SOOLLA 74 - Boy Lonana

Cen Lona kay nam suɗ suu mamsina

¹ Soolla haɗta vi Azaf. Lona, aŋ zuɗumi ha ki na gak gakŋi kay mege? Huruŋ ɓeŋi eg yoori suu ka hu katlaŋ maŋga na gakŋi amege?

² Gi humuŋ ay kay suu maŋ suu aŋ manasi ay ki fok jew dayna, njaf suu aŋ mbuɗusi ki a maŋsinana, ɦinira Siyon ta aŋ cuk ziiŋ kaɗta.

³ Mbay gol ɓalakka vi Siyon gige, tlesuu hu Ziiŋ ma Teteɗna suu babali mamsina ɓalakasi ki halaŋ.

⁴ Suu babali maŋsina ka sawalla ay hu Ziiŋ ma Teteɗna. Asi tin haɗ masira ki hu ziiŋŋa lay.

⁵ Asi ni ko ndal sa ma ka guna u njet mamma a ka gura ki gara na.

⁶ Asi to tlesuu hu zinana ki halaŋ, kaasi ki u njet masina.

⁷ Asi ŋgalaŋ Ziiŋ ma Teteɗna ki u kura, asi mbuɗuŋ seŋ ma teteɗna ki nje njera.

⁸ Asi vi vun tasi ki halaŋ, li ma suuna yaŋ seŋ huna ma teteɗna asi ŋgalam ki hu mbassa ndaɗta halaŋ.

⁹ Cemi ami ka wi vaami ma dew oloɗi, sa ma jok vun Lona kaɗi lay, dukumi ni sa ma wi ana dla ndaɗta hin daɓ ki saɓage kaɗi.

¹⁰ Ҥi, Lona, suu babali mamsina hin hinimi panda ni saɓage? Asi hin hin ŋgulla ŋguluŋ seŋga ni saɓage?

¹¹ Aŋ li koŋ ma njufna ki na ni amege? Aŋ cuk koŋ ki huruŋ na ni amege?

¹² Aŋ Lona ni mul manna ay hu jewra day, aŋŋi sa ma su kay suunana dew.

¹³ Aŋ gol mbo lum ŋgolna ni u saɓak maŋŋa, aŋ to yam dragoŋŋa ki duk mbona lay,

¹⁴ aŋ to yam hurum ma mbuɗina kiyo, ɦam tliwim ki maŋ bayakka.

¹⁵ Aŋŋi sa ma law yo ma cira, aŋ so mbo lum ma ka gin a so kiɗina ki lay.

¹⁶ Faalira ni maŋga, njeŋgera ni maŋga lay, aŋ nja ciciwra u tilna hu liisiya.

¹⁷ Aŋ tin vun ndaŋgara dodora ay eŋga ni aŋu, vun semeɗna u benewra aŋ lasi ni aŋu.

¹⁸ Humuŋ gaŋu, Yawe, suu gonok maŋsina ka panaŋu, suu may suu laɓana ka ŋguluŋ seŋu.

¹⁹ Hin guguk maŋga a tleɓagi suu mayra casina vaɗ kiɗi, humuŋ maa ki kay iirira vi suu hawraɗi.

²⁰ Gol iriŋ kay galamba aŋ vaɗta, kay suu ka ŋgay ŋguy kamina hal a mbuɗ mbassa ki masira.

²¹ Ka hin suu may suu ka lasna mbuɗ zoloɗi, hin suu ka lasna u suu wihawra geleɗeŋŋi seŋu.

²² Ҥi, Lona, col koloo, doo kay dlaaŋga, humuŋ gaŋu, suu laɓa asina ka tuɗ fok u panda panaŋga.

²³ Humuŋ maa ki kay boy ma suu babali maŋsina dammaɗi, vunna tum kolo eg suu maŋsina ni tumi na ɗow ɗow.