Hu li ma Barnabas u Sol daɓ poy masira Yerusalemba daɓmi, asi a hoŋga wanni tay Jaŋ ma sem ma geleɗta ana Markŋa usiya.