SOOLLA 57 - Boy Lonana

Cenda kay njunda

¹ Soolla vi sa ma fok suu gi soollana, soolla vi David, ɓalak va kiɗi. Nam gi sool ndaɗta ni hu li ma nam pii ki ko Sol, ŋgay tam ha gi hu zul ɦinirana.

² Wan hahawanu, Lona, wan hawan aya, aŋŋi sa ma an ŋgay egeŋŋa, an ŋgay tanni u garaŋaŋu, hu li ma an ka hu wihawrana halaŋ.

³ An yi ni eg Lona ma kolo dayna, ni eg Lona ma ndak a njun kanna.

⁴ Lona ma kolo dayna ɦan suɗta ay wa, nam cuk suu lasanna gaa, nam wan hahawanu, golon u gasi mamba.

⁵ An buuri ni duk dlona, ni duk suu kom suu warna. Siisi ni ko saɓpa cok sana na, ko mbuura lay, sinisi ni ko ŋgew ma digiina na.

⁶ Lona, tak ŋgol maŋga ay ki kolo huulona, tak bibiŋil maŋga ki hu duliyara may.

⁷ Asi gunun bayna ki fokon hu voɗta, an a jak hura, homon yan ay kaŋgaa. Asi veken zulla ki fokonu, asi tasira cuk hu zul ndaɗta ni faali lay.

⁸ Hurun cuk kaŋga wa, hurun cuk wa Loonna, an min gi soolla geleɗeŋu.

⁹ Maɗiira fora halaŋ an dliɗ kolo ni, an ci diŋ manna, faɗta dliɗ ay ki kolo ni u del diŋ man ma ŋgolna.

¹⁰ Duk suuna halaŋ an gaŋ deɓpa, Bu Suuna, an gi soolla geleɗeŋga duk njaf suuna halaŋ.

¹¹ Kay ɗegee maŋga tuɗ ta ta huulona, bibiŋil maŋga oy yam daŋgara halaŋ, tuɗ ta ta su kay ɗugulla.

¹² Lona tak ŋgol maŋga ha ki kolo huulona, bibiŋil maŋga oy yam daŋgara halaŋ.