SOOLLA 71 - Boy Lonana

Cenda vi sa maana

¹ Yawe, aŋŋi sa ma an ŋgay tan egeŋŋa, hinin a an mbuɗ zoloɗi.

² Aŋŋi sa ma ɗegee, hu vi vun maŋŋa buɗun kiyo, tin humuŋ aya humunu, suɗun kiyo.

³ Aŋŋi ɦini ma an ŋgay tan umma, u ŋgusuŋŋi va ma lan kaɗi. Aŋ min ana aŋ suɗun kiyo, na daŋ may, aŋŋi ɦini manna, ni ɦoŋziin ma saɓakŋa.

⁴ Loonna, suɗun ki ko suu cona, ki ko suu li dla cora u suu ci maɗna.

⁵ Bu Suuna, Yawe, an tin saa manda ni kaŋ dew, ay u zoŋ tan day, aŋŋi sa ma golonna.

⁶ An deŋ tan egeŋ ay ni hu vuɗ manda day, aŋ kalan ay ki huu sunni aŋu. An ŋgaaŋŋi aŋ na tew tew.

⁷ Dlara mbuɗ mbuɗta fan cocoo, aŋ dew ni sa ma an ŋgay tan egeŋŋa.

⁸ Vunun oyra ni u ŋgara an ŋgaaŋga, an takaŋ ŋgol maŋga ki hu buuna halaŋ.

⁹ Cemi an mbuɗ ki maari, aŋ hinin kiɗi, hu li ma saɓakan daɓ kina, aŋ noyon kiɗi.

¹⁰ Kay suu babali mansina ka njaɗ kanu, suu ka juɓun unna vi vun tasi ki wa.

¹¹ Asi ɓak tasi ana, «Lona noyom ki wa, ŋgufugina, vagina, sa ma njun kam kaɗi.»

¹² Ҥi, Lona, ɦuɗ taŋ ha gi egen dayɗi, Loonna mbay zak njununu.

¹³ Ko suu hal a viɗin iiri mandana, tuɗ ba ha ki hu zolo masina, suu halan dlara hahawra ay kanna yasi bal kasi zolona.

¹⁴ An may ni hurun tinira ni kaŋu, an so tan a geleɗeŋŋi aŋ dew.

¹⁵ Hu buuna halaŋ an ndumuŋŋi dlaaŋga, ɗegee maŋga u suɗ maŋga, ndumusi ka irin oloɗi.

¹⁶ An ŋgaaŋ sun maŋga ŋgolora cocoo, Bu Suuna Yawe ma din dinna, an fi ɗegeera ay ni koŋ dew.

¹⁷ Lona, aŋ haɗan ay ki ni u zoŋ tan day, ta ta cemi an ka di ki kay dlaaŋga mbuɗ mbuɗta.

¹⁸ Lini an mbuɗ ki maa lay, yan mbuɗ ki haɓ lay ni, aŋ Lona noyon kiɗi. Ko an di dla sun maŋga aŋ laɗ u bik koŋga ki maŋ njaf suu dagan wanna may.

¹⁹ Jivi maŋga ka kolo day, aŋŋi sa ma li tlesuu ŋgolona, Lona, sa ma ko aŋ nana ni gege?

²⁰ Aŋ takami dlara yoora u lassa cocoo, aŋ hin hinimi cecemi ni iiri tuwa. Aŋ hin tlan ki kay zul ŋgolla ka ga kay ndaŋgara wanda.

²¹ Aŋ hin ɦan ŋgolla, suuna ŋgaanda, aŋ hin ɗilin irin olo.

²² Kay ndaɗta an gaŋ deɓpa Loonna, an ŋgaaŋ ɗegee maŋga, u diŋŋa an gi soolla geleɗeŋga. Lo ma teteɗ ma vi suu Israelna.

²³ An gi soolla geleɗeŋga, vunun gi ni soolla furira, kay aŋ gusun iiri manda ay ki wa.

²⁴ Sinin hu buuna halaŋ njaɗ ni kay ɗegee maŋga, zolona tok kay suu halan dlara hahawra ay kanna wa.