SOOLLA 96 - Boy Lonana

Soolla wilira ta gi deɓpa

¹ Gagi soolla wilira maŋ Yawe, gagi soolla maŋ Yawe, agi suuna kay ndaŋgara halaŋ.

² Gagi soolla maŋ Yawe gam deɓpa mamu. Di ki kay suɗ mamba hu buuna buuna halaŋ,

³ dam dla bibiŋil mamba ki duk njaf suuna halaŋ, dlaamba mbuɗ mbuɗta daɗ ki maŋ suuna halaŋ.

⁴ Kay Yawe dlam ŋgol cocoo, ndaki a sa ŋgaam daŋ may, nam ŋgolo, su kay loogi suu daŋŋa halaŋ.

⁵ Loogi suu vi suunana halaŋŋi ŋga tara ɦawaa. Yawe li huulona ni namu.

⁶ Bibiŋilla u weleɗta ka hu vogom tew tew, saɓakŋa u ŋgolla ka hu Ziim ma Teteɗna.

⁷ Agi njaf suuna halaŋ ɦagi maŋ Yawe bibiŋilla u saɓakŋa,

⁸ ɦal ŋgolla bibiŋilla ni maŋ sem Yawe dew. Mbaagi ɓivun magina ay hu ziimma,

⁹ lini teteɗta vi Yawe weleɗ fokogi wa ni agi goɓ ga fokomu, agi suu kay ndaŋgarana halaŋ, dlakagi ndaana komu.

¹⁰ Di ki duk suuna ana, «Yawe ni mulna. Na daŋ may duliyara kak saɓakŋa ni umu. Nam kaɓakŋa kay suuna ni u ɗegeera.»

¹¹ Ko huulona furiya, ko ndaŋgara ŋga Lona, mbo lum ŋgolna zam u tle suu dukumma halaŋ.

¹² Ko suuna hu lina halaŋ li luu ma furira, ko ŋgusugi suu bagina lay gi soolla furira,

¹³ fok Yawe kay nam ka mbaa. Nam mba ni a ti mulla kay ndaŋgara, nam hinni a mul ma ɗegeena kay njaf suuna, ti kay suuna u ɗegee mamba.