SOOLLA 62 - Boy Lonana

Lona dew ni sa ma suɗta

¹ Soolla vi sa ma fok suu gi soollana, soolla vi David, gaɗ ni Yedutun.

² Na daŋ may musukun cemi tin wa fok Lona, suɗ manda col ay ni komu.

³ Na daŋ may nammi ɦini manna, ni suɗ manda, nammi ɦoŋziin ma saɓakŋa lay. Cemi va ma ŋgenen kaɗi.

⁴ Agi hin hinigi dlara tok kay sa ma dewna kini saɓage? Ko gulumun ma hal a bow kina na, ko goŋ mayra wak kira na, ɗowba ko liw mayra hawaɗ ki gara na.

⁵ Asi saa ni kay a gam ki kaŋgara hol, asi halni dlara kaboyna sak sak. Asi gam deɓpa u vunusiya, hurusi kurufu ni yam tlena kam may.

⁶ Ndak musuk manda kak na en eg Lona, kay saa manda tini ni kam dew.

⁷ Na daŋ may, nammi ɦini manna, ni suɗ manda, nammi ɦoŋziin ma saɓakŋa lay. Cemi va ma ŋgenen kaɗi.

⁸ Suɗ manda u bibiŋil manda ka tok eg Lona, ɦini man ma eŋŋa u liin ma ŋgayra halaŋŋi hu Lona dew.

⁹ Agi suuna tin saa magira kam hu lina halaŋ, ɦagi hurugi mamu. Lona ni sa ma aygi ŋgay egemma.

¹⁰ Na daŋ may suu warna ni semeɗna ɦawaa, asi suu ŋgolona takŋi kaboyna. Lini sa a ŋgaasi nekesiya ni, asi ki ni fet ko semeɗna na.

¹¹ Lagi ayra kay lassa agi ka las suunaraɗi, tin hurugi kay tlesuu ɓaɗasi ko suuna ɦawaɗi. Lini begera zul kogi coco lay ni tin hurugi kaɗɗi.

¹² Lona ni malaŋ saɓakŋa halaŋ. An huma nam di na ni ka sem dew ɦawaɗi.

¹³ Ɗegeera col ay ni koŋu, Bu Suuna, aŋ warak gegelay ni u sun mamba nam laɗta.