SUNDA 10 - Boy Lonana

Piyer u Korniye

¹ San dew hu ɦoŋzina Sesare sem ana Korniye, nammi sa ma ŋgol asgaana vi suu Romma, suu yasi ana Italina.

² Nammi sa ma ɗegeena u suu mamsina halaŋ, nam tuɗ hu tokka geleɗ Lona tew tew, nam njun u suu Juif suu hawra, cen Lona tew tew may.

³ Fali taa dew ni fiɗigi a boyogina yow wa ma funa wanni, sa sunda huulona tak tam irimu, nam wi sa sunda huulona mba varam dam ana, «Korniye.»

⁴ Nam wi sa sunda huulona na ni tam mbuɗ ndaana, nam joɓom ana, «Nanage Bu Suuna?» Sa sunda huulona hoŋom dira ana, «Lona vaŋ cen maŋga wa, u njunda aŋ ka njun u suu hawra ni nam humum gam ay kaŋ wa.

⁵ Cecemi aŋ sun suu maŋ suu sunda hu Yoppe, kay sana dew yam ana Simon sem ma geleɗta ana Piyer.

⁶ Nam ka buu vi sa ma li sun ɗikka ziim keŋ mbo lum ma ŋgolna na tok, sem ana Simon.»

⁷ Sa sunda huulona gi tam gini Korniye yi suu mam suu sunda mba', yi sa ma asgaa ma sunumma dew may, kay nammi sa ma ɗegeena.

⁸ Nam ɓakasi dla ndaɗta halaŋ hin cukusi sunda Yoppe gaw.

⁹ Vin maɗiira ni asi cuk tasi hu voɗta mba tew tok eg ɦoŋzina yam ana Yoppe, ni Piyer ɗiŋ kolo kay yam zira faali a cen Lona.

¹⁰ Ni mayra ka camu, nam min a ti vaa, asi ka yam funa ay tu may, gola ni vana tak tam irimu.

¹¹ Nam gol irim ha kolo na ni, huulona mal kiyo, vana ay giɗi u ladarana keŋem fiɗi ndi ay kaŋgaa.

¹² Hu va ma giɗi namma wanni njaf tlena halaŋ huwa, tlesuu gayasi fiɗina, u suu ɦaram kaŋgana, u layagina lay halaŋ huwa.

¹³ Della ay kolo huulona dam ana, «Piyer col kolo casi, komosiya.»

¹⁴ Piyer hoŋ dira ana, «Ka naɗi Bu Suuna, an bay ti va ma zozotta njenje ko wanni na tuwa.»

¹⁵ Del ndaɗta hoŋ dam olo ana, «Gola va ma Lona di kam ana jiviyana ka njenje oloɗi.»

¹⁶ Dira ndaɗta dam yam hindi. Kak njokŋi tlesuu giɗi asina hoŋ kolo huulona ni na gaw.

¹⁷ Piyer saa hurum ɗaŋi ana u boy va ma tak tam irim namma ni a va mege? Hu li ma namma na ni suu Korniye cukusi ay sundana ka joɓ ay kay ziŋ Simonna may ni, asi coli doli ni fun ziim gaw.

¹⁸ Asi joɓ ɗaŋŋi ana, «Piyer ma yam ana Simon buu ni tani su?»

¹⁹ Piyer ka saa kay va ma tak tam irimma gak gak may, ni Musuk Lonara hin dam ana, «Aŋ gola suuna hindi ka halaŋu.

²⁰ Col kolo ɗiŋ haki kaŋga tuɗ u asiya, saa vaɗi, an sunusi ay ni anu.»

²¹ Piyer ɗiŋ ay ki kaŋga eg suu asina ɗiŋi dasi ana, «An ni sa ma agi halamma. Agi mba halan ni kay mege?»

²² Asi hoŋom dira ana, «Sa ma ŋgol asgaana Korniye sunummi ay ni namu. Nammi sa ma ɗegeena ma vi u Lonna, suu Juifna halaŋ lay ni minimu. Sa sunda huulona tak tam irim dam ana, nam yaŋ ay varamu, aŋ hin mba dam boy ma huruŋŋa.»

²³ Piyer cukusi varam ca ni ɦasi li ma buuna. Vin maɗiira ni nam hin tuɗ usiya. Gorsesi suu Yoppe suu ɦiw tuɗ usi hu lay.

²⁴ Hu buu ma ŋgoo daganna wanni nam mba Sesare may ni Korniye yi suu mam suu somora u banayamma egem a juɓusi vokosira.

