SOOLLA 65 - Boy Lonana

Soolla gi deɓpa

¹ Soolla vi sa ma fok suu gi soollana, soolla vi David.

² Lona ma ka hu Siyonna, geleɗta ni maŋ aŋu, ami laŋ dlara ami vi vunumi kaɗta kiyo.

³ Aŋŋi sa ma hum cenda vi suuna, tlesuu iirina halaŋ tuɗ ha egeŋu.

⁴ Hu li ma coomira su kamiya, aŋ bulumumi coomira ki wa.

⁵ Furira ka kay sa ma aŋ yamma, nam hin kak hu kaa maŋŋa. Ami hin hoɓ u jivira hu ziiŋga, u tlesuu teteɗ suu hu ziiŋŋana.

⁶ U ɗegee maŋga aŋ hoŋomi dira kay cen mamira, Lona, saami ma suɗta. Aŋŋi heɓpa kay ndaŋgarara halaŋ gak gak hu vun mbo ŋgolna lay.

⁷ Nam gol ɦinira ni u saɓak mamma. Nam tak saɓak mamma kiyo.

⁸ Nam seŋ bil mbo ŋgolna gaa, nam doo bil mbo ma ɓaɗ cocona, nam seŋ vun ma vi suunana lay.

⁹ Suu hu duliyara halaŋ li ndaana ko dlara aŋ laɗta, an tak furira u maɗiina lay u fiɗigina lay.

¹⁰ Aŋ ka gol ndaŋgara, ka ɦaɗ tina lay, aŋ oyoɗ u tlesuu jivina. Lum ma vi Lonna oy ki u mbona, aŋ min tlesuu tira maŋ suuna. Gola, aŋ min ndaŋgara ni ko ndaɗta na,

¹¹ aŋ ka si yona kay zumma, aŋ ka nja yam ndaŋgara kiyo, aŋ laɓaɗ yaɗ u mbona, aŋ ɦal saɓakŋa maŋ ii tlena, asi daya.

¹² Basa daŋga aŋ daɓaɗ u jivi maŋga, li ma aŋ jak huna halaŋ tlena ka jiv huwa.

¹³ Haɗ ma ŋgoo bagina ɗuf cocoo, yam ɦinira halaŋ oy u furira.

¹⁴ Doŋ kaana oy ki u yoori suu gorina, huu li ma senena oyra u wana may, tlena halaŋ ka furiya, ka gi soolla.