SOOLLA 64 - Boy Lonana

Cenda kay hal njunda

¹ Soolla vi sa ma fok suu gi soollana, soolla vi David.

² Lona humun tii manna, ŋgomon iiri manda ko saan ma gonokka, ma lan ndaana.

³ Ŋgayan ki day ko suu dan ŋgeŋŋa kanna, ha ki day eg suu li dla cora suu ka gi gagara duk tasina.

⁴ Asi min sinisi ki ko ŋgew ma siina na, boy masina ni ko mbuurura mun sana na may.

⁵ Asi ŋgay tasi ki a munuɗ kay suu ɗegeena, asi munuɗ ni na zak ka li ndaaɗi.

⁶ Asi tin hurusi ni a li dla cora sak, asi gi wayra ni a di ŋgeŋŋa kay suuna. Asi di ana, «Sa ka wi boy nammaɗi.»

⁷ Asi saa ni kay dla cora, asi saa ana sa ma wasi mbeleŋ masina kaɗi, huu sana gasi ni ko zulla yaɗ derewra na.

⁸ Na may Lona munusi wa, mbuuru mamba vasi wa.

⁹ Nam vasi ga ni u boy masina. Gegelay ma wamma ni tam dlaka.

¹⁰ Suuna halaŋ mbuɗ ki ndaana, asi ka di dlara Lona laɗta kiyo, sun mamba ka takasi dlara cocoo.

¹¹ Sa ma ɗegeena furi kay Yawe, nammi liim ma nam ŋgay huna, huu ma ɗegeena halaŋ ka geleɗemu.