SOOLLA 88 - Boy Lonana

Cenda kay Njunda

¹ Soolla vi sa ma fok suu gi soollana, soolla haɗta vi goryoŋ Korena, gaɗ u diffa u suu vi Heman ma Ezrana.

² Yawe, Loonna, sa suɗta. Faali lay, njeŋge lay, an ka yi ha egeŋu.

³ Ko cen manda tew ay ta ta egeŋu, tin humuŋ ha humun tii manna.

⁴ Kay cecemi iiri manda ka las cocoo, an tew ki na tok fun miɗna.

⁵ An ki ndumi ni duk suu miɗina, anni ko sa ma dlam ki daɓina na.

⁶ An ki gi duk suu miɗina, ko sa ma ki gi ga hu zul maɗnana na, aŋ humuŋ ka kay suu asina oloɗi, kay asina dukusi u aŋŋi day.

⁷ Aŋ gan ga hu zulla uɗ derewra, duk ndufunda ŋgolla.

⁸ Yaaŋga mbuɗ kan nek cocoo, ndaɗ tluɓun ki ko mbo lumma na.

⁹ Aŋ ɦuɗun banayanna ha ki egen day, aŋ mbuɗun ki irisi a saasi ma gonokka, an cemi dugi kalafi ka fi voɗta kal kiɗi.

¹⁰ Irin mbuɗ ki maŋi ko wihawra. An yaŋŋi hu buuna halaŋ, Yawe, kon ha bari kolo ni maŋu.

¹¹ Aŋ ndak a li dlara mbuɗ mbuɗta kay suu miɗina su? Suu dlara su ki kasi asina ndak a yow ki kolo geleɗeŋ su?

¹² Suu hu zul maɗnana ndak di kay min maŋga, suu ay hu zul ŋgollana ndak a di kay ɗegee maŋga su?

¹³ Dlaaŋga mbuɗ mbuɗta hin tak taɗ ki duk ndufunda, ɗegee maŋga tak ki hu mbassa maa kira may.

¹⁴ An may ni yi ha kolo ni egeŋu, Yawe, Maɗii ni cen manda tuɗ ha ni egeŋu.

¹⁵ Yawe, aŋ noyon ki ni kay mege? Aŋ ŋgay iriŋ ki konni kay mege?

¹⁶ Ay u goo tan day ta ta cemi an ka hu lassa, an cemi u ndaaraŋu, an ka viɗi cocoo.

¹⁷ Yaaŋga halaŋ jak ki kanu, ndaaraŋ ka viɗin kiyo.

¹⁸ Hu buuna halaŋ ndaɗ ŋguy ki kan ko mbona na, ki hu li ma an ka huna halaŋ.

¹⁹ Aŋ dikin ndarayanna u banayanna ha ki egen halaŋ. Banan ma cemina ni ndufunda.