SOOLLA 92 - Boy Lonana

Ŋga jivira vi Lonara

¹ Soolla gaɗ hu buu ma Sabbatna.

² A jivira ni ŋga ni Yawe, gi soolla u seŋu, Lo ma Kolo Dayna.

³ A di ki kay ɗegee maŋga hu maɗiira day, kay jivi maŋga hu njeŋgera halaŋ.

⁴ U diffa lay u diŋŋa lay u tlesuu bura zeɗ zeɗ lay.

⁵ Kay sun maŋga furiyun hurun cocoo, Yawe, aŋ wi sunda aŋ laɗ u koŋga na ni hurun furi cocoo.

⁶ Yawe, sun maŋga ndaɗ ŋgolo, dlaaŋga aŋ a laɗta sa ma ndak a waɗ uɗ kaɗi.

⁷ Sana ni giniŋi ka ndak a wi vaɗi, wiimba ka tuɗ dayɗi, nam ka ndak hum u dlaraɗi.

⁸ Lini suu bay ɗegeena ɗuf ko usuna na, lini suu li dla cora ɓo ko ndal usuna na lay, ni kay a hin baasi ki a fafaɗtara ɦawaa.

⁹ Na may aŋ ma kolona, aŋ ka ni a fafaɗta, Yawe.

¹⁰ Yawe, gol suu babali maŋsina, gola babali maŋsina hin ba kiyo, suu li dla cora halaŋ hin njay kiyo.

¹¹ Aŋ mbuɗun saɓakŋa ko vunda na, aŋ voon mbul ma heɓma kanu.

¹² Irin ka wi suu kuɗukunna haa, ka wi suu co suu a li yara u anna, humun ka humusi dlaasira kiyo.

¹³ Suu ɗegeena ɗuf ko manawra na, asi ni ko gu sedrena na.

¹⁴ Pii hu zi ma vi Yawena, asi ɗuf hu zira vi Looyginara.

¹⁵ Lini asi ki mbuɗi maa lay ni asi ka vuɗ gak gak, Kay asi ka u mbirisi egesi, humusi ɗuffi tew tew.

¹⁶ An di ki kay ɗegeera vi Yawe, «Nammi ɦini manda. Hurummi va ma co ka huɗi.»