SOOLLA 69 - Boy Lonana

Cenda vi sa ma ka lasna

¹ Soolla vi sa ma fok suu gi soollana, Soolla vi David. Soolla u ɓo tlena.

² Ҥi, Lona, suɗunu, cemi mbona van ki ni delenu.

³ An ndi ni hu zulla uɗ doroɓma ka doɗira, va ma van ay kolo kaɗi. An kal ni duk gaalina, mbo ma ɓaɗna ka tuɗ u anu.

⁴ An sawalla saɓakan daɓ wa, ɦoo delen mbuɗ ko kura ŋgalla na, irin ka wi oloɗi, an ka juɓ ni Loonna.

⁵ Asi zuli su tlimiɗ yanu, ni suu kaan dlara kan bay uɗna. Suu asina saɓak cocoo, asi kaan boyna kanu, va ma an kulum kaɗina, hin hoŋom mi ana mege?

⁶ Lona aŋ wan dawi manda, coonda ka iriŋ ŋgayɗi.

⁷ Bu Suuna, Yawe ma Saɓakŋa Kom Belna, hinin a an li zolona ko suu ka saa kaŋŋaɗi. A mbuɗ suu ka halaŋŋa zoloɗi lay, Lona vi suu Israelna.

⁸ An siɓ ŋgulla ni kay seŋ aŋu, ko zolo namma tok ki ni kanna ɗow.

⁹ Ko an mbuɗ ii gorsenna ni ko koyna na, gorsen suu vi sunna lay ka wanɗi.

¹⁰ An miniŋ ziiŋŋa cocoo, minda kay ziiŋga ŋgalan hurun ko kura na, asi ŋguluŋu, ŋgul ndaɗta hoŋŋi kanu.

¹¹ An tiira li laara lay, halaŋ ca ni mbaa kanni ŋgulla.

¹² An cuk baraw bolna tan li hahawra, an mbuɗ irisi ni a va ma njun njunda.

¹³ Suu laki vun grekŋana ka luu wa, suu ci summa gi soolla ni u senu.

¹⁴ Yawe gola ni cen manda, lina ndak wa a aŋ humunda. Aŋ Lona ni sa ma ɗegee maŋga ŋgolna, hoŋon dira kay aŋŋi suɗta gasira.

¹⁵ Paɗan ki duk doroɓma ko an ŋgaa dukgi, ko an suɗ ki ko suu halanna, suɗun ki ko mbo ma hu gaalinana.

¹⁶ Hinin a mbo ma ɓaɗna tlanɗi, hinin a an mba hu li ma ndufunnaɗi, hinin a goloŋga dug vunuɗ kanɗi.

¹⁷ Hoŋon dira, Yawe, kay ɗegee maŋga ndaɗ jiviya, u oo maŋga ŋgolla mbuɗ iriŋ ay egenu,

¹⁸ ŋgay iriŋ ki ko saaŋ ma sundaɗi. An ka hu yoora, mbay zak hoŋon dira,

¹⁹ mbay tok egenu, li a sa ma njun kanna, suu gonok mansina kaa, buɗun ki kosiya.

²⁰ Aŋ wan asi ka ŋgulunu, panan lay, mbuɗun ki zolona, suu babali mansina halaŋ ka njari fokonu.

²¹ Ŋgulla tan hurun cocoo, an mbuɗ ki tuguɗiira, an juɓ ana dla hin li su ni dla li kaɗi, an hal suu ɗilin irinna ni bay fi tu lay.

²² Asi cukun tlesuu can kina duk tlesuu an tasina, lini laara canu ni, asi ɦanni sum ma dlayna.

²³ Ko tiisina mbuɗ kosi a va ma vasina, bege masira mbuɗ a cukusi gaara.

²⁴ Ko irisi dug kiyo, mbuɗ wi oloɗi, hinisi u furusi tew tew loɓiya.

²⁵ Hin yaaŋga ko kasiya, ko huruŋ ma yara fasiya.

²⁶ Ko ziisi ma asi kaamma hawaɗ kiyo, ko sa cuk hu ziisi namma oloɗi.

²⁷ Kay sa ma aŋ camma asi ka lasamu, asi surum lassa kam huna ɗow ɗow.

²⁸ Ŋgaasi dlaasira cora ni kasiya, hinisi a sa suɗ ki fokoŋgi.

²⁹ Bulumusi sesi ki koŋ hu magaara iirira, hinisi sesi ɓiiri duk suu ɗegeenaɗi.

³⁰ An ma asi hoŋon yan gaana, can ki lay, aŋ njununu, Loonna, suɗun ki duk dla ndaɗta.

³¹ An ndak a ŋga sem Lona u soolla, an geleɗem u soolla gi deɓpa.

³² Ni va ma jivi ii Yawe su mbutl ma sana ŋgaɗamma, su bolo mbutl ma mekem fiyeki cocona.

³³ Wi dla ndaɗta na ni suu hawra ka furiya, «Agi suu ka hal Lonna, iirira fiyekka ni magiya.»

³⁴ Kay Yawe hummi suu hawra, humum ka maa ki kay suu mam suu daŋgaynaɗi.

³⁵ Ŋgaagina, huulona u ndaŋgara, mbo lumma u tlesuu dukumma halaŋ.

³⁶ Kay Lona hin suɗ Siyon kiyo, nam hin hoŋ min ɦoŋzi ma Yudana koloo, suuna hin cuk huwa, nam hin mbuɗ ni masiya.

³⁷ Njaf suu sun mamsina hin lak hu a joosina, suu minim semma nam hin ki a liisina,