SOOLLA 94 - Boy Lonana

Lona ni sa ma kaɓakŋa

¹ Yawe, aŋŋi Lona ma kaɓakŋa, col koloo Lona, kaɓakŋa.

² Aŋŋi sa ma kaɓakŋa kay suuna halaŋ, kaɓakŋa kay suu ŋga tasina.

³ Yawe aŋ hin suu cona a lak gak gak tew ni ara na gage? Aŋ hinisi asi su kami ta ta ni saɓage?

⁴ Asi ka bu diffa, ŋgul suuna lay, asi ka ŋga tasi cocoo, ni suu li dla cora halaŋ.

⁵ Yawe asi ka caŋ suu maŋsina kiyo, asi hoŋoŋ yam suu maŋsina ki ga halaŋ.

⁶ Asi ci boyogi suu donona u koygina kiyo, asi ŋgaɗ gor suu kuyuna kiyo.

⁷ Asi di ana, «Yawe ka wiɗi, Lo ma vi Yakobma ka wiɗi.»

⁸ Suu giniŋ duk suuna halaŋŋa wagi kiyo, suu wiisira ka tuɗ dayɗina, na ni agi hin hum hu buu maa dew su?

⁹ Nam sa ma li humbana hin ka humbi ni nanage? Nam sa ma li iirana hin ka wiɗi ni nanage?

¹⁰ Nam gaɗ njaf suuna halaŋ, hin ka kaɓakŋaɗi ni nanage? Nammi sa ma ɦal wira maŋ sanana,

¹¹ Yawe wi ŋga tara vi sana hu dlaamba nam laɗta halaŋ.

¹² Yawe, furira ka kay sa ma aŋ gaɗamma, sa ma aŋ haɗam u gaɗ maŋgana,

¹³ a koɗom tam hu buu ma cona, hu li ma aŋ ka vek zulla kay suu li dla corana.

¹⁴ Kay Yawe ka hin suu mamsina kiɗi, nam ka hin mbas mamba kiɗi.

¹⁵ Hu li ma kaɓakŋa gasira hin mba kiyo, suu hurusi ɗegeena hin tuɗ u gasira.

¹⁶ Sa ma hin a ɓakan kay suu li dla cora ni gege? Ma hin a njun kasina ni gege?

¹⁷ Lini Yawe njunun ginɗi ni, an vunun hin gin seŋira ni na yerek yerek.

¹⁸ Hu li ma an di ana, «An ka puk gaana,» ni Yawe, ɗegee maŋga van ay kolo gaw.

¹⁹ Lini an ka saa cocoo ni aŋ mba ɗilin irinu.

²⁰ Aŋ ndoloŋ ka u suu kaɓak ma ci maɗnaɗi, asi tin dlara a ɓalak gaɗta kira.

²¹ Asi hal iirira vi suu ɗegeena, sa ma li va kaɗina asi halammi namu.

²² Na may Yawe mbuɗ ni ɦoŋziin ma saɓakŋa, Loonna ni ɦini man ma an ŋgay tan irimma.

²³ Nam hoŋosi dla coosira wa, nam bulumusi ki ni u coosira tok, Yawe, Looygina bulumusi ki wa.