SOOLLA 55 - Boy Lonana

Cenda vi sa ma suuna lasamma

¹ Soolla vi sa ma fok suu gi soollana, soolla haɗta vi David, gaɗ u diŋŋa.

² Ҥi, Lona, tin humuŋu, humun cen manda, hu li ma an ceneŋu ŋgay taŋ ki irinɗi.

³ Tin saa maŋga kanu, humunu. An mbuɗ ki maŋi ko lassa suuna lasanda,

⁴ u sawalla vi suu gonok mansina, u pan ma vi sa ma ka wi Lonaɗina. Asi hal ni dlara a baan kira halaŋ, asi dugunni u hu ma yara.

⁵ Mukulun ka mbusuk hurun cocoo, ndaana mbuɗun ko an miɗira na.

⁶ Ndaana lanu, tan dlak cocoo, tan dlak semeɗna ko ndaana.

⁷ An ɓak tan ana, «Lini garaŋ mbuɗ un ko gugukka na ni, an pii ki tuɗ hal li ma ŋgay kanu.

⁸ Na daŋ may an tin yan ki na day, an tuɗ buu ha ki ŋgoo bagiya.

⁹ An hal li ma suɗ tan kina na zak, an ŋgay ki ni ko babaana u mbiriwinda.»

¹⁰ Bu Suuna, njayasi saa masira kiyo, garakasi vunusi ki duk tasiya kay an ka wi yara u duuna ɦoŋzina.

¹¹ Njeŋge lay, faali lay, dla cora ka poy kay yam zina, ɦoŋzina ki oyra u dlara dadamba lay.

¹² Hu ɦoŋzina ni ci maɗna, yara u ganyamba ka cocoo.

¹³ Lini sa ma babali manna dew ŋgulunu ni, an hin siɓ dla ndaɗta. Lini sa ma gonok maa dew su kanu ni, an hin wi li ma an a ŋgay huna.

¹⁴ Na may lanni wayan ma mbeena, ni banan ma kokosona.

¹⁵ Ni ma ami taɓi ko tami dewna, ami tuɗ hu Ziŋ Lonara ki ko tami dew lay.

¹⁶ Ko ɓalakka li ha kay suu asina. Ko asi cuk hu lina vi suu miɗina iiri, iiriya kay hurusi oy u dla cora.

¹⁷ An may ni yi ni Lona, Yawe hin suɗun kiyo.

¹⁸ Fiɗigiya, maɗiiya, faali lay an ka tiira. Nam humun delen wa,

¹⁹ nam buɗun ay kiyo, suɗun ki wa, hu li ma asi ka duurunna, suuna ka kan cocoo.

²⁰ Ko Lona hum haa, mbuɗusi zolona, nam ma ay kaki mulna day day ka mbuɗɗina. Asi ka jok hurusiɗi lay, ka li ndaa Lonaɗi lay.

²¹ Sa namma mbuɗ um kay banayamma, nam bulum bana mamba ki wa.

²² Vunum njaɗ dlara mbulna cocoo, hurum kurufu ni duuna may. Boy mamma jivi su mbulna lay, doli ni ko ŋgew ma digiina na.

²³ Tin dlara caŋ nekka fok Yawe, nam hin ɦaŋ saɓakŋa, nam ka hin sa ma ɗegeena ndi kaŋgaɗi.

²⁴ Aŋ Lona may ni hin cukusi ki hu zulla baasi kira. Asi suu ci maɗna halaŋ, ka a lak iiri ta taɗi. An may ni hin tanni hu duk koŋu.