SOOLLA 59 - Boy Lonana

Cen Lona kay suɗta

¹ Soolla vi sa ma fok suu gi soollana, soolla vi David. Nam gi sool ndaɗta ni hu li ma Sol cuk suuna juɓum um hu ziim a cam kira.

² Ҥi, Lona, suɗun ki ko suu babali mansina, golon ko suu gonok mansina.

³ Buɗun ki ko suu li dla cora, suɗun ki ko suu ci maɗna.

⁴ Gola asi kal ki buuri ga fokonu, suu garaŋŋa mbay kan wa, an li va co kaɗi lay, li suluk kaɗi lay, Yawe.

⁵ An li va kaɗi, asi ka min tasi kanu, col ay ki koloo, mbay ŋgafanu, golosiya.

⁶ Aŋ, Yawe, Lo ma Saɓakŋa Kom Belna, Lo ma vi suu Israelna, dliɗ ki koloo. Kaɓakŋa kay njaf suu asina halaŋ, wi hahaw suu co asinaɗi.

⁷ Fiɗigi ni asi hoŋ aya, ŋgoɓ ko diginina na, asi kuɗuk hu ɦoŋzina.

⁸ Vunusi gi kuffa na gidip gidip, vunusi ni ko ndal ŋgewina na. Asi di ana, «Sana hin humuygi ni gege?»

⁹ Aŋ, Yawe, may ni ka san usiya, aŋ ka pan njaf suu asina halaŋ.

¹⁰ An hin fi saɓak manna ay ni koŋu, ɦoŋziin ma saɓakŋa, ni aŋ Lona gaw.

¹¹ Lona ma ɗegeena mbay fokon tani, aŋ mbuɗun a san u suu babali mansina.

¹² Casi kiɗi, kay a suu mansina maa ki kasiɗi, geŋeɗesi u saɓak maŋŋa, pukusi gaa. Bu Suuna aŋŋi mbari mamina.

¹³ Vunusi oyni u dla cora, boy ma asi damma halaŋŋi cora. Ŋgaa taasira cukusi ki ga wa, kay asi ni suu kaboyna, hin ŋgal kiyo.

¹⁴ Daɓasi kiyo, casi ki u yaaŋga, daɓasi kiyo, hinisi usi hu oloɗi. A asi wi ki ana Lona ni mul ŋgol ma vi Yakobma ta ta hu vun ndaŋgara dodora.

¹⁵ Fiɗigi ni asi hoŋ aya, ŋgoɓ ko diginina na, asi kuɗuk hu ɦoŋzina.

¹⁶ Asi poy a hal tina. Lini asi hoɓ kaɗi ni, asi gurni cocoo.

¹⁷ An may ni ŋgaaŋŋi saɓak maŋŋa, maɗii feɗet ni an geleɗeŋ ɗegee maŋga. Kay aŋŋi ɦoŋziin ma saɓakŋa, hu buu ma lassa fanna, an ŋgay ni huwa.

¹⁸ An geleɗeŋu, aŋŋi saɓakanu. Ҥoŋziin ma saɓakŋa ni aŋ Lona, aŋ Lona, irinni ɗegee.