SOOLLA 73 - Boy Lonana

MAGAARA HINDIRA SOOLA 73.1—89.53 Ɗegee Lonara

¹ Soolla vi Azaf. A gasira ni Lona nam jivi kay suu Israelna, nam jivi kay suu hurusi haɓma.

² An may ni hin na tok a puk kaŋgara. Hin na tok a sen calaɗ ki keŋga.

³ Kay an wi suu li dla cora tuɗ jivira na ni hurun haɗ egesi cocoo.

⁴ Asi ka u tlena kosi coco kay ndaŋgara, asi ɗoori coco lay.

⁵ Asi ka ca yasi kay lassa vi saɗi, dlara ndi kay suuna ni ka fasi dukgi lay.

⁶ Asi cuk ŋga tara tasi ko barawna na, asi las suu daŋŋa usi ɦawa may.

⁷ Hurusi saa ni dla cora sak sak, saa masira hal ni yal ma cona.

⁸ Asi pan suu daŋŋa, san usiya, ɓak dlasira u eŋga cocoo.

⁹ Asi ŋgo vunusi ki na ɦoŋ kay suuna, asi tin gaɗta ŋgolora kay suuna.

¹⁰ Kay ndaɗta suu vi Lonna lay mbuɗ ki usiya. Asi casi dlasira hurusi, ko ndal suuna a ci mbonara na.

¹¹ Asi di ana, «Lona ndak wi ni u mege? Nam ha gi kolo day ni ndak wi su?»

¹² Gola suu cona tew tew ka laki jiviya, bege masira zul ha ni, zuli na ɗow ɗow.

¹³ An gol tan ana an ka li dla coɗi ni ɦawaa, an gol tan ana kon ŋgen va coɗi ni ɦawaa.

¹⁴ Buuna halaŋ lassa ka fanu, hu buuna halaŋ aŋ ka gaɗanu.

¹⁵ Lini an min a ɓak ko asi na may ni, an gijaŋ a di kolokŋa kay suu maŋsina.

¹⁶ Kay ndaɗta an vi tan a hum u boy namma, nam su ki kanu.

¹⁷ An min a kal ni hu Ziiŋ ma Teteɗna. An gol ana suu asina daɓ masira hin li ni ana mege?

¹⁸ Gasi ni aŋ hin cukusi hu li ma golobotna, aŋ hin zuɗusi ni hu li ma baasi kina.

¹⁹ Asi hin ba kini na zak gaw, daɓ masira mbuɗ suuna ndaa cocoo.

²⁰ Bu Suuna aŋ hin bulumusi dlasi ki hu ɦoŋzina, asi mbuɗ ni ko doyra di suuna ŋgarapiira ɦawa na.

²¹ Na ni an hurun ɓeŋ ki cocoo, kay boy namma ŋgenenu.

²² An ka ndaki a hum u boy nammaɗi, an ay ni ko ndal vabakgina na, may ni an ay ni u aŋu.

²³ Kay an tew tew ka u aŋu, aŋ van kon ma njufna wa,

²⁴ aŋ ka tinin hu lina u wiiŋga. An tew wa ni aŋ hin van hu bibiŋilla may.

²⁵ Sa ma an halam ha huulona ni ge ologe? Kay aŋ ka ki u anu, va ma furiyun hu duliyara tani kaɗi.

²⁶ Lini tan mbuɗ maŋi lay, hurun mbuɗ maŋi lay, aŋ, Lona, ni saɓakanu, ni vaan ma an famma.

²⁷ Na daŋ may suu tuɗ ha ki egeŋ dayna hin ba kiyo, aŋ hin ɓalak suu goɓ lo ma ɦawana kiyo.

²⁸ Jivi manda kay tanda ni ana kak na tok eg Lona. An ŋgay tanni eg Bu Suuna Yawe, an min njaɗaŋ dlaaŋga ki halaŋ.