SOOLLA 91 - Boy Lonana

Lona ni sa ma goloygina

¹ Sa ma kak hu li ma Kolo Dayna ka huna, nam ma buu u ŋgus Lona ma Saɓakŋa Kom Belna.

² An ɓak kay Yawe ana, «Nammi sa ma an ŋgay tan egemma, ni ɦoŋzi ma saɓakŋa, Loonna an tin saa manda ni kaŋ dew.»

³ Nam suɗuŋ ay ki hu bay ma vi sa ma li lamba ni namu, suɗuŋ ay ki ko tuguɗiira zeɗ zeɗta lay.

⁴ Nam gi garaŋam kaŋu, aŋ ay ŋgay ga ni u garaŋamu. Ɗegee mamba ni mbari maŋŋa u ɓagi maŋŋa may.

⁵ Aŋ ka li ndaa njeŋgera oloɗi, ka li ndaa mbuurura ka mun kolo faaliraɗi lay.

⁶ Ka li ndaa tuguɗiira zeɗ zeɗ ta ka kuɗuk duk ndufundaraɗi lay, ka li ndaa mbogom ma ka ci suuna faalinaɗi lay.

⁷ Lini suuna cuk ga keŋeŋ tani bup, keŋeŋ hiŋŋa bup bup doogo lay, aŋ ka ndi gaaɗi va ka laŋgi.

⁸ Mal iriŋ kiyo, gola aŋ hin wi warak ma suu bay ɗegeena a famma.

⁹ Na daŋ may Yawe, aŋŋi li ma an ŋgay tan huna, liiŋ ma kakŋa ni ma Kolo Dayna.

¹⁰ Hahaw taa ka hin mba kaŋgi, va ma a hin caŋ li ma aŋ buu huna ki kaɗi lay,

¹¹ kay nam hin cuk suu sunda huulona a goloŋ hu voɗ maŋga halaŋ.

¹² Asi hin tlaŋ ki kolo hu duk kosiya kay ana gogoyra daɓaŋ seŋgi.

¹³ Aŋ hin tuɗ kay gi dlona u magira, aŋ hin tay zindilna u dragoŋŋa ki gaa.

¹⁴ Lona di ana, kay nam njun tam egenu, an hin buɗum kiyo, hin golom kay nam wan senu.

¹⁵ Lini nam yanu ni an humumu, an hin kak u nam hu hahaw mamba, an hin buɗum kiyo, mbuɗum a sa bibiŋilna.

¹⁶ An hin ɦam buu ma fiyekŋa kay ndaŋgara, an hin takam suɗ manda.