SOOLLA 78 - Boy Lonana

Dlara Lona laɗ u suu mam suu Israelna

¹ Soolla haɗta vi Azaf. Agi suu mansina humungi gaɗ manda haa, tinigi humugi hum boy ma kal ha ki fununna.

² An min njaɗagi dlara ha u ndal boyna kay dla mayra jak ay ki jewra.

³ Va ma aygi humum lay, wam layna, somoyoygi hiniygi boy namma koygi may,

⁴ aygi ka ndak a ŋgay boy namma ki ko goryosiɗi, aygi haɗam ka maŋ njafaygi ma hin ka ŋgoroygi daganna may. A asi wi bibiŋilla vi Yawera, saɓak mamma ni dlara mbuɗ mbuɗta nam laɗta.

⁵ Nam ɦal gaɗta maŋ suu Israelna, njaf suu vi Yakobma fi gaɗta. Ndaɗ di somoyogi ana, asi jogoɗ ka maŋ goryosiya.

⁶ Kay ana suu ka daganna haɗ gaɗ ndaɗta ka may. Maŋ goryosi suu hin vuɗna lay, asi yow kolo haɗasira.

⁷ Ko asi tin hurusi ni kay Lona dew, ko asi maa dlara Lona laɗta kiɗi, ko asi li u gaɗ mamba jiviya.

⁸ Ko asi li ko somoyosi naɗi, asi suu hin vun Lona ki mbuɗ yara u namma, njaf suu hurusi cona saa masira ka taɓ ura vi Lonaraɗi.

⁹ Lini njaf suu vi Efrayim, suu mbuurura, suu wi duuna ɦayna yow liŋa, ni

¹⁰ tak ki ana asi gol banara Lona vaɗ u asira ka jiviɗi, asi min ka a li u gaɗta vi Lonaraɗi.

¹¹ Asi maa dlara mbuɗ mbuɗta Lona laɗ u asira kiyo, Maa dlara nam takasira zeɗ zeɗta ki lay.

¹² Nam li dlara mbuɗta ii somoyosiya, ay hu mbassa Egiptera, hu ndaŋgara Tanissa lay.

¹³ Nam ɓorow mbo lumma ŋgolna ki duku, hinisi voɗta asi jak kiyo, col mbona ki kolo ko daamma na.

¹⁴ Faali ni nam takasi voɗta, kuluɓusi ɗugulla kasiya, njeŋge ni nam lasi kiɗikka kasi u kura.

¹⁵ Nam wak ɦinira ŋgoo bagira, law yo cira asi ciya, yo namma ka daɓ kiɗi.

¹⁶ Nam munusi mbona ay ki duk ɦinira, mbo namma ɓaɗ ko mbo lumma na.

¹⁷ Lay ni asi tuɗ fok a li dla cora eg Lona gak, ŋgoo bagi hu fulla asi mbuɗ hurusi ki cora eg Lona ma ha kolo dayna.

¹⁸ Asi tuk Lona u dlara, joɓ ana asi min a ti ni u min masira.

¹⁹ Asi cen Lona di ana, «Na ni Lona hin ndak a ɦasi tina ki ŋgoo duk gura tani su?

²⁰ Na daŋ may, nam waɗ ɦinira, yona hin mbay cocoo, na ni nam hin ndak a ɦal funa u tliwna maŋ suuna na lay su?»

²¹ Lona, Yawe, hum boy namma na ni, hurum ɓeŋ eg Yakob, sunusi kura ay kasiya, yaamba ɦuɗ fok kay suu Israelna.

²² Kay asi tin hurusi ka kay Lonaɗi, asi vi ka ana nam a suɗusi kiyoraɗi.

²³ Nam di ha kolo maŋ ɗugulla, huulona mal ay kiyo.

²⁴ Nam sasi va ma yam ana manna na ay ga ko lona na, nam ɦasi ni wa ma ay kolo huulona.

²⁵ Gegelay ti ni ti ma vi suu sunda huulona, nam ɦasi tlesuu tira asi ti ki u mayasiya.

²⁶ Nam ɦuɗ semeɗ ma col ay u maɗiinana, ha gi kolo egesi day. Mbaarasi semeɗ ma col ay dalina ay egesi tok u saɓak mamma.

²⁷ Nam sasi tliwna ay ga kasi ko gugum ndaŋgara na, cukusi laygina ay ga ko ndal ŋgetl ma hu lum ŋgolnana na.

²⁸ Nam cukusi ni hu ziisi may. Hu li ma ŋguy kasina lay halaŋ.

²⁹ Asi tiya, hoɓ coco lay, nam tlasi saara kasira ki halaŋ.

³⁰ Na lay ni hurusi ma haɗ kay tlena hin ka ki tuɗi, vunusi ki oy u tliwna tu lay.

³¹ Lona hurum ɓeŋ egesiya, casi suu masi suu garaŋina kiyo, vi gorzoŋi suu Israelna ki gaa.

³² Ko ndaɗta na lay ni asi tuɗ fok a li dla cora gak gak, ka saa kay dlara mbuɗ mbuɗta vi Lonaraɗi.

³³ Nam hoŋosi buu masina ki dagani, basa masira hu ndaŋgara daɓ ni u ndaana.

³⁴ Hu li ma Lona gijaŋ a casina, asi gijaŋŋa a halamba may, asi wi coosira, hoŋ irisi ay egemu.

³⁵ Humusi gasi ana Lona ni ɦini masina, Lona ma ay kolo dayna ni sa ma njun kasina.

³⁶ Na may vunusi ka di dlara kaboyna, dlara asi daɗta halaŋŋi kaboyna.

