SOOLLA 9 - Boy Lonana

Gi deɓ Lona kay jivi mamba

¹ Soolla vi sa ma fok suu gi soollana, soolla vi David, gaɗ hu «Miɗna vi goona.»

² Yawe, an gaŋ deɓ u hurun halaŋ. An min takaŋ dlaaŋga mbuɗ mbuɗta ki maŋ suuna halaŋ.

³ An gi soolla furira ni kaŋ aŋu, an ŋgaaŋŋi aŋu, Lo ma kolona.

⁴ Hu li ma aŋ tak taŋ kina, suu duu u anna halaŋ hoŋ dagani, asi puk gaa viɗ ki lay.

⁵ Kay aŋŋi sa ma kaɓakŋa jivina, aŋ ka kaki kay dlam maŋga mulla, aŋ mbuɗun dlaanda ki jiviya.

⁶ Aŋ kaɓakŋa kay njaf suuna halaŋ, aŋ bulumusi sesi ki koŋ halaŋ.

⁷ Suu duu u amina dlaasira daɓ ki wa a fafaɗta, aŋ toosi ɦoŋziisina ki ga wa. Sa ma saa ay kasi ka oloɗi.

⁸ Yawe kak mulla ni a fafaɗta, dlam mamba mulla nam tiniɗ ni a kaɓakŋa.

⁹ Nam kaɓakŋa kay duliyara ni u voɗomu, nam kaɓakŋa kay suu warna ni u ɗegeera.

¹⁰ Yawe ni ɦoŋzi ma saɓakŋa kay suu ka lasna, hu li ma lassa ka lasina, nam suɗusiya.

¹¹ Suu waŋ seŋŋa ka saa ni kaŋu, Yawe, suu mbay egeŋŋa halaŋ, aŋ ka hinisi kiɗi.

¹² Yawe ka kaki hu Siyon, geleɗegina gam deɓpa. Takam sun mamba ŋgolora ki, maŋ njaf suuna halaŋ.

¹³ Kay nam sa sukul suu casi kina, humum ka gam kasi tew tew. Humum ka maa kay tii ma vi suu ka lasnaɗi.

¹⁴ Ҥi, Yawe, lan oora kanu, golonu suu babali mansina ka lasanu. An tew ki fun miɗna tok, aŋ suɗun ki wa.

¹⁵ Kay a an col ki fun ɦoŋzi ma Siyonna, dasi ki kay furi manda. An gaŋ deɓpa wanda, an gi soolla u furira kay aŋ suɗun ki wa.

¹⁶ Njaf suu daŋŋa cuk hu zulla asi vegeɗta tok, sesi cuk hu bayra asi gunuɗta.

¹⁷ Yawe tak tam ki kaɓakŋa wa, suu li dla cora cuk kaŋga hu mbeleŋ masina wa.

¹⁸ Suu cona halaŋ tuɗ irisi hu lina vi suu miɗina, u njaf suu maa Lona kina halaŋ.

¹⁹ Suu hahawra humum ka maa kasiɗi a fafaɗta, saa masira ka a maa kiɗi.

²⁰ Col koloo, Yawe, ka hin sana su kanɗi. A njaf suu daŋŋa halaŋ ɓakŋa mba vasiya.

²¹ Yawe hin ndaaraŋ kay njaf suu daŋŋa, kay a asi wi ki ana asi ni suu ɦawana.