SOOLLA 77 - Boy Lonana

Saara kay dlara ŋgolora Lona laɗta

¹ Soolla vi sa ma fok suu gi soollana, gaɗ ni Yedutun, soolla vi Azaf.

² An yi Lona ha koloo, an sawalla. An yi Lona ha koloo, nam hin humunu.

³ Hu li ma lassa fanna, an cenni Bu Suuna, njeŋge lay ni an maɗ kon ha ni mamu, hurun ka tin kaŋgaɗi.

⁴ Humun gan kay Lona wa ni an oy cocoo, hu li ma an ka saara hurun njay ki cocoo.

⁵ Aŋ ka hinin a buu senɗi. Hurun ki ɓalakiya, an ka ndak a njaɗ boy nammaɗi lay.

⁶ An ka saa kay dlara jak ki jewra u basa mayra ay ki fok jew dayra.

⁷ Njeŋge ni an saa ni kay sool ndaɗta, saa manda hoŋ ay ni kay boy namma olo olo, hurun ka joɓ tamu.

⁸ Bu Suuna, hinin ki ni a fafaɗta su? Nam ka ndak a wan hahawan oloɗi su?

⁹ Jivi mamba ay kolo kan ɗowra daɓ ki wa su? Boy mamma ka mba egen oloɗi su?

¹⁰ Lona humum maa ki a lan oora kanda su? Hurum ma ɓeŋ kina, dugum jivi mamba ki wa su?

¹¹ An di ana ni dlara su ki kanda ɗaŋ, Lona ka njun umi oloɗi.

¹² Humun gan kay sunda ŋgolora vi Yawera, na daŋ may, humun gan kay dlaaŋga mbuɗ mbuɗta suu jewra.

¹³ An hoŋ di dla mayra aŋ laɗ kira ki olo, aŋ tak saɓak maŋŋa ki duk suuna.

¹⁴ Ҥi, Lona, voɗ maŋga ki ni teteɗ, lo ma daŋ ma ko aŋ na kaɗi.

¹⁵ Aŋ dew ni Lo ma li dlara mbuɗ mbuɗta, aŋ tak saɓak maŋŋa ki duk suuna.

¹⁶ Aŋ cuk suu maŋsina ay ki ni u bik koŋu. Ni goryoŋ Yakobma u suu vi Yosefna.

¹⁷ Mbona lay waŋ aŋ Lona, mbona lay waŋu, nam li ndaana koŋu, zul ŋgolla lay dlak ki lay.

¹⁸ Ɗugulla si mbona ay lay, ndak njaɗ lay, mbuuru maŋga tew ki hu lina halaŋ.

¹⁹ Aŋ bay u saɓakŋa, weleɗta ɓo lina ki cocoo, ndaŋgara geŋeɗ lay.

²⁰ Aŋ tli voɗ maŋga ay duk mbo lumma ŋgolna, aŋ jak ay duk mbo ma galina, sa ma waŋ balam seŋ ma tuɗta kaɗi.

²¹ Aŋ tak voɗta ay maŋ suu maŋsina ni ko ndal yoorina na, asi tuɗ ay ni u saɓak Moiz u Aaron.