SOOLLA 60 - Boy Lonana

Cenda kay njunda

¹ Soolla vi sa ma fok suu gi soollana, soolla haɗta vi David, kay dikira.

² Hu li ma nam duu u suu Sirina suu hu mbassa Mesopotamira u Sirina suu hu mbassa Sobana. Joab hoŋ ay ni ci suu Edomma ha hu lokka vuvuna, ni bup bup doogo yam mba'.

³ Ҥi, Lona, aŋ hinimi kiyo, aŋ njayami kiyo, aŋ mbuɗ ki yara egemiya, cemi aŋ hoŋomi ay wa.

⁴ Aŋ geŋeɗ ndaŋgara, aŋ hawaɗ kiyo. Cemi aŋ nereɗ ii wak ndaɗta kiyo kay ndaɗ hal a ɓeŋ kiyo.

⁵ Aŋ tak tukka eŋ cocora maŋ suu maŋsina, aŋ ɦami sum ma gumba hurumi wa.

⁶ Suu laŋ ndaaraŋŋa aŋ takasi mbeleŋŋa, a asi suɗ tasi ki ko suu mbuurura.

⁷ Kay ana suu aŋ minisina suɗ kiyo, suɗumi u ɗegee maŋga, humumiya.

⁸ Lona ɓak ay hu Ziim ma Teteɗna ana, an su kasi wa, an hin ɓorow ii Sekem kiyo, an hin ŋga suu man suu Sukkotna,

⁹ Galaad ni manu, Manasse ni varanu, Efrayimmi jumba kay yanda, Yuda ni tokolo manda.

¹⁰ Moab ni tassa ma an mbus tan huna, an cuk tuɓuru manna ni kay Edomma, suu Filistina dak tasi ki u tiina egenu.

¹¹ Sa ma hin tuɗun hu ɦoŋzi ma saɓakŋa ni gege? Sa ma hin tuɗun ta ta Edomma ni gege?

¹² Lini aŋ, Lona, ma noyomi kina gawɗi su, ni Lona ma ka tuɗ u suu mami suu duuna oloɗina?

¹³ Mbay njun kami ko suu babali mamsina, kay njunda vi suu warna ka ndak a li vaɗi.

¹⁴ Ҥi, Lona, lini aŋ ka u amiya ni, ami hin li tlesuu ŋgolona, ami ndak a su kay suu babali mamsina.