SOOLLA 56 - Boy Lonana

Cenda a ɦal huruŋ maŋ Lonara

¹ Soolla vi sa ma fok suu gi soollana, soolla vi David gaɗ ko ndal gugukka kak ay kolo hum gu ma fiyekŋa na. David gaɗ ni hu li ma suu Filistinna vam hu Gatna.

² Wan hahawan aya Lona, kay suuna ka loɓon cocoo, hu buuna halaŋ asi ka duu u anu, asi ka dikin unu.

³ Suu cekeɗta ka cekeɗen hu buuna tew tew, na may ay kolo day ni suu duuna bolowo ka njun ay kanu.

⁴ Hu buu ma tan lan ndaana ni, an hin tanni hu koŋu.

⁵ An ŋga Lona u boy mamma, an tin saa manda ni kay Lona, tan ka lan ndaaɗi. Sa warna ndak a lan me egennige?

⁶ Boy ma an damma, suu duu u anna mbuɗum ki zeɗ, asi saa ni dlara a lan hawra doy hol.

⁷ Asi ka cekeɗen a vanda, asi cuɗun sen ma tuɗta, hal a vanni iiri manda.

⁸ Kay dla coosi ndaɗta na ni asi hin suɗ ki su? Lona, u yaaŋga ba suu asina kiyo.

⁹ Aŋ ndumun buu man ma tiina halaŋ, aŋ oyon simi manna hu guu maŋga. Aŋ ɓiirim koŋ hu magaa maŋga wa.

¹⁰ Buu ma an ka ceneŋŋa aŋ hoŋon suu duu u anna ki dagani, an wi ki gasi ana aŋ Lona ka u anu.

¹¹ Kay Lona an ŋgaammi boy mamma, kay Yawe an ŋgaammi boy mamma,

¹² an tin saaranni kay Lona, an ka li ndaaɗi. Suu warna hin a lanni mege?

¹³ Lona, an min li dlara an vi vunun kaɗta, an min li ɓivun ma ŋgaaŋ, aŋ Lonna.

¹⁴ Kay aŋ buɗun ay ki ko miɗna, aŋ golon sen hinin ka a puk gaaɗi, kay ndaɗta an ka tuɗ fok Lona u kiɗikka vi suu iirina.