³⁷ Hurusi ka tini gasi eŋ kambi, asi ka saa kay galamba nam vaɗ u asiraɗi.

³⁸ Lona ma wi hahaw suuna nam hin dlara casi kira tani bulumusi coosira kiyo. Nam tew tew ni heɓ yaamba gaa, nam ka tak yaamba ki kiɗik belɗi.

³⁹ Kay nam wi ki ana sa warna ni tliwna ɦawaa, nammi ko semeɗ ma sii ki ka hoŋ ay daganɗina ɦawa na.

⁴⁰ Ay ŋgoo bagi ni asi mbuɗ hurusi ay cora eg Lona. Asi ɓalakam hurum cocoo.

⁴¹ Asi hal a tuk tasi u Lona, asi ɓeŋ hu ma teteɗ ma vi suu Israelna.

⁴² Humusi ka gasi kay dlara Lona laɗ u bik kombaɗi, hu buu ma nam gususi ay ki ko suu babali masisinana.

⁴³ Nam tak dlara mbuɗ mbuɗta maŋ suu Egiptena, li dlara yow yowna hu mbassa Tanissa.

⁴⁴ Nam mbuɗ mbona ki busuna, u yo masi ma hu goloŋgana lay, kay a sa ci yo namma oloɗi.

⁴⁵ Nam cukusi lolona kasiya, nam cukusi gigidina kasi lay nam lasasiya.

⁴⁶ Nam cukusi jeena ki kay waasina. Tlegeyesi halaŋ baarina tasi kiyo.

⁴⁷ Nam si mbo dlaŋmagina hu sene gugutlura, ɓalakaɗ kiyo, ɓalakasi ŋgusugi tulum masina ki u dlaŋmagi ma ŋgolona lay.

⁴⁸ Nam hinisi yoori masisina duk dlaŋmagina, yoori masina weleɗta casi ki lay.

⁴⁹ Nam hin yaamba mba kasi ko ndal kura na, nam sunusi sa sunda huulona ma cona ay kasiya.

⁵⁰ Hin voɗ yaamba ay ki kasiya, nam ka doo kasi ko miɗna oloɗi, nam hinisi iiri masira duk tuguɗiira cora.

⁵¹ Nam ci gor suu ŋgolo suu vuɗ jew suu Egiptena ki halaŋ, goryoŋ mulina suu varak balamasina hu ziginina vi suu Kamma miɗ ki lay.

⁵² Nam cuk suu mamsina ay ki kiɗik ko yoorina na, nam tuɗusi ki ŋgoo bagi hu fulla ko timigiina na.

⁵³ Nam ŋgomosi u jivira va ma ŋgenesi kaɗi, mbona tli fokosi lay ni, asi ka li ndaaɗi, mbona kuluɓ kay suu babali masisina.

⁵⁴ Nam tuɗusi hu liim ma teteɗna, kay ɦinira nam manaɗta.

⁵⁵ Nam dikisi suu daŋŋa ha ki fokosiya, nam ɓorow mbassa ki maŋ suu Israelna, nam cuk dee suu Israelna hu ziisina halaŋ halaŋ.

⁵⁶ Na lay ni asi hin gijaŋ a tuk Lona, ma ay kolo dayna, ka hum u dlara nam dasiraɗi.

⁵⁷ Asi ɦuɗ tasi ki eg Lona day ko somoyosi li ay jewra na may, asi hoŋ ki dagan ko mbuurura suuna munuɗ ha kira na.

⁵⁸ Asi ɓeŋem hurum u goɓpa goɓ loogi suu ɦawana kolo kay ɦinira, fuli masisina ɓeŋem hurummi ɓeŋi na ɗow.

⁵⁹ Lona wi na ni, hurum ɓeŋa, nam cuk suu Israelna ki halaŋ.

⁶⁰ Nam hin ziim ma hu Silona kiyo, nam noy suu Israelna ki halaŋ.

⁶¹ Zandukka tak saɓak mamma kira nam hiniɗ suu daŋŋa tlaɗ kiyo.

⁶² Nam hin suu mamsina suuna casi kiyo, nam mbuɗ hurum eg suu mamsina.

⁶³ Gorzoŋi mamsina kura ŋgalasi kiyo, gorɓiina sa ka ɗumusi oloɗi lay.

⁶⁴ Muli suu li ɓivunna suuna casi kiyo, boyogi suu donona hin ka tiirisiɗi lay.

⁶⁵ Ko ndal sa ma ay buuri senna na, ko ndal sa ma ay gurɗi u summa na, Bu Suuna dliɗ ki kolo wa.

⁶⁶ Nam dik suu babali mamsina, hoŋosi ki dagani, su ki kasi a fafaɗta.

⁶⁷ Nam hin njaf suu vi Yosefna kiyo, nam min ka a man njaf suu vi Efrayimmaɗi.

⁶⁸ Nam manni njaf ma vi Yudana, ɦini may ma Siyonna nam minimmi namu.

⁶⁹ Nam min Ziim ma Teteɗna eŋ ko ɦinira na may, ko ndaŋgara na nam minim na ni a fafaɗta.

⁷⁰ Nam man David, saam ma sunda, nam yam ay ni hu li ma taa yoorina.

⁷¹ Nam yam ay ni u timigii mamsina a taarasira, nam mbuɗum a sa ma taa njaf suu vi Yakobma, suu Israelna ni suu hu njafamma.

⁷² David ni sa ma taa yona, ma va co ka ŋgay hurumbina, nam taarasi ni u yalna.