SOOLLA 97 - Boy Lonana

Yawe ni Mulna

¹ Yawe ni mulna. Ko suu kay ndaŋgarana halaŋ geleɗemu, mbo lumma lay furiya.

² Ndufunda u ɗugulla ŋguy kamu, ɗegeera u gasira ni dlam mamba mulla.

³ Kura ka tuɗ fokomu, ndaɗ ŋgal suu babali mam suu ŋguy kamma ki halaŋ.

⁴ Weleɗ mamba li kiɗikka ki kay duliyara halaŋ, ndaŋgara waɗ na ni dlak ndaana.

⁵ Ҥinira law ki fok Yawe ko ndal dabaŋga na, fok Bu Suuna vi ndaŋgara halaŋ.

⁶ Huulona di ki kay ɗegee mamba, suuna halaŋ wam bibiŋil mamba.

⁷ Suu togol fulina halaŋ zolona vagi wa, agi suu ŋga tagi ɦayna. Agi loogi suu ɦawana halaŋ goɓogi ga fokomu.

⁸ Siyon humum delem wa ndaɗ ka furiya, ɦoŋzi ma Yudana halaŋ furiya, Yawe ay ɓak maŋ ma aŋ kaamma.

⁹ Kay aŋŋi Yawe, ma Kolo Day kay ndaŋgarana, aŋ su ki kay loogi suu daŋŋa halaŋ.

¹⁰ Agi suu minigi Yawena hini dla cora kiyo, nam ka gol iirira vi suu mam suu ɗegeena, nam buɗusi ki ko suu ka wi Lonaɗina.

¹¹ Kay suu ɗegeena kiɗikka ka li kasiya, furira ka kay suu hurusi jivina.

¹² Agi suu ɗegeena, furiyugi kay Yawe, geleɗegina yam sem ma teteɗna.