²⁵ Hu li ma Piyer kal ha vona may ni Korniye mba ŋgafam vokomu, gi tam kaŋga fokomu.

²⁶ Piyer colom kolo dam ana, «An ni sana ko aŋ na may.»

²⁷ Piyer ɓak ko tam u Korniye may hin kal ha kalafiya ni fi suuna moli cocoo.

²⁸ Nam dasi ana, «Agi wi ana suu Juifna hu viisira u Lona ni ka ŋgaf u njaf suu daŋŋaɗi, kal varasiɗi lay. Anu, Lona dan ana gol sa irin njenje ko ka ndaki a tuɗ varambi naɗi.

²⁹ Ni kay ndaɗta agi yan an mbay ni hurun ka ɓorowi mba' mbaɗi, an joɓogi ni kay boy ma agi yan ay kamma.»

³⁰ Korniye hoŋom dira ana, «Buuna ki ca ni hindi faɗta ko wandara na, fiɗigi boyogina yow wa ma funa, an a cen Lona varan voo gol irinu ni, sana coli fokon u barawna weleɗ tamma wilik wilik.

³¹ Nam dan ana, Korniye Lona humuŋ cen maŋga wa, humum ka gam kay njunda aŋ njun u suu hawra lay.

³² Cuk suuna sunda hu Yoppe yi sa ma sem ana Simon sem ma geleɗta ana Piyerna aya. Nam ka kaki vi Simon ma li sun ɗikka, ziim ka cuki fun mbo lumma ŋgolna.

³³ An cuk suuna ha ni na zak gaw a halaŋga, cecemi aŋ mba wa may, ami ka tani halaŋ a hum va ma Bu Suuna ɦaŋŋa a damma.»

Piyer paɗ bolla vi Korniye

³⁴ Piyer gijaŋ di boyna ɗaŋŋi ana, «Cecemi an wi ki gasi ana Lona ka ɓorow ii suunaɗi.

³⁵ Suuna halaŋ lini sana hu njaf maanagelay ma li ndaana u Lona li dlara ɗegeera ni ma irim jivina gaw.

³⁶ Lona sun boy mamma ay maŋ suu Israelna, nam dasi Boy ma Ayra ana heɓpa ni hu Yesu Kristu nam dew ni Bu Suuna vi suuna halaŋ.

³⁷ Agi wi dla mayra li ay hu Yude halaŋ halaŋga, gi jaŋŋa ay hu Galile ŋgoo boy ma Jaŋ dam kay batemma na.

³⁸ Agi wi ana Lona njay saɓakŋa vi Musuk mamba kay Yesu ma Nazaretna. Agi wi Yesu poy hu mbassa daŋga daŋga, li jivira ŋgolo, suu Satanna njunusi kaŋgana nam mbuɗusi ki jiviya, kay Lona ka u namu.

³⁹ Dlara nam laɗ hu mbassa Juiffa u Yerusalemba halaŋ ami ni suu wi boy namma u irimina. Asi ɓalam ki kolo hu gu ma garakŋa cam kiyo.

⁴⁰ Lona colom ki kolo iiri hu buu ma hindina, nam ɦam a nam tak tam ki ii suuna.

⁴¹ Nam tak tammi ka ii suuna halaŋgi, ni irimi ami suu nam manami ana ami ni suu diki kamma. Hu li ma Lona colom ki kolo hu miɗna iirina, ami ti u nam lay, ci u nam lay.

⁴² Nam cukumi ana ami di ki maŋ suuna halaŋ, dasi ana nammi sa ma Lona colom a kaɓakŋa kay suu iirina u suu miɗina.

⁴³ Suu jok vun Lona halaŋ di ki kam ana sa ma tin hurum kamma u saɓakŋa vi semu co mamba hin bulum kiyo.»

Musuk Lonara mba kay njaf suu daŋŋa

⁴⁴ Hu li ma Piyer ka di boyna na ni Musuk Lonara mba kay suu toki humum boy mammana halaŋ.

⁴⁵ Suu Juif suu vina suu mbay u Piyerna wi ana Musuk Lonara mba njay kay njaf suu daŋŋa ni boy namma su ki kasi ɦay.

⁴⁶ Asi humusi asi ɓak u vun ma sa ka wambina geleɗ ŋgolia vi Lonara, nam Piyer hin di ana,

⁴⁷ «Sa ndak a doo suu asina bay mbususi batemma u yona su? Asi lay ni fi Musuk Lonara ko aygi na lay.»

⁴⁸ Nam di ana mbususi batemma u sem Yesu Kristu. Asi joɓ Piyer ana nam kak egesi buu njok tuwa.