SUNDA 11 - Boy Lonana

Piyer di kay poy mamba duk suu vina hu Yerusalemba

¹ Suu vovoɗta u gorsesi suu vina hu mbassa Yudera hum ana suu njaf ma daŋŋa hum boy ma vi Lonna.

² Hu li ma Piyer mbay Yerusalem may ni suu Juif suu vina gijaŋ tumum um ana,

³ «Aŋ kal vi suu ɗiwisi bay cawra ti funa u asi lay ni amege?»

⁴ Ni nam Piyer gijaŋ vasi u boy ma li ayna ki na halaŋ, nam dasi ana,

⁵ «An ay hu ɦoŋzi ma ŋgolna Yoppe a cen Lona ni vana tak tam irinu. An gol irinu ni vana ay giɗi u ladarana kolo huulona, njuni keŋem fiɗi ndi ay kaŋga egenu.

⁶ An gol hu va ma njunina na ni wi hu ni mburi suu gayasi fiɗi fiɗina u tlesuu ŋgoo bagi suu ɦaram kaŋgana u layagina huwa.

⁷ An hum della dan ana, Piyer col kolo ciya, komma.

⁸ An hoŋom dira ana, Ka naɗi Bu Suuna, va ma njenje zozot ko wanni na ka bay kal funun tuwa.

⁹ Del ndaɗta hoŋon dira ay kolo huulona olo ana, va ma Lona di kam ana jiviyana, aŋ golom ko va ma njenje na oloɗi.

¹⁰ Dok di ko ndaɗta na yam hindi ni tle asina hoŋ kolo huulona gaw.

¹¹ Hu li namma na gaw ni suuna u tasi hindi mba fan hu zira an buu hura, suu asina ay ni Sesare sunusi ay ni kanu.

¹² Musuk Lonara dan ana tuɗ u asiya saa vaɗi. Gorseygina karkiya tuɗ u an may, ami cukumi kalafi hu ziŋ Korniyena u dlami halaŋ.

¹³ Nam Korniye vami u boyna ana nam hu ziim wanni wi sa sunda huulona mba dam ana, Aŋ cuk suu sunda kay Simon ma semma geleɗta ana Piyerna ha hu Yoppe nam mbaya.

¹⁴ Nam hin mba daŋ boy ma aŋ hin suɗ ki u namma u suu maŋŋa halaŋ.

¹⁵ An gijaŋ ɓakŋa may ni Musuk Lonara mba cuk kasi ko ndaɗ mba kaygi jewra na may.

¹⁶ Ni an humun gan kay boy ma Bu Suuna di ana, Jaŋ mbus suuna batemma ni u yona, agi hin mbus suuna batemma ni u Musuk Lonara.

¹⁷ Lona ɦasi ni ko nam ɦaygi aygi hu li ma aygi vi u Bu Suuna Yesu Kristura na may. An ni ge hin a doo Lonni ge?»

¹⁸ Asi hum boy namma na ni seŋ vunna ni na gaw, gijaŋ geleɗ Lona ana, «Gasi Lona ɦal voɗta maŋ njaf suu ka Juifnaɗina a asi jok iiri masira ki zeɗ, a fi iiri ta gasira lay.»

Suu vina hu Antiok

¹⁹ Lassa ŋgola ndi kay suu vina ta ci Etiyen kira, ni njayasi ki hu li ma daŋŋa zeɗ zeɗ. Suu ɦiw dukusi tuɗ gak gak tew ki Fenisi u Sipre u Antiok lay. Asi tuɗ ni di Boy Lonana ni maŋ suu Juifna doy hol hol.

²⁰ Hu li namma na ni suu vina suu ɦiw ay Sipre u Siren asi tuɗ Antiok di Boy ma Ayra maŋ njaf suu ka suu Juifnaɗina kay Bu Suuna Yesu.

²¹ Saɓakŋa vi Bu Suuna li ay u asiya, suuna ŋgolo viya, mbuɗ hurusi kay Bu Suuna.

²² Suu vi Kristuna hu Yerusalem hum boy namma na ni, asi sun Barnabas hu Antiok.

²³ Nam tew egesi tewni, wi ana Lona paɗ vunum ki kay suu vina ni nam furi ɦay, soosi hurusiya, a asi kak ɗegee u hurusi toki dew kay Bu Suuna.

²⁴ Barnabas ni sa ma jivina, tin hurum kay Boy Lonana, hurum oy u Musuk Lonara. Suuna ŋgolo vi u Bu Suuna.

²⁵ Barnabas tuɗ Tars a hal Sol.

²⁶ Nam fam ay fini, mbay u nam Antiok. Asi u dlasira jakka li basara duk suu asina, haɗ suuna cocoo. Asi gijaŋ yi suu haɗina ay jew ana suu vi Kristuna ay ni hu Antiok.

²⁷ Hu buu namma suu jok vun Lona ay Yerusalem mba Antiok.

²⁸ Maa dukusi dew sem ana Agabus, Musuk Lonara takam nam di ana mayra ŋgola hin ndi kay ndaŋgara halaŋ, may ndaɗta ndi ay ni hu li ma Klaud ka kaki a mul ŋgol nana.

²⁹ Suu haɗina di ana gegelay ni ɦal va ma nam famma a njun u gorsesi suu ha kaki Yudena.

³⁰ Va ma asi famma asi sunum ha maŋ suu ŋgolo suu ha Yudena ko Barnabas u Sol.