SOOLLA 86 - Boy Lonana

Cenda vi sa ma ka hu tukkana

¹ Cenda vi David. Yawe, tin humuŋu, hoŋon dira kay anni sa ma wihawra, ki hahaw coco lay.

² Ŋgomon iiri manda kay anni sa ma laŋ ndaaraŋŋa. Aŋŋi Loonna, suɗ saaŋ ma sunda kiyo, an tin saa manda ni kaŋ dew.

³ Bu Suuna wan hahawan aya, hu buuna halaŋ an yaŋŋi aŋu.

⁴ Li dlara furi huu saaŋ ma sunda aya, kay an maɗ kon ha kolo ni egeŋu, Bu Suuna.

⁵ Bu Suuna, aŋŋi sa ma jivina, ma bulum cora kina, aŋ sa ma ɗegeena ka hum suu ka yaŋŋa tew tew.

⁶ Tin humuŋu, humun cen manda, Yawe, humun delenda an yaŋga ha jiviya.

⁷ Hu buu ma an ka hu yoora an yaŋŋi aŋu, aŋ hoŋon dira may.

⁸ Duk loogina halaŋ, lo ma ko aŋ na kaɗi, Bu Suuna. Dlara aŋ laɗta sa ma ndak a humuɗ uɗ ki kaɗi.

⁹ Njaf suu aŋ lasina halaŋ hin mba goɓ ga fokoŋu, Bu Suuna, hin a seŋ fi bibiŋilla fok suuna.

¹⁰ Kay aŋŋi ŋgolo, aŋ li dlara mbuɗ mbuɗta, aŋ a Lona ni aŋ dew daŋ.

¹¹ Yawe takan voɗ maŋga, an min tuɗ ni hu gasi maŋga, mbuɗun hurun a an laŋŋi ndaaraŋ dew.

¹² Bu Suuna, Loonna, an min geleɗeŋ u hurun halaŋ, an min ŋgaaŋ seŋ na gak gak a fafaɗta,

¹³ kay ɗegee maŋga lan jivi cocoo. Aŋ suɗun ay ki hu zulla kura vi suu miɗinara.

¹⁴ Lona suu ŋga tasina ka lanu, suu ci maɗna taɓ u tasi a halan iiri manda, asi ka caa yasi kaŋ aŋ Lonaɗi.

¹⁵ May aŋ, Bu Suuna, Lo ma wi hahaw suuna, huruŋ ka ɓeŋ zakgi, huruŋ oy u ɗegeera u gasira,

¹⁶ mbuɗ iriŋ ay egenu, wan hahawan aya, ɦal saɓak maŋŋa ay maŋ saaŋ ma sunda, suɗ goryoŋ caaŋga sunda kiyo.

¹⁷ Tak dlaaŋga mbuɗ mbuɗta ki kanu kay a suu babali mansina wi na ni mbuɗ ki zolona, kay aŋ, Yawe, ni sa ma njun unna. Aŋŋi sa ma ɗilin irinna.