SOOLLA 68 - Boy Lonana

Soolla suu Israelna gaɗ a ŋga Lonara

¹ Soolla vi sa ma fok suu gi soollana, soolla vi David.

² Lona col kolo wa ni suu babali mamsina njay liŋŋa, suu gonokka u namma halaŋ yow liŋŋa fokomu.

³ Ko ndoosna vaɗ kira na, aŋ daɓasi kiyo, ko dabaŋga law ki duk kura na, suu bay ɗegeena ba ki fok Lona ni na may.

⁴ Na may suu ɗegeena ka furiya, asi ka ŋga Lona furi u hurusiya.

⁵ Gagi soolla maŋ Lona, gagi soolla u semu, minigi voɗta Lona tuɗ hura kiyo. Sem ana Yawe, furiyugi fokomu.

⁶ Bu suu kuyuna, ma njun kay boyogi suu donona, ni Lona ma kaki hu Ziim ma Teteɗna.

⁷ Suu poy kolona nam cukusi zina kasiya, suu ay hu daŋgaynana nam cukusi ay kiyo, may suu gonokka u namma buu ki ni ŋgoo bagiya.

⁸ Lona, hu li ma aŋ kal ki fok suu maŋsina, hu li ma aŋ ka tuɗ ŋgoo hu fulla,

⁹ ndaŋgara geŋeɗa, lona si lay, fok Lona, Lo ma vi suu Israelna, fok Lona, Lo ma kay ɦinira Sinayra.

¹⁰ Aŋ si mbooŋ ga jiviya, mbas maŋga mbuɗ ki maŋiya, aŋ coloɗ kolo wa.

¹¹ Mbassa asi ka cuki kaɗ wanda ni maŋga, aŋ Lona miniɗ ni aŋu, u jivi maŋga aŋ miniɗ maŋ suu wi hawra.

¹² Bu Suuna ɦal gaɗta, suu vun sun mamsina ni suu duuna.

¹³ Muli suu duuna pii kiyo, suu hin vona ɓorow tlena kiyo.

¹⁴ Garaŋ gugukka ko ndal doonora na, tlimiɗiɗ ko lorra na. Aŋ hin buuri na si ni amege?

¹⁵ Hu buu namma Lona ma saɓakŋa njay mulina ki kay yam ɦinira Salmonda, nam si yona u dlaŋmagina duku.

¹⁶ Ҥini mayra Basanda ni ɦinira teteɗta, ɦinira Basanda yaɗ kolo zeɗ zeɗ.

¹⁷ Agi ɦinira daŋga ɓeŋ hurugi eg ɦinira Lona ŋgaɓaɗta ni kay mege? Nam ŋgaɓaɗ ni a kak huwa, nam hin kak hu ni a fafaɗta.

¹⁸ Lona u pus pus ma kulumi suu duuna bolow ka ndumbi, nam ka mbay hu Sinay, hu Ziiŋ ma Teteɗna.

¹⁹ Nam kak kay dlam mamba mulla, suu nam vasi ayna ka um cocoo, suu duu u namma lay ɦam tlena, Lona, Yawe, kak wa kay dlam mamba mulla.

²⁰ Gagi deɓ Bu Suuna hu buuna halaŋ, nam ka tlaygi nek maygira ki kamu, nam mi Lona ma suɗuygina.

²¹ Looygina ni Lo ma suɗta, Bu Suuna Yawe mayna ndak a suɗuygi ki fun miɗna.

²² Gasi daŋ may Lona to yam suu duu u namma kiyo, ŋgoɗ yam suu gonokka u namma hin ki ga hu voɗta.

²³ Bu Suuna di ana, «An hoŋ suu duu u anna ha ki hu Basan. An hoŋosi ha ki hu zulla ŋgolla.

²⁴ Kay ana aŋ tayasi busuɗusi ki ga u seŋu, digini magisina tanaɗasi busuɗusiya.»

²⁵ Haa, Lona suuna halaŋ wi saɓak ma aŋ su kay suunana wa, asi wi ki ana aŋ kal hu Ziiŋŋa wa, mul manna.

²⁶ Suu gi soolla ha foko, suu bu gaŋgana ha ŋgorosi may, dukusi ni gorɓiina ci cakiyawra may.

²⁷ Gi deɓ Lona hu li ma suu mamsina ka toki huna, Yawe ni saɓak suu Israelna.

²⁸ Fok jewna ni njaf Benjamin goo toɓona, suu ŋgolo suu hu njaf Yudana cuk baraw fiyekka tasiya. Ŋgoo dagan suu ŋgolo suu Zabulonna u suu Neftalina.

²⁹ Tak saɓak maŋŋa kiyo, Lona. Saɓak ma aŋ min njunumi u namma.

³⁰ Aŋ ka kaki hu ziiŋu ti mulla kay Yerusalem, mulina tokoŋ tlena ay maŋu.

³¹ Gaɗ suu Egiptena, vabakgi suu cona, u suu masi suu goɓ gor mbutlinana, suu ŋguf lina ŋguf ŋguf u gursu masirana. Njay suu may suu furi kay dla duuna ɦayna kiyo,

³² suu ŋgolo suu Egiptena mbay egeŋu, suu Etiyopina mbay fok Lona ni u tlena kosi cocoo.

³³ Agi muli suu hu duliyarana halaŋ, gagi soolla geleɗ Lona, geleɗegi ŋgolla vi Bu Suunara.

³⁴ Geleɗegi Lona ma kolo dayna, ha kolo huulona ma din dinna, humugi delemba saɓakŋa.

³⁵ Ŋgaagi Lona saɓakŋa ni mamu. Ŋgol mamba ni kay suu Israelna, saɓak mamma ay ki kolo hu ɗugulla.

³⁶ Lona ay hu Ziim ma Teteɗna dlam ŋgol cocoo, nam mi Lo ma vi suu Israelna. Nam ka ɦal saɓakŋa u eŋga maŋ suu mamsina, gi deɓ maŋ Lona.