SOOLLA 85 - Boy Lonana

Cenda kay ɗegeera u heɓpa

¹ Soolla vi sa ma fok suu gi soollana, soolla vi goryoŋ Korena.

² Yawe, aŋ tak min maŋga ki hu mbas maŋga wa, aŋ hoŋ suu vi Yakob suu ay ki ŋgayrana ay vo wa.

³ Aŋ bulum cora vi suu maŋsina ki wa, aŋ baarasi yam suluk masina ki halaŋ.

⁴ Aŋ hin yaaŋga laɗ egemira ki wa, cemi aŋ cuk huruŋ ga egemi wa.

⁵ Hoŋomi ay voo, Lona, saami ma suɗta, hin huruŋ ma haɗ egemina kiyo.

⁶ Aŋ hin huruŋ egemi yara na gak gak su? Aŋ tuɗ fok u yara egemi hu basara ha fokka na gak su?

⁷ Aŋŋi ka sa ma ana ami lak iiriyana ɗi su? Aŋŋi a furira vi suu maŋsinaraɗi su?

⁸ Yawe, takami ɗegee maŋga, ɦami suɗ maŋga may.

⁹ An hummi va ma Yawe, Lona, damma, nam di ana, «Heɓpa» maŋ suu mamsina, maŋ suu ɗegeena. Mariyaɗ asi hoŋ hu dlaasira dawira oloɗi.

¹⁰ Suɗ mamba ka ni tok eg suu lam ndaaramma, bibiŋilla hin kak hu mbas maygira.

¹¹ Ɗegeera u gasira ŋgaf tasi wa, asi furi tasi u heɓpa u ɗegeera.

¹² Gasira day ay ga duk ndaŋgara, ɗegeera sii ay ga ni huulona may.

¹³ Yawe u tamba ɦal jivira ay ni namu, ndaŋga maygira feɗeɗ ni ndaɗ may.

¹⁴ Dlara ɗegeera ka tuɗ ha fokoɗu, seɗ ma tuɗta wak voɗta haa.