SOOLLA 83 - Boy Lonana

Cenda vi suu Israelna hu li ma suuna ka lasasina

¹ Soolla vi Azaf.

² Ҥi, Lona, kal ay kiyo, seŋ taŋgi, Lona, kak ɦawa na enɗi.

³ Gola, suu babali maŋsina ka mbaya, suu gonok maŋsina ka tli yasi koloo.

⁴ Asi ka di ŋgeŋŋa kay suu maŋsina, asi ka ŋgaa vunusi kay suu maŋsina,

⁵ asi di tasi ana, «Tuɗuygiya, tuɗuygi gasi njafasi kiyo ko sa hum sem suu Israelna hu duliyara oloɗi.»

⁶ Asi halaŋ vi vunusi ko tasi dew, asi vi galamba ni a duu u aŋga,

⁷ suu Edomma u suu Ismaelna, suu Moabma u goryoŋ Hagarna,

⁸ Gebal, Amon, Amalek, mbassa Filistinda u suu hu mbassa Tirra.

⁹ Suu Asirina cuk tasi egesi hu lay, asi ka njun u goryoŋ Lotna.

¹⁰ Lasi ko aŋ li suu Madiyanna ko suu Siserana u Yabinna hu mbo ma Kisonna na.

¹¹ Asi ba ki hu zi ma En Dorna, asi mbuɗ ki a sirgit ma cim ndaŋgara.

¹² Goryoŋ muli masisinana lasi ko ndal Oreb u Zebna, muli masisina ko ndal Zeba u Salmunna na.

¹³ Asi suu may suu di ana, «Ami su kay mbassa vi Lonara wanna.»

¹⁴ Loonna hinisi sii ki semeɗna ko ndal barra na, ko usu ma semeɗna siirim kina na.

¹⁵ Ko ku mayra zak lamba kira na, ko ndoos may ma kuluɓ yam ɦinira kina na,

¹⁶ dikisi ha ki u semeɗ maŋ ma cocona, mbuɗusi ha ki ndaana u babaa maŋŋa.

¹⁷ Mbuɗusi ki zolona, Yawe, a asi mbuɗ halaŋŋi seŋ na ɗow, Yawe.

¹⁸ Asi mbuɗ ki zolona li ndaana tew tew, asi ba ha ki hu zolo masi namma.

¹⁹ A asi wi ki ana sem ma ana, Yawena, ni kaŋ aŋ dew, aŋŋi sa ma ay kolo day kay ndaŋgara belna.