SOOLLA 72 - Boy Lonana

Cenda kay mulna

¹ Soolla vi Salomon. Lona, haɗ yal kaɓak ma jivina maŋ mulna, tak ɗegeera maŋ goryoŋ mulnana may.

² Ko asi ti kay suu maŋsina u ɗegeera, suu hoŋ yasi gaa u jivi maŋgana.

³ U ɗegee ndaɗta tlena halaŋ ka furiya. Ҥinira lay ka wi jivi ndaɗta.

⁴ Ko nam li dlara jivira kay suu hoŋ yasi gana, nam lini a suu suɗ suu wihawra, nam ba suu las ndarayasina ki may.

⁵ Ko suu maŋsina goɓoŋ gak gak hu li ma faɗta u tilna ka li kiɗikka tuna ta ta hu vun daɓpa duliyara a daɓ kira.

⁶ Asi li ni ko mbo lo ma si hu li ma goloŋiina na, ko lo ma laɓ yam ndaŋgara ki belna na.

⁷ Hu li ma nam ka ti mulla, ni suu ɗegeena tuɗ ha fok na ɗow ɗow, begera zul ha fok na ɗow ɗow may.

⁸ Nam kak a ŋgolla kay mbo lumma halaŋ u mbo lum ma gorina lay, kay yam mbassa halaŋ.

⁹ Suu taa yoona ŋgoo bagina lay goɓ kaŋga fokomu, suu babali mamsina hin tanaɗ ndaŋgara u sinisiya.

¹⁰ Muli suu Tarsisna u muli suu kay daarana sunum tlena aya, muli suu Sabana u suu Sebana hin ɦam taara ni mamu.

¹¹ Mulina halaŋ hin goɓ ga fokomu, Njaf suuna halaŋ hin sunumu.

¹² Na daŋ may nam buɗ suu wihaw suu ka yamma kiyo, njun suu hoŋ yasi gaa, sa ka kasiɗina may.

¹³ Nam hin saa kay suu hahawra u suu maŋina, nam hin suɗusi iiri masira.

¹⁴ Nam doo suu lasi hawra ki kasiya, nam ŋgomosi iiri masira.

¹⁵ Nam kak wa ni asi hin ɦam lorra Sabara kiyo, asi cen kam tew tew, asi paɗ vunusi ki kam hu buuna halaŋ.

¹⁶ Ko wana jiv kay mbassa cocoo, tlena ɗuf jivi kay yam ɦinira may. Yam wana gol jivi cocoo, hu ɦoŋzina halaŋ tlena li jivi cocoo.

¹⁷ Sem yi ha ni na gak gak, suuna geleɗem sem ha na din din ko ndal faɗta na. Suuna gi deɓpa maŋ tasi u semu, njaf suuna halaŋ di kam ana ma jivi coco ɦayna.

¹⁸ Gi deɓ Yawe, Lona, Lo ma vi suu Israelna, nam dew ni sa ma li dlara mbuɗ mbuɗta.

¹⁹ Geleɗem sem ma bibiŋilna ni a fafaɗta. Ko duliyara halaŋ oy ki u bibiŋil mamba. Amin. Amin.

²⁰ Cenda vi David ma goŋ Jesena daɓmi na.