SOOLLA 90 - Boy Lonana

MAGAARA FI ƊIRA SOOLLA 90—106 Lona ka din din, sana miɗ kiyo

¹ Cenda vi Moiz sa ma vi Lonna. Bu Suuna ay day day aŋŋi Loomi ma golomina.

² Jew bay ɦinira li tura, bay aŋ li ndaŋgara tu u tlesuu hu duliyarana tu lay, aŋ ka gak gakŋi Lona.

³ Aŋ hoŋ sana ki balamam duk ndaŋgara, kay aŋ di ana, ni goŋ Adamma hin hoŋŋi huwa.

⁴ Na daŋ may, basara buppa iriŋŋi ko kaara na, buu ma dewna iriŋŋi ko lerra dewra hu njeŋgera ɦawa na.

⁵ Aŋ daɓ iirira vi suuna ki ko suuna a buu senna ɦawa na, ko usu ma semeɗna siirim kina na,

⁶ maɗii ni ndaɗ ɓoo, fiɗigi ni ndaɗ so ki gaw may.

⁷ Na daŋ may, ami daɓ ki wa ko yaaŋga, tami mbuɗ ki ndaa koɗ cocoo.

⁸ Aŋ tinimi coomira kolo fokoŋu, dlaamira ŋgayra ki kiɗik iriŋ halaŋ.

⁹ Na daŋ may fok yaaŋga buu mamina daɓ ki wa, basa mamira hu duliyara ni ko njeŋgera dewra ɦawa na.

¹⁰ Basa mamira hu duliyara ni dok kiɗisiya, li ŋgol coco wa ni dok kalavandi may. Basa ndaɗta halaŋ daɓmi u lassa u wihawra may, na gaw ni iiri mamira kaɗi, ami ki ni daɓi gaw.

¹¹ Sa ma ndak a wi saɓak yaaŋga ni gege? Sa ma wi ndaa ma lam koŋŋa ni gege?

¹² Haɗami a ami wi ndum buurumiya, a saa mamira tin gaa may.

¹³ Yawe aŋ hin hoŋ ay ni saɓage? Wi hahaw suu maŋsina aya.

¹⁴ Maɗii feɗet gaw ni hoɓomi u ɗegee maŋga, ami hin gi soolla furira hu buu mamina halaŋ.

¹⁵ Buu maŋ ma aŋ gaɗamina mbuɗumina ki furira u basa mayra ami li lassa huruɗta lay.

¹⁶ Ko sun maŋga aŋ laɗta li ki kiɗik ii suu sun maŋsina, tak bibiŋil maŋga ki maŋ goryosiya.

¹⁷ Ko heɓpa vi Bu Suuna Loomina li kamiya. Ko ndaɗ soomi umi hu sunda ami ka laɗta, na daŋ may sunda ami laɗ u bik komira.