SOOLLA 80 - Boy Lonana

Cenda kay njunda

¹ Soolla vi sa ma fok suu gi soollana, eg ɓo tlena, soolla dikira vi Azaf.

² Aŋ, sa ma taa suu Israelna, hum haa. Aŋ, sa ma ka gol Yosef ko yoorina nana, aŋ, sa ma kaki kay Serubimma, tak taŋ ay kiyo.

³ Tak taŋ ay ki ii suu Efrayimma, u suu Benjaminna u suu vi Manassena, col saɓak maŋŋa koloo, mbaya suɗumi kiyo.

⁴ Lona hoŋomi koloo balamamiya, tak kiɗik maŋga kamiya, suɗumi kiyo.

⁵ Yawe, Lona ma Saɓakŋa Kom Belna, huruŋ ɓeŋ eg cenda vi suu maŋsina na gak gak tew ni ara gage?

⁶ Suu maŋsina ka ti tina ni u simina, ci yona ni u simina coco lay.

⁷ Aŋ mbuɗumi ki a va ma yara eg suu vok ziimina, suu babali mamsina ka san umi cocoo.

⁸ Lona ma Saɓakŋa Kom Belna, hoŋomi ay balamamiya, tak kiɗik maŋga ay kamiya, suɗumi kiyo.

⁹ Aŋ paɗ gugutlura ay ki hu mbassa Egiptera, mba dik njaf suu daŋŋa ki, hin paɗ ki hu joosiya.

¹⁰ Aŋ miniɗ ndaŋgara ki uɗ jiviya kay a ndaɗ kal sariyaɗ ki gaa, a ndaɗ oy ki kay yam mbas ndaɗta halaŋ.

¹¹ Ŋgusuɗ kuluɓ ki kay ɦinira halaŋ, koɗ la ki kolo hum gu ma fiyek ma yam ana sedrena.

¹² Koɗ tuɗ ta ta tew mbo lum ma ŋgolna, koɗ ma daŋŋa tuɗ tew mbo lum ma Eufratna may.

¹³ Aŋ hin hawaɗ kaa ma ŋguy kaɗna ki ni amege? Cemi gegelay ma jak tuɗta ka kuluɗ vuɗuɗ kiyo.

¹⁴ Zeŋ ma col ay ŋgoo bagina ka ɓeŋeɗ vuɗuɗ kiyo, tle bagi suu ŋgoo hu senenana ka taɗ ki cocoo.

¹⁵ Lona ma Saɓakŋa Kom Belna, hoŋ aya, aŋ ay huulona day ni gol iriŋ aya, wiya doo ay kay sene gugutlu namma.

¹⁶ Suɗ gugutlu ma aŋ pam u bik koŋŋa, u gor suu aŋ cukusi u taŋgana.

¹⁷ Gola cemi asi ka kaaɗ kiyo, ŋgalaɗ ki lay, asi ka laɗ cocoo, ndaɗ hin daɓ kiyo.

¹⁸ Baa koŋ kay sa ma ka kaki hu bik koŋ ma njufna, kay goŋ sana ma aŋ ɦam saɓakŋana.

¹⁹ Ami ka hiniŋ ki oloɗi, aŋ golomiya hinimi lak iiriya, ami hin yaŋŋi seŋu.

²⁰ Yawe Lona, ma Saɓakŋa Kom Belna, hoŋomi aya, Tak kiɗik maŋga ay kamiya, suɗumi kiyo.