SOOLLA 95 - Boy Lonana

Soolla gi deɓpa

¹ Mbagi aya gaygi soolla furira maŋ Yawe, ŋgaaygi ɦini maygi ma suɗuygina.

² Takaygi taygi fokom u gi deɓpa, ŋgaaygina u soolla.

³ Kay Yawe ni Lo ma ŋgolna, ni mul ŋgol ma kolo kay loogina belna.

⁴ Duliyara halaŋŋi varamu, li ma zulzulna u ɦinira kolo fiyekka halaŋŋi varamu.

⁵ Lum ŋgolna ni varamu, nam lammi namu, u yam ndaŋgara suu warna ka kaɗta ura ɦawara halaŋ nam lasi ni namu.

⁶ Selegi aya, mbaygi, goɓoygi ga u vun gifiygi fok Yawe, ma laygina.

⁷ Kay nammi Looygina, nam ka goloygi ni namu, aygi ni yoori suu nam golosina. Cecemi agi wi ki ana agi ka hum umu,

⁸ soogi hurugi ki ko agi li ay hu Meribara na oloɗi, ko hu li ma agi ay ŋgoo bagi hu mbassa Massara naɗi.

⁹ Hu li namma somoyogi hin voɗta jivira kiyo, mbuɗ a tuk Lona na ɗow, asi hin wan sun manda may.

¹⁰ Basara na dok fiɗi ni asi ka li dlara u hurundaɗi, an di ana, «Suu asina ni suu ki baayna, asi ka wan voɗ mandaɗi.»

¹¹ Hu yaanda an suu tan ana, «Asi ka a cuk hu liin ma koɗ taraɗi.»