SOOLLA 66 - Boy Lonana

Soolla Cenda u Gi deɓpa

¹ Soolla vi sa ma fok suu gi soollana, soolla Gi deɓpa. Geleɗegi Lona, agi suu kay ndaŋgarana halaŋ.

² Gagi soolla geleɗem sem ma bibiŋilna, ŋgaagina u soolla geleɗta.

³ Dagi Lona ana, «Sun maŋga mbuɗ mbuɗ cocoo, kay saɓak maŋŋa, suu gonok maŋsina halaŋ hom kaŋga fokoŋu.

⁴ Ndaŋgara halaŋ goɓ ga fokoŋu, ndaɗ ka gi soolla ni u seŋu.»

⁵ Mbaagi aya agi hin wi sunda vi Lonara, dlaamba mbuɗ mbuɗta su ki kay suu warna.

⁶ Nam mbuɗ mbo lumma ki lii sooyna, asi taɓa lumma ki bay sesi laɓa, ni ay ndak a lay luuna mamu.

⁷ U saɓak mamma nam kak mulna a fafaɗta, irim ka ndum tlena hu duliyara ki halaŋ, suu babali mamsina ka ndak a li ya u nambi, ka col fokombi lay.

⁸ Suuna, gagi deɓpa maŋ Looygina, gagi soolla geleɗemba.

⁹ Nammi sa ma hinigi lak iirina, hinigi ka a daɓ segiɗi.

¹⁰ Lona, aŋ tukumi wa, aŋ yooromi ki ko suuna yoo doonora na.

¹¹ Aŋ hinimi cuk hu bayna, ami fi dlara su kamira lay.

¹² Aŋ hin a asi lami ko yoorina na, ami cuk duk kura u mbona lay, na may aŋ cukumi ay kiyo, tinimi tina fokomiya.

¹³ An kal hu ziiŋga u ɓivun ma ŋgal kina, an min laŋ dlara an vi vunun kaɗta ki halaŋ,

¹⁴ dlara an daɗ ki u vununda, dlara an ɓakaɗ ki hu yoo mandara halaŋ.

¹⁵ An laŋ ɓivunna ni u va ma ɗoori cocona, an ŋgaɗaŋ timigiina u tlesuu his jivina, an ŋgaɗaŋ bolo mbutlna u ɦu ŋgekŋa.

¹⁶ Agi suu li ndaa Lona, mbaagi aya, agi humun dlara an ka njaɗaɗta, dlara nam landa kanda.

¹⁷ Hu li ma vunun ka yamma, sinin ŋgaam mi namu.

¹⁸ Lini an saa ginni coo ni, Bu Suuna ka humunɗi.

¹⁹ Na may Lona huma, nam zuɗun cen manda ka kiɗi. Nam humun cen manda wa.

²⁰ Gi deɓ maŋ Lona, nam zuɗun cen manda ka kiɗi. Ŋgayan ɗegee mamba ka ki konɗi lay.