SOOLLA 58 - Boy Lonana

Cen Lona kay nam kaɓakŋa kay cora

¹ Soolla vi sa ma fok suu gi soollana, soolla vi David, ɓalak va kiɗi.

² Agi suu ŋgolona, agi ka kaɓakŋa u voɗom su? Agi kaɓak ma vi goryoŋ suunana u voɗom wan su?

³ Ҥawaa, a gasira agi ci ni maɗna. Agi mbaa ni dlara humma duk suuna kay ndaŋgara.

⁴ Suu li dla cora u suu ci maɗna tin dla ndaɗta ay ni hu li ma asi ka tlaw susina day. Asi haɗ ciwayra ni hu li ma asi kal ay ki huu susina gaw.

⁵ Asi u ŋgissa funusira ko ndal ŋgis guygina na, asi ni ko magira ŋgelira, ŋgel humuɗ kira na,

⁶ ka hum del luu ma asi luurummaɗi, ka hum jiv soolla asi gaɗtaɗi lay.

⁷ Lona, kususi siisi kiyo, Yawe, kus sii dlo namma kiyo.

⁸ Hinisi asi ɓaɗ ki ko ndal mbona na, asi kus ki ko usu ma tay ki sem suuna kaŋgana na.

⁹ Asi mbuɗ ni ko villa hin ki ii faɗtara na, ni ko goo ma vuɗ ki bay tilim ndakka, wi faɗta kaɗira na.

¹⁰ Jew bay asi a gijaŋ ɗuffa may ni, aŋ kaasi ki u ŋgolomosiya. Mbiriwinda hin njayasi kiyo. Lona ŋgalasi ki ko hurum ma ɓeŋga.

¹¹ Suu ɗegeena hin furi cocoo hu li ma asi wi Lona saasi sukulusiya. Asi hin mbus sesi ki ni u busu suu cona.

¹² Suu hin di ana, «Suu ɗegeena hin zul cocoo.» Na daŋ may, Lo ma kaɓakŋa kay suu duk ndaŋgarana kaa.