SOOLLA 81 - Boy Lonana

Soolla luuna

¹ Soolla vi sa ma fok suu gi soollana, soolla vi Azaf, gaɗ u tlesuu luuna.

² Gi soolla geleɗ Lona u furira, nammi saɓakaya, ŋgaagi Lo ma vi Yakobma.

³ Gagi soolla luuna, buugi dadarina u diŋŋa u tlesuu luuna zeɗ zeɗ.

⁴ Buugi tokolomma hu til ma wilina, hu buu ma luuna hu li ma tilna ki haɓma.

⁵ Dla ndaɗta kay suu Israelna ni a gaɗta, ni dla mayra Lona vi Yakob daɗta,

⁶ ni gaɗta nam tiniɗ ka kay Yoseffa. Hu li ma nam kal ay ki duk suu Egiptena. An ka hum della an ka waɗɗira, di ana,

⁷ an tlam nekka ki kam wa, nekka ay komba nam tiniɗ ki ga wa.

⁸ Hu li ma aŋ ka yi kolo kay lassa an buɗuŋ ki wa, an hoŋoŋ dira ay ki ŋgay gumun wa, an tukuŋ ay u dlara tok eg mbo ma Meribana.

⁹ Suu mansina humugi haa, an dagi ha ni gasi, agi suu Israelna an min ana agi hum ha jiviya,

¹⁰ hinigi loogi suu daŋŋa varagiɗi, agi goɓ gaa fok lo ma daŋgi.

¹¹ Anni Yawe, Loogina ni, ma kalagi ay ki hu mbassa Egiptera, malagi vunugi kiyo, an min ɦagi tina.

¹² Na may suu mansina humun delen kaɗi, suu Israelna ka mininɗi,

¹³ an dikisi ki u hurusi ma sooyna, asi li dlara asi min a laɗta.

¹⁴ Na, lini suu mansina humunu ni, lini suu Israelna a tlan voɗ manda ni,

¹⁵ an ndak a hoŋosi yam suu babali masisina fokosi gaa, an mbuɗ hurun eg suu gonok masisina.

¹⁶ Suu gonokka u Yawena halaŋ yasi hin hoŋ gaa, ɓakŋa kaay kasi ni a fafaɗta.

¹⁷ Nam ɦal ti ma jivina maŋ suu Israelna, nam hoɓosi u mbul yum ma ŋgoo bagina.